Proverbios 17 - Tayta Diospa Wilakuynin

¹ Ali alilata mikurpis chikinakur kawashqanpitaqa mas ali kaykan yakuta upularpis kuyanakur kawashqanmi.

² Tantiyakuq ashmaytami patronnin churan mana cäsukuq surinta rikananpaq. Say ashmaymi patronninpa surinkunawan herenciata rakipänakuyanqa.

³ Rasunpaypa qori kashqanta y qellay kashqanta musyananpaq ninawanmi sulusin. Saynölami runapa yarpaynin ali kashqanta o mana ali kashqantapis musyananpaq Tayta Dios pruëbaman churan.

⁴ Yaqa runaqa yaqa mayin yäsishqantami chaskipan. Lula runapis lula mayin nishqantami chaskipan.

⁵ Pobrikunata manakaqman churarqa kamakuq Tayta Diostami manakaqman churan. Runa mayinta desgracia päsaptin kushiparqa castigashqami kanqa.

⁶ Wilkankunaqa awilukunapa corönanmi kaykan. Maman taytan kawaptin wamrankuna kushikuyanmi.

⁷ Mana tantiyakuq runa yachaq tukur parlashqan penqaypaq kashqannömi autoridä lulakushqan penqaypaq kaykan.

⁸ Ashäkuy jatipayta yachaqkunaqa pïmaytapis awnisiyanmi. Saymi imatapis munashqanta tariyan.

⁹ Perdonakuq karqa amïgutapis tarinmi. Mana perdonakuq karmi isanqa amïguntapis oqran.

¹⁰ Tantiyakuq karqa anyapaptin chaskikunmi. Mana tantiyakuq karmi isanqa mayjina astaptinpis chaskikunsu.

¹¹ Yaqa runaqa piwanpis pelyalatami ashin. Jina kaqtami kalpasapa runa yurirkur kikinta qokachärin.

¹² Mana tantiyakuq rabyash runaqa wawan oqrash ukumaryapitapis mas mansaypaqmi kaykan.

¹³ Mal agradecïdu runataqa ayllunkunatawanmi desgraciala päsanqa.

¹⁴ Pelya ashiq runaqa loqla aywaqnömi kaykan. Wajupaptinpis witikushqanmi mas ali kaykan.

¹⁵ Jusalikuqta castigananpa trukan jusaynaqta castigaptin Tayta Dios rabyananmi.

¹⁶ ¿Imapaqtaq välin mana tantiyakuq runa qellayyuq kashqanpis? Aska qellayyuq karpis yachaytaqa manami rantiyta kamäpakunsu.

¹⁷ Ali amïguqa imaypis amïgunta manami kacharinsu. Ima nakaycho kaptinpis wawqintanömi yanapan.

¹⁸ Mana tantiyakuq runaqa pipapis garantianmi yaykun. Mana pägaptinqa garantizaqmi pägapakun.

¹⁹ Runa mayinta wajupaq runaqa pelyalatami ashin. Shimisapa runaqa shimilanpitami maqaytukun.

²⁰ Lutanta rurananpaq yarpachakuq runaqa manami imaypis ali kawayta tarinsu. Lulakuqtaqa imaypis desgraciami päsan.

²¹ Surin mana tantiyakuq kaptinqa taytan lakikunmi. Lutan ruraq kaptinqa rabyananmi.

²² Kushish kawaq runaqa manami qeshyansu. Lakish kawaq runami isanqa qeshyalata misin.

²³ Yaqa runaqa pakaylapami chaskipakun. Nirkurmi jusalikuqpa favornin sharkun.

²⁴ Tantiyakuq runaqa yachaq kananpaqmi yarpachakun. Mana tantiyakuq runami isanqa yachakunanpaq yarpachakunsu.

²⁵ Mana tantiyakuq wamraqa taytantami rabyanäsin y mamantapis lakikasinmi.

²⁶ Manami alisu kaykan jusaynaq runata castigashqan. Saynöpis manami alisu kaykan respitash runata astashqan.

²⁷ Shumaq tantiyakuq runaqa manami aläpa parlakunsu. Yachaq runaqa ima kaptinpis upälakunmi.

²⁸ Mana tantiyakuq runapis upälakuptin y pacienciakuptinqa tantiyakuq kashqantami yarpäyan.