Proverbios 13 - Tayta Diospa Wilakuynin

¹ Shumaq tantiyakuq wamräqa papänin yäsishqanta chaskikunmi. Awilan ashmash wamräqa manami chaskikunsu.

² Shiminpitami ali rikash o mana ali rikashqapis kanqa. Traicionëru runaqa chikipashqami kanqa.

³ Alikunalata parlaq runaqa wanuypitapis salvakunmi. Shimin tarishqanta parlaq runami isanqa ushakanqa.

⁴ Qela runaqa mayjina munarpis manami imatapis tarinsu. Arukuq runami isanqa munashqanta imatapis tarin.

⁵ Ali runaqa lulakuyta manami munansu. Fiyu runaqa penqaypaqmi imatapis ruran.

⁶ Ali runaqa alita rurashqanpita alimi kawanqa. Fiyu runami isanqa jusalikushqanpita ushakanqa.

⁷ Wakin runakunaqa imanpis mana kaykaptinmi rïcu tukuyan. Wakin runanami imanpis kaykaptin pobri tukun.

⁸ Rïcu runaqa qellayninwanmi wanuypitapis salvakun. Pobri runataqa manami pipis suwapänanpaq yarpansu.

⁹ Ali kawaq runaqa shumaq asikyaq mechërunömi kaykan. Fiyu runami isanqa aksi upiqno elaqanqa.

¹⁰ Runa tukuq runaqa pitapis rabyanäsinmi. Yäsishqanta chaskikuq runaqa tantiyakuqmi kaykan.

¹¹ Mana nakaylapa tarishqan qellayqa yakunömi ushakäkun. Walka walkala shuntakuq runaqa rïcuyanmi.

¹² Yarpashqanno mana kamakaptinqa pipis fiyupami lakikun. Yarpashqanno kamakaptinmi isanqa kushikun.

¹³ Mandaqnin nishqanta mana cäsukurqa castigashqami kanqa. Mandaqnin nishqanta cäsukurmi isanqa premiuta chaskinqa.

¹⁴ Tantiyakuq runa yäsishqanta chaskikurqa ali kawaytami tarin. Saynöpami wanuypitapis qeshpin.

¹⁵ Ali yarpayyuq runataqa pïmaypis respitanmi. Mana cäsukuq runataqa desgraciami päsanqa.

¹⁶ Tantiyakuq runaqa shumaq yarpachakuskirmi imatapis ruran. Mana tantiyakuq runaqa lutanta ruraskirpis gälatukunmi.

¹⁷ Mana yärakuypaq runaqa kachakuqninta rabyanäsinmi. Yärakuypaq runami isanqa kachakuqninta kushikasin.

¹⁸ Yäsishqanta mana chaskikuq runaqa penqaypaqmi muchuyman chanqa. Anyapashqanta chaskikuq runami isanqa respitash kanqa.

¹⁹ Yarpashqannöla imapis kamakaptin pipis kushikunmi. Mana tantiyakuq runaqa lutan rurayta manami kachariyta munansu.

²⁰ Tantiyakuq runawan purirqa tantiyakuqmi rikakun. Mana tantiyakuq runawan purirqa mana alikunatami yachakun.

²¹ Jusalikuq runaqa mana alimi kawan. Ali runami isanqa jawkala kawan.

²² Ali runapa herencianqa hasta wilkankunapaqpis kanqami. Yaqa runapa herencianmi isanqa ali runakunapa makinman chanqa.

²³ Pobri runapa chakrancho mikuy ali wayuptinpis yaqa runami ushapan.

²⁴ Wamranta mana corrigirqa manami rasunpaypasu kuyan. Rasunpaypa kuyarqa juklami corrigin.

²⁵ Ali runapa wayinchöqa mikuynin pusuy pusuymi. Yaqa runapa wayinchömi isanqa wayrala tumaykan.