Proverbios 29 - Tayta Diospa Wilakuynin

¹ Anyapäyashqanta mana chaskikuq runaqa elaqpitami ushakanqa.

² Ali runa autoridä kaptinqa runakuna kushikuyanmi. Yaqa runa autoridä kaptinmi isanqa runakuna lakikuyan.

³ Surin tantiyakuq kaptinqa taytan kushikunmi. Prostitütawan jatikarqa qellaynintami ushan.

⁴ Rey ali mandaptinqa lapanpis jawkalami kawayan. Imalapitapis impuestuta cobraptinqa runakuna pasaypami pobriyäyan.

⁵ Amïgun lutanta ruraptin corriginanpa trukan halagarqa jusalikuymanmi qarpuykan.

⁶ Yaqa runaqa jusalikushqanpitami nakapakan. Ali runami isanqa imaypis kushish cantar kawakun.

⁷ Ali runaqa pobrikunapa favornin sharkurmi respitasin. Yaqa runami isanqa alquysakuyashqanta rikarpis kuyapansu.

⁸ Wajukuq runaqa pïmaytapis wajupälarmi purin. Tantiyakuq runami isanqa rabyanaykaqtapis qajarpasin.

⁹ Tantiyakuq runa mana tantiyakuq runawan rimanakurqa manami arreglayta kamäpakunqasu. Olqutupaptinpis ni ali shimilanpa parlapaptinpis manami chaskikunqasu.

¹⁰ Wanusikuq runaqa jusaynaq runakunata wanunayparaqmi chikin. Ali runami isanqa runa mayinta kuyapan.

¹¹ Mana tantiyakuq runaqa imapitapis lutalami rabyakun. Tantiyakuq runami isanqa pacienciakun.

¹² Lulakuqkunata chaskipaq autoridäqa lapan yanapaqninkunatapis yaqa kaytami yachasin.

¹³ Nakaqpis y nakasiqpis Tayta Diospitami kawayta chaskin.

¹⁴ Pobrikunata kuyapaq reytaqa manami pipis mandaq kashqanpita jorqunqasu.

¹⁵ Wamraqa astaptinraqmi tantiyakuq kayta yachakun. Awilan ashmash wamraqa mamanta penqaymanmi churan.

¹⁶ Diosta mana cäsukuq runakuna aska kayaptinmi jusalikuyla maysaychöpis kaykan. Say runakunata desgracia päsashqantami ali runakuna rikayanqa.

¹⁷ Surikita corrigirqa tranquïlumi kawankipaq. Ali kawaptinqa kushikunkipaqmi.

¹⁸ Diospa wilakuyninta mana cäsukurqa runakuna mana alimi kawayan. Tayta Diospa leyninkunata cäsukurmi isanqa ali kawayan.

¹⁹ Ashmay lutanta ruraptinqa rigorpa corriginki. Ali shimilaykipa tantiyasiptikiqa manami cäsushunkipaqsu.

²⁰ Lutala imatapis parlaq runapitaqa mana tantiyakuq runalapis mas yärakuypaqmi kaykan.

²¹ Ashmaynikita wamra kashqanpita consientïduta ashmarqa waray warantin lamentakurmi purinki.

²² Imalapitapis rabyaq runaqa piwanpis tinkuypami tinkun. Wajukuq runaqa imayka jusalikuymanmi ishkin.

²³ Orgullösu runataqa pïmaypis jamuräyanqami. Humildi runatami isanqa pïmaypis respitayanqa.

²⁴ Suwapa cumpinchinqa wilakunanpaq mayjina jurasiptinpis manami wilakunsu. Musyaykar mana wilakushqanpitami castigash kanqa.

²⁵ Jaka shonqu runaqa mana alimanmi chan. Tayta Diosman yärakuqkunami isanqa jawkala kawakuyan.

²⁶ Pïmaypis munayan mandaqnin yanapänantami. Sayno kaptinpis Tayta Diosraqmi ali arreglan.

²⁷ Diosta cäsukuq runaqa jusalikuqkunawan manami talukansu. Jusalikuq runaqa ali runakunata fiyupami rabyapan.