Proverbios 10 - Tayta Diospa Wilakuynin

Salomón parlashqan yäsikuykuna

¹ Kaychömi qelqaraykäyan Salomón parlashqan yäsikuykuna. Surin tantiyakuq kaptinqa papäninpis mamanpis kushikuyanmi. Mana tantiyakuq kaptinqa pësakuyanmi.

² Suwakuypa rïcuyaqkunaqa manaraqpis provicharmi wanuyanqa. Arukur shumaq kawakuqkunami isanqa wanuypitapis salvakuyanqa.

³ Ali runataqa muchuycho mana kananpaq Tayta Diosmi yanapan. Fiyu runatami isanqa munashqanta tarinanpaqpis yanapansu.

⁴ Qela runaqa pobriyanmi. Arukuq runami isanqa rïcuyan.

⁵ Usya wisan pirwakuq runaqa tantiyakuqmi kaykan. Cosëcha wisan punukuq runami isanqa penqaypaq kaykan.

⁶ Ali runapaqqa bendición kanmi. Fiyu runaqa ali shimilanpa parlaparpis shonqunchöqa chikinmi.

⁷ Ali runapaqqa pipis yarparkunmi. Fiyu runapaqmi isanqa pipis yarpannasu.

⁸ Tantiyakuq runaqa mandaqninta cäsukunmi. Manakaqkunata parlaq runaqa chikipashqami kanqa.

⁹ Alilata ruraq runaqa jawkalami kawakun. Mana alita ruraq runami isanqa elaqpita ushakanqa.

¹⁰ Jusalikushqanta mana wilakunanpaq runa mayinta qemsipaq runaqa lakikuymanmi chanqa. Lutanta parlaq runaqa chikipashqami kanqa.

¹¹ Ali runa yäsiptinqa pipis kushishqami kawan. Fiyu runa shimita jatipaptinmi isanqa rimanakular kawayan.

¹² Chiki runaqa pïmaytapis rimanakasinmi. Kuyakuq runami isanqa imata rurayaptinpis perdonan.

¹³ Tantiyakuq runaqa imatapis alimi tantiyasikun. Mana tantiyakuq runaqa maypis wirukuykuy munaymi kaykan.

¹⁴ Tantiyakuq runaqa manami imatapis lutalaqa parlakunsu. Mana tantiyakuq runami isanqa lutala parlashpan pïmaytapis rabyanäsin.

¹⁵ Rïcu runapaqa riquëzan kaykanmi defiendikunanpaq. Pobri runapami isanqa defiendikunanpaq imanpis kansu.

¹⁶ Ali runaqa alimi kawan. Fiyu runaqa jusalikuylachömi kawan.

¹⁷ Anyapashqanta chaskikuq runaqa alimi kawan. Anyapashqanta mana chaskikuq runami isanqa mana ali kawan.

¹⁸ Chikiykarpis ali tupaylapa parlaparqa lulapaykanmi. Mana tantiyakuq runaqa manakaqkunalatami wilapakur purin.

¹⁹ Aläpa parlaq runaqa manakaqtapis parlanmi. Shumaq tantiyakuq runami isanqa ali kaqlata parlan.

²⁰ Ali runa parlashqanqa yuraq qellaynömi kaykan. Fiyu runa parlashqanmi isanqa imapaqpis alisu.

²¹ Ali runa yäsiptinqa pïmaypis ali kawananpaqmi tantiyakun. Fiyu runaqa mana tantiyakuq kashqanpitami wanun.

²² Tayta Diospa bendicionninwanmi imaykansikunapis kaykan. Bendicionninta chaskirmi kushikunsi.

²³ Mana tantiyakuq runaqa lutanta rurashpanmi kushikun. Tantiyakuq runami isanqa alita rurashpan kushikun.

²⁴ Fiyu runataqa mana munashqan kaqmi imapis päsan. Ali runaqa imatapis munashqantami tarin.

²⁵ Fiyu runataqa huracán wayranömi nakaykuna ushakäsin. Ali runami isanqa imano nakarpis salvakun.

²⁶ Kiruta vinagri jimpäsishqanno y nawita qoshtay rawräsishqannömi qela runapis kachaqninpaq uma nanaynin kaykan.

²⁷ Tayta Diosta mansapakuq runaqa awkinyashqanyaqmi ali kawan. Lutan ruraq runami isanqa manaraqpis aykäta wanun.

²⁸ Ali runakunataqa kushikuymi shuyaran. Fiyu runakunatami isanqa lakikuymi shuyaran.

²⁹ Tayta Diosmi ali rikan pay munashqanno kawaq runataqa. Lutan ruraq runatami isanqa ushakäsin.

³⁰ Ali runaqa nakay shamuptinpis manami fracasanqasu. Fiyu runami isanqa ushakanqa.

³¹ Ali runaqa pitapis shumaqmi yäsin. Fiyu runaqa shimilanpitami castigash kanqa.

³² Ali runaqa alikunalatami parlan. Fiyu runami isanqa lutankunalata parlan.