Proverbios 16 - Tayta Diospa Wilakuynin

¹ Imata rurananpaqpis runaqa yarpachakunmi. Mayjina yarpachakuptinpis Tayta Dios kamakäsiptinraqmi imapis kamakan.

² Runaqa imata rurarpis alita ruraykashqantami yarpan. Sayno kaptinpis Tayta Diosmi musyaykan ali yarpaywan o mana ali yarpaywan rurashqantapis.

³ Ima ruraytapis yarparqa yanapäshunaykipaq Tayta Diosta manakuy. Sayno manakuptikiqa yarpashqaykikuna kamakanqami.

⁴ Yarpashqanno kananpaqmi lapantapis Tayta Dios kamash. Yaqa runatapis kamash juzganan junaqcho castigananpaqmi.

⁵ Runa tukuqkunaqa manami Tayta Diospa shonqunpaqnösu kaykan. Paykunataqa imay junaq karpis castiganqami.

⁶ Rasunpaypa kuyakuq karqa jusalikuqkunata perdonanmi. Tayta Diosta mansapakurmi jusalikuypita witikun.

⁷ Contrankunawanpis perdonanakur ali kawayänanpaqmi munashqanno kawaqkunata Tayta Dios yanapan.

⁸ Suwakuypa rïcuyashqanpa trukanqa mas ali kaykan arukur ichiklatapis gänashqanmi.

⁹ Runa imano kawananpaq yarpachakuptinpis Tayta Dios permitiptinraqmi yarpashqanno kamakan.

¹⁰ Reytaqa ali parlananpaq Tayta Diosmi tantiyasin. Pitapis juzgarqa Tayta Dios munashqannölami juzgan.

¹¹ Pësuwan o tupuwan karpis complëtuta rantikunantami Tayta Dios munan. Pësuwan y tupuwan engañaqkunataqa paymi juzganqa.

¹² Ali juzgaptinqa reypa favorninmi runakuna kaykäyan. Saymi reyqa pipis jusalikuptin mana kuyapaypa castigan.

¹³ Pipis rasun kaqlata parlaptinqa rey kushikunmi. Mana lulakuypa parlaq runataqa kuyanmi.

¹⁴ Rey rabyaptinqa runakuna yarpäyan pitapis wanusinanpaq kashqantami. Tantiyakuq runakunaqa imaykanöpapis kushikasiyanmi.

¹⁵ Rey kushish kaptinqa pipis kushikunmi. Rey yanapashqanqa murupakuy tiempu tamyanömi kaykan.

¹⁶ Tantiyakuq kaymi qoripitapis mas ali kaykan. Yachaq kaymi qellaypitapis mas ali kaykan.

¹⁷ Ali runaqa jusalikuypita witikunmi. Jusalikuyta kachariqkunaqa wanuypitapis qeshpinmi.

¹⁸ Runa tukuqtaqa desgraciami päsanqa. Orgullösuqa fracasanqami.

¹⁹ Rïcuyayta munar orgullösukunawan shuntakashqan manami alisu. Saypa trukanqa mas alimi kanman pobrikunawan qollmi shonqu kawashqan.

²⁰ Yachasikuyta cäsukurqa alimi kawanqa. Tayta Diosman yärakurqa kushishqami kawanqa.

²¹ Tantiyakuq runataqa yachaq kashqantami niyan. Ali shimilanpa parlaq runaqa pitapis shumaqmi yachasin.

²² Shumaq tantiyakuq runaqa alimi kawan. Mana tantiyakuq runataqa walälami pipis tantiyasin.

²³ Tantiyakuq runaqa shumaq tantiyakuykurmi parlan. Pay yäsishqantaqa runakuna chaskikuyanmi.

²⁴ Pipis ali shimilanpa parlashqanqa abëjapa mishkinnömi kaykan. Sayno parlarmi pïmaytapis shakyäsin.

²⁵ Wakin runaqa lutanta rurarpis alita ruraykashqantami yarpan. Saynöla kawarqa wanuymanmi chanqa.

²⁶ Nisidächo kaq runaqa ima aruymanpis yaykunmi. Muchuycho kawayta mana munarmi arukun.

²⁷ Yaqa runaqa lutanta rurananpaqmi yarpachakun. Imata parlashqanpis ninanömi kaykan.

²⁸ Yaqa runaqa pïmaytapis rimanakasirmi purin. Wilapishtakunaqa anaw kawakuqkunatapis chikinakasinmi.

²⁹ Yaqa runaqa amïguntapis lulapanmi. Ali kawaptinpis lutan ruraymanmi jitarpun.

³⁰ Lutan rurayta yarpaq runaqa nawilanwanmi yäsir qemsipan. Jusalikuskirnaqa upälami umpuraykan.

³¹ Lutankunata mana ruraypa kawarqa soquyashqanyaqmi runa kawan. Saymi soquyash runaqa respitaypaq kaykan.

³² Ali chölu kashqanpitapis pacienciakuq kashqanmi mas ali kaykan. Markata dominananpa trukanqa kikinpa geniunta dominakushqanmi mas ali kaykan.

³³ Imata rurananpaqpis wakinqa suertitaraqmi jitan. Sayno kaptinpis Tayta Dios permitiptinraqmi imapis aliqa kamakan.