Proverbios 22 - Tayta Diospa Wilakuynin

¹ Qellayyuq y qoriyuq kaypitapis mas ali kaykan pïmaypitapis ali rikash kaymi.

² Rïcutapis pobritapis Tayta Diosmi kamash.

³ Shumaq yarpachakuq runaqa ima peligrupitapis cuidakunmi. Mana yarpachakuq runami isanqa desgraciaman chan.

⁴ Tayta Diosta mansapakuq humildi runaqa rïcuyanqami, pïmaypitapis ali rikashqami kanqa y ali kawaytami tarinqa.

⁵ Yaqa runataqa ima desgraciapis päsanmi. Ali runaqa saykunapita witikunmi.

⁶ Wamrataqa wamra kashqanyaqla ali kawananpaq shumaq yachasiy. Yachakushqantaqa yäpayarpis manami qonqanqasu.

⁷ Pobrikunataqa rïcumi munaynincho sararan. Jaqa yaykuqtaqa prestaqninmi munaynincho sararan.

⁸ Yaqa runaqa jusalikushqanpitami nakanqa. Say niraq runataqa Tayta Diosmi rabyashpan ushakäsinqa.

⁹ Pobrikunata kuyapar milqapaqkunaqa bendiciontami chaskiyanqa.

¹⁰ Pendenciëru runata qarquriptikiqa manami chikinakuy, rimanakuy ni ashlinakuypis kanqanasu.

¹¹ Rasun kaqlata parlaq runataqa rey kuyanmi. Gracialanwan parlaq runaqa reypa amïgunmi kaykan.

¹² Tantiyakuq runataqa Tayta Dios imapitapis sapanmi. Lulakuqtami isanqa pasaypa penqayman churan.

¹³ Qela runaqa aruyta mana munarmi nin: <>.

¹⁴ Runanta qanrataq warmipa waylukuyninqa pasapa shiminnömi mansariypaq kaykan. Say warmiwan punuq runaqa Tayta Diostami rabyanäsin.

¹⁵ Mana wiyakuq karmi lutankunata wamra ruran. Sayno kaqkunaqa astaptinraqmi wanakuyan.

¹⁶ Rïcuyänan kash pobrita engañar o rïcuman qaraykunata aparqa muchuymanmi chanqa.

Tantiyakuq runakunapa kimsa chunka (30) yachasikuyninkuna

¹⁷ Tantiyakuq runakuna yäsiyäshushqaykita chaskikuy. Paykuna tantiyasiyäshushqaykinöla imatapis ruray.

¹⁸ Yachasishushqaykita imaypis yarparanki. Saymi pitapis wilapänaykipaq imay hörapis listu kaykanki.

¹⁹ Tayta Diosman imaypis yärakunaykipaq yäsishayki.

²⁰ Saymi kimsa chunka (30) yachasikuykunata qampaq qelqaykä. Saychömi kaykan yäsikuykuna y tantiyasikuykuna.

²¹ Saykunata yachakurmi ali tantiyakuq kankipaq. Saymi pipis tapukushuptiki shumaq yäsinkipaq.

1

²² Pobri kashqanta rikaykar pitapis ama suwapankisu. Pïninpis mana kaqkunata juezpa nawpancho ama tumpankisu.

²³ Tayta Diosmi pobrikunapa favornin sharkunqa. Pobrikunata qechuqkunataqa kikintami pobriyäsinqa.

2

²⁴ Yaqa runawan y rabyaq runawanqa ama shuntakankisu ni amïgutapis rurankisu.

²⁵ Paykunawan shuntakarqa mana ali costumbrinkunatami yachakunkipaq. Paykunano kawarqa kunkaykita jurcaman jatiqnömi kaykanki.

3

²⁶ Pipapis garantian ama yaykunkisu.

²⁷ Say jaqata päganaykipaq mana kaptinqa cämaykitapis qechushunkipaqmi.

4

²⁸ Unay aylluykikuna lindëru churashqanta ama witisinkisu.

5

²⁹ Ali arukuq runaqa mandaqkunapa yanapaqninmi kanqa. Manami común runakunapa munayninchösu kanqa.