Proverbios 25 - Tayta Diospa Wilakuynin

Salomón yachasishqan wakin proverbiukuna

¹ Kay qelqashqankunapis rey Salomón nishqan proverbiukunami kaykan. Kay proverbiukunatami Judá nacioncho rey Ezequíaspa yanapaqninkuna shuntaykur qelqayarqan.

² Runa mana tantiyashqankunataqa Tayta Diosmi musyan. Runakuna mana tantiyayaptinpis reyqa yarpachakur tantiyanmi.

³ Jana pasapa altuynin mayyaq kashqanta, pasapa rurin mayyaq kashqanta y rey imata yarpashqantapis manami pipis musyansu.

⁴ Qellayta sulurkasir qanrata jorquskirmi say qellaypita kuyaylapaq cöpata rurayan.

⁵ Saynölami mana ali runata qarquskirqa rey jawkana mandanqa.

⁶ Reypa nawpancho ama yachaq tukuysu. Mayor runakuna jamakuyänanmanqa ama jamakuysu.

⁷ Saypa trukanqa qayashuptikiraq paykuna jamaräyashqanman jamakunki. Mayor runakuna rikaykäyaptin jorqushuptiki pasaypa penqaytukushqami yarqunkipaq.

⁸ Imatapis manaraq shumaq musyarqa autoridäkunaman ama wilaq aywaysu. Jukla wilaptikiqa qepaykita shamuq runa jukno niptin manami ima niytapis kamäpakunkipaqsu.

⁹ Contrayki sharkuqwan rimanakurpis cuidä pipis confianza wilapäshushqaykita parlaykankiman.

¹⁰ Wilapaptikiqa penqaymanmi churashunkipaq. Saynöpami malafämacho quëdanki.

¹¹ Shumaq tantiyaykur tiempulancho ali parlashqaykiqa qellaywan adornash qori manzänanömi kaykan.

¹² Tantiyakuq runapaqqa yachaq runa yäsishqan kaykan qoripita rurash sortïjano y qoripita rurash walqanömi.

¹³ Shanaptin alaq yakuta upur yakunash runa kushikushqannömi propiu yärakuypaq kaptin kachaqnin kushikun.

¹⁴ Wayra purisishqan usya pukutay japuymi imatapis qaraykunanpaq promitirkur mana cumpliq runaqa kaykan.

¹⁵ Pacienciakuq runaqa rabyash kaykaqtapis kushisinmi. Shakya shakyala parlaqkunaqa contrantapis tantiyasinmi.

¹⁶ Abëjapa mishkinta tarirqa aläpa ama mikunkisu. Aläpa mikurqa gumitankipaqmi.

¹⁷ Amïguyki kaptinpis cadalaqa ama aywaysu. Cadala aywaptikiqa ajayäshunkipaqmi.

¹⁸ Garrutino, cuchilluno y flëchanömi amïgunpa contran parlaqkunaqa kayan.

¹⁹ Lakikuycho kashqayki höra traicionëru runaman ama yärakuysu. Payman yärakurqa chakiki pakish kaykaqno y kiru nanaywan kaykaqnömi kaykanki.

²⁰ Lakish kaykaqta ama cantapaysu. Payta cantaparqa qeriman kachita winaqno y alaycho mödananta loqtipaqnömi kaykanki.

²¹ Chikishuqniki mikanaptinqa mikuyta qaraykuy. Yakunaptinqa yakuta makyaykuy.

²² Sayno rurashqaykipita Tayta Diosmi pägashunki. Chikishuqniki runami isanqa pasaypa penqakunqa.

²³ Norti kaqläpita wayrämuptinqa imaypis tamyanmi. Saynölami runa mayinpa contran parlaptin pipis rabyanan.

²⁴ Rabyashla warmiwan kuyaylapaq wayicho tashqanpa trukanqa mas alimi kaykan suklalachöpis jawka täkushqan.

²⁵ Pasaypa yakunaykaqpaq yaku kushikuypaq kashqannömi karu markapita apamushqan ali wilakuypis kushikuypaq kaykan.

²⁶ Chuya yakuman puchka yaku talukashqannömi jusaynaq runa jusalikuq runakunawan talukashqan kaykan.

²⁷ Aläpa mishkita mikuptiki däñashushqaykinömi runakuna aläpa alabayäshushqaykipis mana ali kaykan.

²⁸ Murällaynaq marka peligrucho kashqannömi geniunta controlakuyta mana puëdiq runapis peligrucho kaykan.