Proverbios 26 - Tayta Diospa Wilakuynin

¹ Usya wisan rashta mana ali kashqanno y cosëcha wisan tamya mana ali kashqannömi upa runata halagaypis alisu kaykan.

² Oqrakash chankish y oqrakash wayanïtu qeshunman mana chashqannömi jusaynaq runamanqa maldicionayashqanpis chanqasu.

³ Bozalwanmi cawalluta amansansi. Lätiguwanmi ashnuta manshuyäsinsi. Garrutiwannami mana tantiyakuq runata corriginsi.

⁴ Mana tantiyakuq runawan shimi shimi ama rimanakuysu. Rimanakurqa payno mana tantiyakuqmi kanki.

⁵ Chölu tukuq runataqa mana runa tukunanpaq sitiunman churay.

⁶ Mana yärakuypaq runata ima encargutapis encargakurqa imayka chakikita pakikuqnömi kaykanki. Say niraq runataqa rabyanänalaykipaqmi encargakunkipis.

⁷ Chankan pakish runa puriyta mana puëdishqannömi mana tantiyakuq runapis shumaq yäsiyta puëdinsu.

⁸ Warakaman rumita watashqan upa ruray kashqannömi mana tantiyakuq runata halagashqanpis kaykan.

⁹ Shinkash runa kashawan runa mayinta astashqannömi mana tantiyakuq runa yäsishqanpis kaykan.

¹⁰ Pïmaytapis lutala flëchashqan mana ali kashqannömi mana tantiyakuq runata minkakushqanpis mana ali kaykan.

¹¹ Alquqa gumitashqanta yapaymi kutipan. Saynölami mana tantiyakuq runapis jusalikuyman yapay kutin.

¹² Palangänu runaqa mana tantiyakuq runapitapis peormi kaykan.

¹³ Qela runaqa aruyta mana munarmi nin: <>.

¹⁴ Kushpilancho punku tumashqannömi qela runapis cämalancho tikrapakuskir tikrapakuskir jitaräkun.

¹⁵ Qela runaqa plätun churapakush kaykarpis hasta mikunalanpaqpis manami chaqarkunsu.

¹⁶ Qela runaqa qanchis yäsikuq runakunapitapis mas yachaq kashqantami yarpan.

¹⁷ Juk rimanakushqanman jatikarqa kanikuq alquta rinripita sariqnömi kaykan.

¹⁸ Löcu runa lutala pitapis flëchaqnömi

¹⁹ amïgunta lulapar brömapaqkunaqa kayan.

²⁰ Yanta mana kaptinqa nina upinmi. Shimi jatipäkuq mana kaptinqa rimanakuypis manami kansu.

²¹ Carbón kaptinraqmi shanshapis arqun. Yanta kaptinraqmi ninapis rupan. Shimita jatipäkuq kaptinraqmi rimanakuypis kan.

²² Tulu shimi parlashqanqa mishkinöraqmi runata gustan. Saymi wiyaqkunapa shonqunyaq chaykun.

²³ Mitu mankata qellaywan enchapaptinpis rurinpaqa kashlanmi kaykan. Saynölami yaqa runaqa ali shimilanpa parlarpis shonqunchöqa nanaparaykan.

²⁴ Runa mayinta nanaparaq runaqa ali tupaylapa parlaparpis shonqunchöqa rabyapaykanmi.

²⁵ Ali shimilanpa parlapäshuptikipis ama criyiysu. Shonqulanchöqa contrayki sharkunanpaqmi yarpachakuykan.

²⁶ Wamayäshuptikipis lapanmi musyayan rabyapaykäshushqaykita.

²⁷ Runa mayin jeqananpaq uchkuta uchkurqa kikinmi sayman jeqanqa. Runa mayinta nitinanpaq rumita churapaptinqa kikintami nitinqa.

²⁸ Lulakuq runaqa mana lulakuqkunata chikinmi. Atuqyapaq runaqa pitapis rabyanäsinmi.