Proverbios 20 - Tayta Diospa Wilakuynin

¹ Vïnuta upyakurkurqa wajukunmi. Shinkash runaqa pelyatami ashin. Say runaqa mana tantiyakuq karmi lutanta ruran.

² Rey rabyashqanqa león qaparashqannömi mansariypaq kaykan. Sayno kaykaqtaqa wanuyta ashilarmi pipis wajupanqa.

³ Mana rimanakuq runaqa pïmaypitapis respitashqami kanqa. Mana tantiyakuq runaqa lutalami piwanpis tinkuypa tinkun.

⁴ Qela runaqa murupakuy wisan manami arukunsu. Saymi cosëcha wisan mayjina ashirpis tarinsu.

⁵ Jundu mayucho ima kashqanpis mana rikakashqannömi runa imata yarpashqanpis musyakansu. Sayno kaptinpis tantiyakuq runami isanqa runa imata yarpaykashqantapis tantiyan.

⁶ Askaqmi yarpäyan ali runa kayashqanta. Sayno kaptinpis rasunpaypa yärakuypaq runataqa ¿piraq tarinman?

⁷ Taytan ali runa kaptinqa surinkunapis kushishqami kawayanqa.

⁸ Reyqa juzgananpaq trönunman jamashpan mayqan jusayuq kashqantapis juklami tantiyaskin.

⁹ Manami pipis ninmansu: <>.

¹⁰ Pësuwan y tupuwan engañaptinqa Tayta Dios fiyupami rabyanan.

¹¹ Ali maqta kashqanta reqinsi yanapäkuq y respitösu kaptinmi.

¹² Rikananpaq nawita y wiyananpaq rinritapis Tayta Diosmi kamash.

¹³ Paqasta junaqta punurqa pasaypami pobriyankipaq. Arukuptikiqa mikuynikipis pusuy pusuymi kanqa.

¹⁴ Rantinan kashlami baratyan. Barätulacho rantiskirnami kushikun.

¹⁵ Tantiyakuq runa parlashqanqa aska qoripitapis y saysika alhäjakunapitapis mas alimi kaykan.

¹⁶ Jäpa runata garantizaqtaqa mödanantapis prenda sariy jaqanta pägashqanyaq.

¹⁷ Lulapaypa sakyaq runaqa jinan höra kushikurpis waray warayninkunaqa problëmachömi kanqa.

¹⁸ Yäsikuqkuna tantiyashqanta chaskikuqkunaqa imatapis shumaqmi rurayan. Guërrachöpis vinciyan shumaq yarpachakuykur pelyarraqmi.

¹⁹ Tulu shimiqa juklami pitapis wilapärin. Sayno kaqkunawanqa ama shuntakäyaysu.

²⁰ Mamanta y taytanta maldicionaq kaqqa fiyupa nakarmi wanunqa.

²¹ Mana nakaylapa rïcuyashqanqa fäcilmi ushakanqa. Ushakäpakuskirqa lakishqami puriykanqa.

²² Venganzata ruranaykipaqqa ama yarpaysu. Saypa trukanqa Tayta Diosman yärakuy. Paymi imapitapis sapäshunki.

²³ Pësunwan y balanzawan engañaptinqa Tayta Dios fiyupami rabyan.

²⁴ Runa imano kawananpaqpis Tayta Diosmi kamakäsin. Pipis manami musyansu waray warantin imano kawananpaq kashqantapis.

²⁵ Tayta Diosta promitirkur cuidätaq cumplinkimansu. Mana cumpliptikiqa juzgashunkipaqmi.

²⁶ Tantiyakuq reyqa yaqa runakunata qarqunmi. Paykunataqa chipyaqmi ushakäsin.

²⁷ Runapa shonqun alita o mana alita yarpashqantapis Tayta Dios musyanmi.

²⁸ Rey kuyapäkuq y rasun kaqlata parlaq kaptinqa pipis manami trukasiyta munansu.

²⁹ Maqtakunaqa kalpayuq karmi kushikuyan. Awkinkunaqa tantiyakuq karmi kushikuyan.

³⁰ Jusalikur kawaq runaqa astaptinraqmi jusalikuyta kacharin. Castigaptinraqmi lutanta ruraykashqanta tantiyakun.