Proverbios 19 - Tayta Diospa Wilakuynin

¹ Tumpakuq y mana tantiyakuq runapitaqa mas ali kaykan pobrila karpis respitash kashqanmi.

² Mana yarpachakuypa imatapis ruraptikiqa mana alimi kanqa. Imatapis apurä rurarqa mana alitami ruraykanki.

³ Mana tantiyakuq runaqa imatapis lutantami ruran. Nirkurmi Tayta Diosta jitapan.

⁴ Rïcu runaqa aska amïguyuqmi kaykan. Pobri runapitaqa amïgunpis witikunmi.

⁵ Rantiy testïguqa castigashqami kanqa. Lulakuq runaqa manami castïgupita qeshpinqasu.

⁶ Yanapäkuq runataqa pïmaypis manakunmi. Paywanqa pïmaypis amïgu kaytami munan.

⁷ Pobri runata wawqinkunapis ajayaykaptinqa rasuntachir amïgunkunapis cäsuyansu. Parlarkunalanpaqpis manami pïninpis kansu.

⁸ Yachakushqanno kawaq runaqa kushishqami kawan. Say runapaqqa bendición kanqami.

⁹ Rantiy testïguqa castigashqami kanqa. Lulakuq runataqa wanuyninraqmi apanqa.

¹⁰ Mana tantiyakuq runa imaykayuqpis rikakushqanqa manami conviëninsu. Saynölami conviëninsu ashmay runa mayor runakunapa mandaqnin kashqan.

¹¹ Tantiyakuq runaqa imapitapis manami rabyanansu. Wajupaptinpis manami wiyaq tukunsu.

¹² León qaparashqan mansariypaq kashqannömi rey rabyakushqanpis mansariypaq kaykan. Kuyapäkuyninmi isanqa qewakuna janancho shulyano kushikuypaq kaykan.

¹³ Mana tantiyakuq maqtaqa taytantami lakikasin. Runanta rabyanäsiq warmiqa jutuq wayinömi kaykan.

¹⁴ Runaqa papäninpitami wayita y ima herenciatapis chaskin. Ali yarpayyuq warmitaqa Tayta Diospitaraqmi tarin.

¹⁵ Qela runaqa mana ajayaypami punukun. Sayno karmi muchuylacho kawanqa.

¹⁶ Tayta Diospa mandamientunkunata cäsukuq runaqa alimi kawanqa. Tayta Dios nishqanta mana cäsukuq runami isanqa wanunqa.

¹⁷ Pobrikunata yanaparqa Tayta Diosta prestaqnölami qoykun. Sayno yanapaqtaqa Tayta Diosmi kutisin.

¹⁸ Wamra kashqanyaqla surikita shumaq corriginki. Mana corrigishqaykipita lutanta rurar wanuptinqa qammi cuentayuq kankipaq.

¹⁹ Aläpa rabyakuq runaqa castigashqami kanqa. Mana castigayaptinqa mas peormi mana alikunata ruranqa.

²⁰ Anyapäshushqaykita wiyakuy. Corrigishuptiki chaskikuy. Chaskikurqa tantiyakuqmi kankipaq.

²¹ Ali kawayta munarmi runaqa tukuyta yarpachakun. Sayno kaptinpis Tayta Dios kamakäsiptinraqmi yarpashqanno kamakan.

²² Promitishqanta cumpliq runamanqa pipis yärakunmi. Lulakunanpa trukanqa mas ali kaykan pobrila karpis rasun kaqlata parlashqanmi.

²³ Tayta Diosta mansapakuq runaqa alimi kawan. Say runa jawkala kawarmi ima problëmamanpis jatikansu.

²⁴ Qela runaqa plätun churapakush kaykarpis hasta mikunalanpaqpis manami chaqarkunsu.

²⁵ Mana tantiyakuq runaqa shimisapa runata castigaqta rikakurraqmi tantiyakun. Tantiyakuq runami isanqa yäsishlanwan tantiyakun.

²⁶ Taytanta suwapaq runapaqa manami penqakuyninpis kansu. Mamanta wayinpita qarquq runapaqa manami yawarninpis kansu.

²⁷ Hïju, anyapäshushqaykita mana chaskikurqa mana tantiyakuq runami kanki.

²⁸ Lulakuq testïguqa jueztapis mana mansapaypami lulapan. Yaqa runaqa shimin tarishqantami imaykatapis parlan.

²⁹ Shimisapa runataqa wiruypami castigayan. Mana wiyakuq runataqa astaypami castigayan.