Nehemías 3 - Tayta Diospa Wilakuynin

Jerusalén murällata alsayta qalaykuyashqan

¹ Saypitanami mandaq cüra Eliasib cüra mayinkunawan shuntakaykur alsayarqan Uysha jutiyuq punkuta. Marcunkunata churarkurmi punkukunata tanayarqan. Murällata alsayarqan Pachak jutiyuq törripita hasta Hananeel törriyaqmi.

² Saypita sïguiq murällatami Jericó marka runakuna alsayarqan. Saypita kaqtanami Imripa surin Zacur alsarqan.

³ Senaapita miraq runakunanami Pescädu jutiyuq punkutana alsayarqan. Marcunkunata churarkurmi punkukunata tanayarqan. Nirkurmi cerröjunkunata y trancankunata churayarqan.

⁴ Pescädu jutiyuq punkupitanami Meremot alsarqan. Pay karqan Uríaspa surin y Cospa wilkanmi. Saypita kaqtanami Mesulam alsarqan. Pay karqan Berequíaspa surin y Mesezabeelpa wilkanmi. Saypita päsaraq murällatanami Baanapa surin Sadoc alsarqan.

⁵ Saypita kaqtanami Tecoa marka runakuna alsayarqan. Isanqa respitädu mayor Tecoa runakunaqa manami yanapayta munayarqansu.

⁶ Jesaná punkutanami Paseahpa surin Joiada y Besodíaspa surin Mesulam alsayarqan. Marcunkunata churarkasirmi punkukunata tanasiyarqan. Nirkurmi cerröjunkunata y trancankunata churayarqan.

⁷ Saypita päsaraq murällatanami Gabaón runa Melatíaswan Meronot runa Jadón alsayarqan. Paykunawanmi Gabaón runakunawan Mizpa runakunapis aruyarqan. Gabaón y Mizpa markakunaqa kayarqan Éufrates mayu kay simpan provinciapa gobernadornin mandashqanchömi.

⁸ Saypita päsaraq murällatanami Harhaíapa surin Uziel alsarqan. Pay karqan qellay fundiqmi. Saypita päsaraqtanami Hananías alsarqan. Payqa karqan perfümi ruraqmi. Saynöpami Jerusalén murällata hasta Anchu Perqa nishqanyaq alsayarqan.

⁹ Saypita päsaraq murällatanami Hurpa surin Refaías alsarqan. Payqa karqan pulan Jerusalén distrïtupa gobernadorninmi.

¹⁰ Saypita päsaraq murällatami Harumafpa surin Jedaías alsarqan. Alsashqan murällaqa wayin nawpanpami karqan. Saypita päsaraq murällatanami Hasabníaspa surin Hatús alsarqan.

¹¹ Saypita päsaraq murällatami Harimpa surin Malquías y Pahat-moabpa surin Hasubna alsayarqan. Paykunami alsayarqan Jornu jutiyuq törritapis.

¹² Saypita päsaraq murällatami Halohespa surin Salum alsarqan. Salumqa karqan pulan Jerusalén distrïtupa gobernadorninmi. Payqa warmi surinkunawanmi murällata alsayarqan.

¹³ Raqra jutiyuq punkutanami Zanoa runakunawan Hanún alsayarqan. Punkukunata tanarkurmi cerröjunkunata y trancankunata churayarqan. Nirkurmi murällatana perqayarqan larguypa chusku pachak pisqa chunka (450) metruta hasta Qanra Jitakuna jutiyuq punkuyaq.

¹⁴ Recabpa surin Malquíasnami Qanra Jitakuna jutiyuq punkuta alsarqan. Malquíasqa Bet-haquerem distrïtupa gobernadorninmi karqan. Punkukunata tanarkasirmi cerröjunkunata y trancankunata churarqan.

¹⁵ Colhozipa surin Salumnami Pukyu jutiyuq punkuta alsarqan. Salumqa Mizpa distrïtupa gobernadorninmi karqan. Punkunkunata tanarkasirmi cerröjunkunata y trancankunata churarqan. Nirkurmi say punku jananpa qatarkurqan. Saynölami reypa huertan nawpancho kaykaq Siloé kita lädunpa päsaq murällatapis alsarqan. Say murällataqa Davidpa Markan nishqan partipita urämuna grädayaqmi alsarqan.

¹⁶ Saypita päsaraq murällatami Azbucpa surin Nehemías alsarqan. Payqa pulan Bet-sur distrïtupa gobernadorninmi karqan. Pay alsarqan hasta David ayllu kaqkuna pamparaykäyashqan panteón frentinyaqmi. Saychömi yaku shuntakuna pözu y soldädukunapa cuartilninpis kaykan.

Jerusalén murällata levitakuna alsayashqan

¹⁷ Saypitanami levitakuna murällata alsayarqan. Say levitakunami kayarqan: Banipa surin Rehum, Hasabías (Payqa Rehum alsashqanpita päsaraq murällatami alsarqan. Hasabíasqa pulan Keila distrïtupa gobernadornin karmi say distrïtu runakunapa jutincho alsarqan);

¹⁸ Henadadpa surin Bavai (Payqa Hasabías alsashqanpita päsaraq murällatami alsarqan. Bavaiqa karqan pulan kaq Keila distrïtupa gobernadorninmi);

¹⁹ Jesúapa surin Ezer (Payqa Bavai alsashqanpita päsaraq murällatami alsarqan. Ezerqa karqan Mizpa markapa gobernadorninmi. Paymi alsarqan guërra armakuna churaränan wayiman wisänan frentinpa. Saychömi murällapa esquïnan kaykan);

²⁰ Zabaipa surin Baruc (Payqa Ezer alsashqanpita päsaraq murällatami kushish alsarqan. Say karqan esquïnapita hasta mandaq cüra Eliasibpa wayin punkuyaqmi);

²¹ y Uríaspa surin Meremot (Payqa Baruc alsashqanpita päsaraq murällatami Eliasibpa wayin punkunpita hasta wayin esquïnayaq alsarqan. Meremotqa karqan Cospa wilkanmi).

Jerusalén murällata cürakuna alsayashqan

²² Saypita päsaraq murällatanami Jerusalén nawpankunacho taq cürakuna alsayarqan. Say cürakunami kayarqan:

²³ Benjamín y Hasub (Paykunaqa wayin nawpanpa päsaq murällatami alsayarqan); Maasíaspa surin Azarías (Pay karqan Ananíaspa wilkanmi. Payqa kikinpa wayin nawpanpami alsarqan);

²⁴ Henadadpa surin Binúi (Payqa Azaríaspa wayinpita murälla esquïnanyaqmi alsarqan);

²⁵ Uzaipa surin Palal (Payqa alsarqan esquïnapita pasami. Saynöpis alsarqan mandaq reypa wayincho kaykaq jatun törritami. Say törriqa kaykarqan cárcel punku cercanchömi); Faruspa surin Pedaías

²⁶ y Ofel barriucho taq runakuna (Paykunami murällata alsayarqan hasta Yaku jutiyuq punku frentinyaq. Say punkuqa inti jeqamun kaqlächömi karqan. Saynöpis alsayarqan saycho kaykaq jatun törrita. Say alsaq runakunaqa templucho aruq runakunami kayarqan).

Jerusalén murällata wakin runakuna alsayashqan

²⁷ Saypita päsaraq murällatami Tecoa runakunana jatun törri frentinpita hasta Ofel murällaman tinkuqyaq alsayarqan.

²⁸ Cawallukuna jutiyuq punkupita qalaykurnami cürakuna cada ünun wayin nawpankunapa kaq murällata alsayarqan.

²⁹ Saypita päsaraqtanami Imerpa surin Sadoc alsarqan. Pay alsashqanqa wayin nawpanpami karqan. Saypita päsaraq murällatanami Secaníaspa surin Semaías alsarqan. Payqa karqan inti jeqamunan kaqläpa templu punku täpakuqmi.

³⁰ Saypita päsaraq kaqtanami Selemíaspa surin Hananíaswan Hanún alsayarqan. Hanúnqa karqan Salafpa soqta kaq surinmi. Saypita päsaraq kaqtanami Berequíaspa surin Mesulam alsarqan. Pay alsashqanqa karqan wayin simpanchömi.

³¹ Saypita päsaraq murällatanami qellay fundiq Malquías alsarqan hasta templucho aruqkunapa y negociantikunapa wayin kaykashqanyaq. Say wayi kaykarqan Shuntakäyänan jutiyuq punku simpanchömi. Saynöpis karqan rikachakuna wayi kashqan esquïnachömi.

³² Saypita päsaraq murällatanami qellay fundiqkuna y negociantikuna hasta Uyshakuna jutiyuq punkuyaq alsayarqan.