Proverbios 27 - Tayta Diospa Wilakuynin

¹ <> nir ama factaysu. Manami musyankisu waray junaq ima päsashunaykipaq kashqantapis.

² Kikiki halagakushqaykiqa penqaypaqmi kaykan. Mas alimi kanman juk halagashuptiki.

³ Rumipis aqushapis lasanmi. Saypita peorraqmi mana tantiyakuq runa rabyashqan kaykan.

⁴ Rabyaq runaqa manami pitapis kuyapansu. Ajanaq runaqa kaqlantapis ushakäsinmi. Envidiösu runaqa rabyaq y ajanaq runapitapis peormi.

⁵ Wakin runaqa amïguyki karpis lutanta ruraptiki manami imatapis nishunkisu. Wakin runami isanqa ali kawanaykita munar anyapäshunki.

⁶ Jaqayänayki kaptinpis amïguyki corrigishushqaykiqa alimi kaykan. Chikishuqniki runami isanqa mana alita ruraptikipis alabashunki.

⁷ Pacha junta mikush runaqa tinyaqpa mishkintapis manami munannasu. Mikanaykaq runami isanqa iwjiq mikuytapis mishkila mikurkun.

⁸ Yurishqan markanta kachaykur purikuq runaqa qeshunta kachariykur aywakuq pishqunömi kaykan.

⁹ Mushkuq perfümi kushikuypaq kashqannömi ali amïgupa yäsikuyninpis kushikuypaq kaykan.

¹⁰ Ima problëmachöpis karqa karucho kaykaq wawqikiman aywanaykipa trukanqa amïguykiman o taytaykipa amïgunman ayway wilapänaykipaq. Karucho kaq aylluykipitaqa vecïnuykimi imachöpis jukla yanapäshunki.

¹¹ Tantiyakuq kaptikiqa kushishqami kawashaq, hïju. Saynöpami manakaqman churamaqkuna upälakuyanqa.

¹² Tantiyakuq runaqa ima peligrupitapis witikunmi. Mana tantiyakuq runami isanqa peligru kashqanta rikaykarpis jatikan. Saynöpami desgraciaman jeqakurpun.

¹³ Jäpa runapa garantian yaykuqpataqa mödanantapis prenda sariy. Say prendata sararanki jaqanta pägashqanyaq.

¹⁴ Saka sakala qayaraypa amïgunta winchikurqa runa mayinta ashliq japuymi kaykan.

¹⁵ Tamya killacho jutuq wayinömi imalapitapis rabyanaykaq warmiqa kaykan.

¹⁶ Say niraq warmitaqa wayrata sapayta mana kamäpakushqaykino y aceitita maki paltaykicho sararayta mana kamäpakushqaykinömi upälasiyta kamäpakunkisu.

¹⁷ Lïmanawan fiërruta afilaqnömi tantiyakuq runaqa runa mayinta tantiyasin.

¹⁸ Hïgusta cuidaq runaqa wayuyninta mikur kushikunmi. Patronnin nishqanta cäsukuq runapis ali rikash karmi kushikun.

¹⁹ Yakucho qaqlansita rikakushqansinömi runatapis qaqlalancho reqirkunsi imano kashqantapis.

²⁰ Wanuypis y sepultürapis manami contentakuyansu saysika runakuna pampakuyaptinpis. Saynölami wachakash runapis ajayansu imaykata shuntarpis.

²¹ Qoritapis qellaytapis ali kashqanta musyansi ninawan sulusirraqmi. Runatapis ali kashqanta musyansi ali kashqanpita alabayaptinmi.

²² Mana tantiyakuq runaqa trïguta wiruqno mayjina wiruptinpis kashlanmi kanqa.

²³ Uyshaykikunata shumaq misiy. Cabraykikunatapis shumaq rikay.

²⁴ Rïcu kaypis corönayuq kaypis päsaqla kashqannömi uywaykikunapis ushakaqla kaykan.

²⁵ Qewa chinkimur verdiyaptin y jirkakunacho achushqayki qewata qaraptikiqa

²⁶ mödanaykita ruranaykipaq uyshaykikunapis milwasapami kayanqa. Chakrata rantinaykipaqpis cabraykikuna shumaqmi mirayanqa.

²⁷ Cabraykikunapa lichinpis saysikami kanqa wayikicho kaqkunawan y arupäshuqnikikunawan upuyänaykipaq.