Proverbios 15 - Tayta Diospa Wilakuynin

¹ Mayjina rabyash kaptinpis ali shimilanpa parlaparqa rabyayninta päsasinmi. Shimi shimi qayapänakurmi isanqa fiyupa ajanäsinakuyman chäyan.

² Tantiyakuq runa parlaptinqa wiyaqkuna shumaqmi yachakuyan. Mana tantiyakuq runaqa shimin tarishqantami imatapis lutala parlan.

³ Tayta Dios maysaychöpis karmi runakuna alita y mana alita rurayashqantapis rikaykan.

⁴ Shakya runaqa runa mayinta kushikasinmi. Ayaq shiminpa parlaq runami isanqa pïmaytapis jaqayäsin.

⁵ Mana tantiyakuq maqtaqa papänin yäsishqanta manami chaskikunsu. Tantiyakuq maqtami isanqa anyapashqanta chaskikun.

⁶ Ali runapa wayinchöqa imaykanpis pusuy pusuymi. Yaqa runapaqa ima tarishlanpis manakaqnölami ushakan.

⁷ Tantiyakuq runaqa pïmaytapis ali kaqkunatami tantiyasin. Mana tantiyakuq runaqa ali kaqkunata tantiyasinanpaq manami yarpaylapis yarpansu.

⁸ Yaqa runapa ofrendantaqa Tayta Dios manami chaskinsu. Ali runa manakushqantami isanqa kushish chaskin.

⁹ Yaqa runataqa Tayta Dios manami rikaytapis munansu. Pay munashqanno kawaq runatami isanqa kuyan.

¹⁰ Lutanta ruraqqa castigashqami kanqa. Corrigiptinpis mana wanakurqa ushakanqami.

¹¹ Tayta Dios musyanmi wanuqpa alman maycho kashqantapis. Saysuraq musyanmansu runakunapa shonqun imata yarpashqantapis.

¹² Respëtuynaq runaqa pï corrigiptinpis rabyakunmi. Tantiyakuq runawanqa manami shuntakayta munansu.

¹³ Shonqun kushish kaptinqa qaqlanpis asikyarkunmi. Lakish kaptinmi isanqa qaqlanpis jukaqyash kaykan.

¹⁴ Tantiyakuq runaqa imaykanöpapis mas tantiyakuq kaytami munan. Mana tantiyakuq runami isanqa manakaqkunata parlar kushikun.

¹⁵ Jaqayash runapaqqa mayqan junaqpis manami alisu kaykan. Kushish kawaq runapaqmi isanqa lapan junaqpis ali kaykan.

¹⁶ Riquëzapaq yarpachakur kawashqanpa trukanqa mas ali kaykan pobrila karpis Tayta Diosta mansapakur kawashqanmi.

¹⁷ Wera wäkata mikurpis chikinakur kawaypitaqa mas ali kaykan santu calduta upularpis kuyanakur kawaymi.

¹⁸ Jukla rabyaq runaqa piwanpis tinkuypami tinkun. Mana rabyakuq runami isanqa piwanpis rimanakunsu.

¹⁹ Qela runapaqqa ima ruraypis kasha kasha näninömi kaykan. Arukuq runapaqmi isanqa ima ruraypis pisash nänino kaykan.

²⁰ Wamran tantiyakuq kaptinqa maman taytan kushikuyanmi. Mana tantiyakuq kaptinmi isanqa penqakuyan.

²¹ Mana tantiyakuq runaqa lutanta ruraykurpis kushikunmi. Tantiyakuq runami isanqa pantaykurpis yarpachakurir wanakun.

²² Yäsikuqkunata mana tapukuypa imatapis ruraptinqa manami yarpashqannösu kanqa. Yäsikuqkunata tapukuykur ruraptinmi isanqa ali kanqa.

²³ Tapukushqanta shumaq tantiyasirqa kushikunmi. Tiempulancho yäsishqanqa alimi kaykan.

²⁴ Tantiyakuq runaqa ali kawaytami tarin. Saynöpami wanuypitapis salvakun.

²⁵ Runa tukuqkunapa wayintaqa Tayta Diosmi ushakäsin. Viüdakunapataqa chakrankunatapis shumaqmi rikan.

²⁶ Yaqa runa yarpashqankunataqa Tayta Dios melananmi. Ali runa parlaptinmi isanqa kushikun.

²⁷ Kikilanpaq imatapis munaq runaqa ayllunkunawan chikinakurmi kawan. Mana chaskipakuq runaqa jawkalami kawan.

²⁸ Ali runaqa shumaqraqmi yarpachakun imata ninanpaqpis. Yaqa runami isanqa shimin tarishqanta imatapis parlan.

²⁹ Yaqa runa manakushqantaqa Tayta Dios manami cäsupansu. Ali runa manakushqantami isanqa wiyan.

³⁰ Kushish kaykaqta rikarqa pipis kushikunmi. Ali wilakuyta wiyaptinqa shonqunpis asikyarkunmi.

³¹ Yäsiqnin anyapashqanta chaskikuq runaqa tantiyakuqmi rikakunqa.

³² Anyapashqanta mana chaskikuq runaqa mana ali kawaymanmi chan. Anyapashqanta chaskikuq runami isanqa mas yachaq rikakun.

³³ Tayta Diosta mansapakuq runaqa tantiyakuqmi kaykan. Respitash kayta munarqa humildi kasun.