Proverbios 2 - Tayta Diospa Wilakuynin

Tantiyakuq kar ali kawanansipaq nishqan

¹ Nishqäkunata shumaq wiyakuy, hïju. Mandamientükunata imaypis yarparay.

² Tantiyakuq kanaykipaq wiyakuy. Yachaq kanaykipaq yarpachakuy.

³ Cäsukuq kanaykipaq lapan shonquykiwan manakuy.

⁴ Qellaytawan qorita ashishqaykino tantiyakuq kayta ashiy.

⁵ Saynöpami Tayta Diosta reqir payta mansapakunaykipaq tantiyakunki.

⁶ Tantiyakuq kanaykipaqqa Tayta Diosmi yachayta qoshunki. Paypitaraqmi tantiyakuytapis y yachaytapis chaskinki.

⁷ Pay munashqanno kawaqkunataqa imapitapis sapanmi. Alita rurar kawaqkunataqa yanapanmi.

⁸ Payta cäsukuqkunataqa imaypis cuidanmi. Paylaman yärakuqkunataqa imaypis rikanmi.

⁹ Saynöpami ali kaqta y mana ali kaqtapis tantiyankipaq. Saynöpis alcäbulami kanki ali kaqkunata ruranaykipaq.

¹⁰ Tantiyakuq y yarpayyuq karmi kushish kawankipaq.

¹¹ Yarpayyuq karqa lutan ruraykunaman manami jatikankipaqsu. Tantiyakuq kaynikimi mana alikunapita sapäshunki.

¹² Tantiyakuq karqa manami jusalikunkipaqsu ni engañakuq runakunapis criyisiyäshunkipaqsu.

¹³ Say runakunaqa alita rurayänanpa trukan mana ali ruraykunalamanmi uman churakash kaykäyan.

¹⁴ Jusalikuskirpis seqaypami kushikuyan. Mana alita rurarkurpis taqlapänakuyanraqmi.

¹⁵ Imaypis lutanta ruralarmi puriyan. Alita rurayänanpa trukanqa manakaqkunata ruralarmi kawayan.

¹⁶ Tantiyakuq karqa runanta qanrataq warmipitapis witikunkipaqmi. Jeqchikachar parlapäshuptikipis manami cäsupankipaqsu.

¹⁷ Say niraq warmiqa jipashlanpita tashqan runantapis chankariykurmi munashqanno purikun. Sayno karmi runanta imaypis respitananpaq Tayta Diosta promitishqantapis qonqaykun.

¹⁸ Say niraq warmiwan jatikarqa wanuytami tarinkipaq.

¹⁹ Say warmiwan kakuqkunaqa ali kawayta manami imaypis tariyanqasu.

²⁰ Hïju, Tayta Dios munashqanno kawaq runakunata rikakushpayki paykunano kaway.

²¹ Mana jusalikuq runakunaqa Tayta Dios entregashqan nacioncho aska watami jawkala kawayanqa.

²² Fiyu runakuna y Diosta promitirkurpis mana cumpliqkunami isanqa elaqpita wanuyanqa.