Proverbios 14 - Tayta Diospa Wilakuynin

¹ Tantiyakuq warmiqa wayincho taqkuna ali kawayänanpaqmi imatapis alikunata ruran. Mana tantiyakuq warmimi isanqa wayincho taqkunata jaqayäsin.

² Cäsukuq runaqa Tayta Diosta mansapakunmi. Mana cäsukuq runaqa payta manakaqmanmi churan.

³ Mana tantiyakuq runaqa runa tukurmi imatapis parlan. Tantiyakuq runami isanqa imatapis alilata parlan.

⁴ Yunta mana kaptinqa mikuy churakunapis jäkunmi. Yunta kaptinmi isanqa pusuy pusuy mikuypis kaykan.

⁵ Mana lulakuq testïguqa rasun kaqlatami parlan. Rantiy testïgumi isanqa yawarpis jutuykaqta pitapis levantan.

⁶ Lïsu runaqa tantiyakuq kayta munarpis manami kamäpakunsu. Respitakuq runami isanqa shumaq tantiyakun.

⁷ Yaqa runawan purirqa manami imatapis alitaqa yachakunkisu. Payta qatiränaykipa trukanqa witikuy.

⁸ Tantiyakuq runaqa jusalikurpis reconöcinmi. Mana tantiyakuq runami isanqa ni jusalikushqantapis tantiyakunsu.

⁹ Mana tantiyakuq runaqa jusalikuskirpis kushikunmi. Tantiyakuq runami isanqa jusalikuykurqa Tayta Diosta perdonta manakun.

¹⁰ Kikilanmi runa musyan shonqun lakish kaykashqanta. Manami jukpa shonqun kushish kaykashqanta pipis tantiyansu.

¹¹ Yaqa runapaqa wayincho taqkunapis wakpa kaypami aywakuyan. Ali runapa wayinchömi isanqa yanapänakur ali kawakuyan.

¹² Wakin runaqa lutanta rurarpis alita ruraykashqantami yarpan. Saynöla kawarqa wanuymanmi chanqa.

¹³ Wakinqa asikurpis shonqunchöqa lakishqami kaykan. Saymi kushikuskirpis waqayman churakan.

¹⁴ Yaqa runaqa lutanta ruraskirpis kushikunmi. Ali runami isanqa alita rurashqanpita kushikun.

¹⁵ Mana tantiyakuq runaqa pï nishqantapis juklami criyin. Tantiyakuq runami isanqa lutalaqa pitapis criyinsu.

¹⁶ Tantiyakuq runaqa Tayta Diosta mansapakurmi jusalikuyta kacharin. Mana tantiyakuq runami isanqa mana mansapakuypa jusalikun.

¹⁷ Imalapitapis rabyaq runaqa lutantami ruran. Tantiyakuq runami isanqa ashliyaptinpis upälakun.

¹⁸ Mana tantiyakuq runaqa imaypis lutan ruraylachömi kawan. Shumaq tantiyakuq runaqa mas yachaqmi rikakun.

¹⁹ Lutanta rurashqanta tantiyakurmi yaqa runapis ali runakunapa makinta musanqa. Ima ruraytapis mana kamäpakurmi nawpanman qonqurpakunqa.

²⁰ Pobri runataqa imanpis mana kaptinmi kuyanakushqan amïgunpis ajayan. Rïcu runatami isanqa riquëzanpaq kash pïmaypis kuyan.

²¹ Runa mayinta manakaqman churaq kaqqa jusayuqmi rikakun. Pobrikunata yanapaq runataqa Tayta Diosmi yanapan.

²² Lutanta rurananpaq yarpachakuq runaqa mana alimi kawan. Alita rurananpaq yarpachakuq runatami isanqa pipis kuyar yanapan.

²³ Arukuq runapaqa imaykanpis kanmi. Parlalar shukiräkuq runaqa pobriyanmi.

²⁴ Tantiyakuqkunapaqa yachaq kayninmi corönan kaykan. Mana tantiyakuqkunapami isanqa upa kaynilan corönan kaykan.

²⁵ Rasun kaqlata parlaq testïguqa pitapis salvanmi. Rantiy testïgumi isanqa pitapis wanuyman qarpuriykun.

²⁶ Payta mansapakuq kaqtaqa kikintapis wamrankunatapis Tayta Dios yanapanmi.

²⁷ Tayta Diosta mansapakuq runaqa ali kawaytami tarin. Saynöpami wanuypitapis qeshpin.

²⁸ Mandashqan nacioncho aska runakuna kaptinqa rey kushikunmi. Walkala runa kaptinmi isanqa lakikun.

²⁹ Tantiyakuq runaqa jukla manami rabyakunsu. Mana tantiyakuq runami isanqa imalapitapis rabyakun.

³⁰ Ali shonqu runaqa sänumi kawan. Chiki runami isanqa qeshyalata misin.

³¹ Muchuqta nakasiq runaqa kamakuq Tayta Diostami rabyanäsin. Pobrita yanapaq runaqa Tayta Diosta nishqantami wiyakun.

³² Yaqa runaqa lutankunata rurashqanpitami mana ali kawan. Ali runami isanqa alita rurashqanpita jawkala kawan.

³³ Yarpachakuq runaqa shumaqmi tantiyakun. Mana yarpachakuq runami isanqa tantiyakunsu.

³⁴ Nacioncho ali rikanakurqa pïmaypis kushikunmi. Jusalikur kawayaptinqa say nacionta manakaqmanmi churayan.

³⁵ Ashmaynin cäsukuq kaptinqa rey kuyanmi. Mana cäsukuptinmi isanqa rabyanan.