Proverbios 21 - Tayta Diospa Wilakuynin

¹ Mayu maypa aywananpaqpis kamakäsishqannömi reypa yarpayninkunatapis Tayta Dios kamakäsin.

² Runaqa yarpan lapan rurashqan ali kashqantami. Sayno kaptinpis Tayta Diosmi musyaykan rasunpaypa ali yarpaywan o mana ali yarpaywan rurashqantapis.

³ Sacrificiuta rupasishqaykipa trukanqa mas ali kaykan Tayta Dios munashqanno runa mayikiwan ali kawashqaykimi.

⁴ Jusami kaykan runa mayinta nanaq nawinpa rikapashqan, yachaq tukushqan y lutankunata yarpashqan.

⁵ Imatapis shumaq yarpachakuykur ruraptinqa alimi kanqa. Mana yarpachakuypa imatapis lutala ruraptinmi isanqa mana ali kanqa.

⁶ Runa mayinta engañaypa rïcuyashqanqa qoshtaynömi elaqanqa. Sayno rurashqanpita kikinpis ushakanqami.

⁷ Mana kuyapäkuq kashqanpitami yaqa runaqa ushakanqa. Runa mayinta nakasishqanpitami kikinpis nakanqa.

⁸ Yaqa runapa kawakuyninqa wiksu qerunömi kaykan. Ali runapa kawakuyninmi isanqa shututu qeruno kaykan.

⁹ Rabyashla warmiwan kuyaylapaq wayicho tashqanpa trukanqa mas alimi kaykan suklalachöpis jawka täkushqan.

¹⁰ Yaqa runaqa imaypis mana alita ruranalanpaqmi yarpachakun. Say runapaqa kuyapäkuyninpis manami kansu.

¹¹ Mana tantiyakuq runaqa shimisapa runata castigaqta rikakurraqmi tantiyakun. Tantiyakuq runami isanqa yäsishlanwan tantiyakun.

¹² Tayta Dios rikaykanmi lutan ruraq runa wayincho imano kawashqantapis. Saymi ima desgracia päsananpaqpis kachapariykun.

¹³ Pobrikuna manakuyaptin mana kamaripaq kaqtaqa manami Tayta Diospis cäsupanqasu.

¹⁴ Fiyupa rabyash kaykaqta pakaylapa imalatapis qaraykurqa rabyanayninta päsakäsinmi.

¹⁵ Ali runaqa autoridäkuna shumaq arreglayaptin kushikunmi. Yaqa runami isanqa pasaypa mansakan.

¹⁶ Tantiyakuq kananpa trukan lutankunata ruraq runaqa manaraqpis aykätami ushakanqa.

¹⁷ Fiestalacho, upyalacho y perfümilacho imaykantapis ushaq runaqa manami imaypis rïcuyanqasu.

¹⁸ Lulakuq y shimi jatipäkuq runataqa ali runapa contran sharkushqanpita kikintami ima desgraciapis päsanqa.

¹⁹ Malgeniu y yaqa warmiwan tänanpa trukanqa mas alimi kaykan japala täkuptin.

²⁰ Tantiyakuq runapa wayinchöqa imayka riquëzapis y perfümikunapis kanmi. Mana tantiyakuq runami isanqa tarishlantapis lapanta ushakurkun.

²¹ Shumaq tantiyakuq y kuyakuq runaqa ali kawaytami tarinqa. Saymi pïmaypis payta respitan.

²² Ali tantiyakuq runaqa aska soldäduyuq markatapis munayninmanmi churan. Sayno churan pipis mana vincinanpaq kashqanta yarpaykäyaptinmi.

²³ Lutala mana parlakuq runataqa manami imapis päsansu.

²⁴ Runa mayinta manakaqman churaq runataqa yachaq tukuq, orgullösu y respëtuynaq kashqantami niyan.

²⁵ Qela runaqa arukuyta mana munarmi mikanaypita wanun. Ruyru maki karmi arukuyta mansan.

²⁶ Say runaqa kikilanpaq yarpachakuykarmi qoyarkun. Ali runami isanqa runa mayinta imalatapis kushish qaraykun.

²⁷ Yaqa runakunapa ofrendantaqa Tayta Dios manami chaskinsu. Paykunaqa ofrendata apayan Tayta Dios yanapänan kashlami.

²⁸ Rantiy testïgu parlashqantaqa manami pipis chaskinsu. Ali testïgu parlashqantami isanqa pïmaypis chaskin.

²⁹ Yaqa runaqa runakuna rikayänalanpaqmi ali tukun. Ali runami isanqa rasunpaypa alilata ruran.

³⁰ Tayta Diosta mana cäsukuptinqa yachaq kashqanpis, tantiyaq kashqanpis ni yäsikuq kashqanpis manami välinsu.

³¹ Guërraman aywaq runaqa cawalluntapis shumaqmi kamarikun. Kamarikuptinpis Tayta Dios yanapaptinraqmi contrankunata vincin.