Nehemías 11 - Tayta Diospa Wilakuynin

Jerusaléncho täyänanpaq aywaqkuna

¹ Judá provinciapa mandaqninkunaqa lapanpis Jerusalénchömi täyarqan. Wakin runakunami suertita jitayarqan cada chunka ayllupita juk ayllu Tayta Dios akrashqan Jerusaléncho täyänanpaq. Wakin kaqnami jinan markankunalachöna quëdakuyarqan.

² Wakinnami voluntäninpita aywayarqan Jerusaléncho täyänanpaq. Paykunatami runakuna kushish chaskikuyarqan.

³ Judá provinciacho quëdaqkunaqa kikinkunapa chakrankunacho y markankunachömi täkuyarqan. Say runakuna kayarqan cürakuna, levitakuna, templucho aruqkuna, Salomónpa ashmayninkunapita miraqkuna y wakin Israel runakunapis. Jerusaléncho täyänanpaq markankunapita aywaq runakuna pï pï kayashqanpis kaychömi qelqaraykan. Paykunaqa cada ünunmi ayllunkunapa mandaqnin kayarqan.

⁴ (Jerusalénchömi Judá trïbu runakuna y Benjamín trïbu runakuna täyarqan.) Judá trïbu runakunapita Jerusalénman aywaq runakunami kayarqan: Ataías (Payqa karqan Uzíaspa surinmi. Uzías karqan Zacaríaspa surinmi. Zacarías karqan Amaríaspa surinmi. Amarías karqan Sefatíaspa surinmi. Sefatías karqan Mahalaleelpa surinmi. Mahalaleel karqan Fares ayllumi)

⁵ y Maasías. (Payqa karqan Barucpa surinmi. Baruc karqan Colhozipa surinmi. Colhoze karqan Hazaíaspa surinmi. Hazaías karqan Adaíaspa surinmi. Adaías karqan Joiaribpa surinmi. Joiarib karqan Zacaríaspa surinmi. Zacaríasnami karqan Judápa surin Sela ayllu.)

⁶ Judápa surin Fares ayllu runakuna Jerusaléncho täyarqan chusku pachak soqta chunka puwaq (468) runakunami. Paykuna lapanpis kayarqan ali chölulantaqmi.

^7-8 Benjamín trïbu runakunapita Jerusalénman aywaq runakunami kayarqan Salú, Gabai y Salai. Salúqa karqan Mesulampa surinmi. Mesulam karqan Joedpa surinmi. Joed karqan Pedaíaspa surinmi. Pedaías karqan Colaíaspa surinmi. Colaías karqan Maasíaspa surinmi. Maasías karqan Itielpa surinmi. Itiel karqan Jesaíaspa surinmi. Jerusalénman aywaq Benjamín trïbu runakunami kayarqan esqun pachak ishkay chunka puwaq (928) runakuna.

⁹ Paykunapa mandaqninmi karqan Zicripa surin Joel. Joeltanami say markacho mandäsirqan Senúapa surin Judá.

¹⁰ Jerusalénman aywaq cürakunami kayarqan Joiaribpa surin Jedaías, Jaquín

¹¹ y Seraías. Seraías karqan Hilcíaspa surinmi. Hilcías karqan Mesulampa surinmi. Mesulam karqan Sadocpa surinmi. Sadoc karqan Meraiotpa surinmi. Meraiot karqan Ahitobpa surinmi. Ahitobqa karqan mandaq cürami.

¹² Jedaías ayllu cürakunami kayarqan puwaq pachak ishkay chunka ishkay (822) runakuna. Paykunaqa templuchömi Tayta Diosta sirviyarqan. Paykunawanmi kaykarqan cüra Adaías. Adaías karqan Jerohampa surinmi. Jeroham karqan Pelalíaspa surinmi. Pelalías karqan Amsipa surinmi. Amsi karqan Zacaríaspa surinmi. Zacarías karqan Pasurpa surinmi. Pasur karqan Malquíaspa surinmi.

¹³ Adaías ayllucho mandaqkunalata yupaptin karqan ishkay pachak chusku chunka ishkay (242) runakunami. Paykunawanmi karqan cüra Amasai. Amasai karqan Azareelpa surinmi. Azareel karqan Azaipa surinmi. Azai karqan Mesilemotpa surinmi. Mesilemot karqan Imerpa surinmi.

¹⁴ Amasai ayllu cürakunami kayarqan juk pachak ishkay chunka puwaq (128) runakuna. Paykunaqa lapanpis kayarqan ali chölulantaqmi. Mandaqninmi karqan Gedolimpa surin Zabdiel.

¹⁵ Jerusalénman aywaq levitakunami kayarqan: Semaías (Pay karqan Hasubpa surinmi. Hasub karqan Azricampa surinmi. Azricam karqan Hasabíaspa surinmi. Hasabías karqan Bunipa surinmi),

¹⁶ Sabetai, Jozabad (paykunaqa levitakunapa mandaqnin kar Diospa templun waqtancho aruqkunapa capatazninmi kayarqan),

¹⁷ Matanías (Pay karqan Micaíapa surinmi. Micaía karqan Zabdipa surinmi. Zabdi karqan Asafpa surinmi. Asaf karqan Tayta Diosta manakushqan höra alabaqkunapa directorninmi), Bacbuquías (Pay karqan Mataníasta mandäsiqmi) y Abda (Pay karqan Samúapa surinmi. Samúa karqan Galalpa surinmi. Galal karqan Jedutúnpa surinmi).

¹⁸ Tayta Dios akrashqan sagrädu Jerusaléncho taq levitakunami kayarqan ishkay pachak puwaq chunka chusku (284).

¹⁹ Jerusalén punku täpakuq runakunami kayarqan Acub, Talmón y ayllunkuna. Paykuna Jerusalénman aywayarqan juk pachak qanchis chunka ishkay (172) runakunami.

²⁰ Saypita kaqqa Israel runakuna, cürakuna y levitakunapis täyarqan Judácho kaykaq kikinkunapa markankunachönami.

²¹ Diospa templuncho aruqkuna täyarqan Ofel barriuchömi. Paykunapa mandaqninkunami kayarqan Zihawan Gispa.

²² Jerusaléncho taq levitakunapa mandaqnin karqan Uzimi. Uzi karqan Banipa surinmi. Bani karqan Hasabíaspa surinmi. Hasabías karqan Mataníaspa surinmi. Matanías karqan Micaíapa surinmi. Micaía karqan Asaf ayllumi. Paykuna kayarqan Tayta Diospa templuncho cantaqkunapa directorninmi.

²³ Templucho cantaqkuna waran waran churanakuypa cantayänanpaqmi rey ordenash karqan.

²⁴ Mesezabeelpa surin Petaíastami rey churash karqan runakuna quejakuyashqanta arreglananpaq. Mesezabeel karqan Zera ayllumi. Zera karqan Judápa surinmi.

²⁵ Wakin kaq Judá trïbu runakuna täyarqan Quiriat-arba particho y caseriunkunacho, Dibón particho y caseriunkunacho y Jecabseel particho y caseriunkunacho.

²⁶ Saynöpis täyarqan Jesúa markacho, Molada markacho, Bet-pelet markacho,

²⁷ Hazar-sual markacho, Beerseba particho y caseriunkunacho,

²⁸ Siclag markacho, Mecona particho y caseriunkunacho,

²⁹ En-rimón particho, Zora particho, Jarmut particho,

³⁰ Zanoa particho, Adulam particho y caseriunkunacho, Laquis particho y Azeca particho y caseriunkunacho. Saymi Judá trïbu runakunaqa täyarqan Beersebapita hasta Hinom raqrayaq.

³¹ Benjamín trïbu runakunami täyarqan Geba markacho, Micmas markacho, Aía markacho, Bet-el particho y caseriunkunacho,

³² Anatot markacho, Nob markacho, Ananías markacho,

³³ Hazor markacho, Ramá markacho, Gitaim markacho,

³⁴ Hadid markacho, Seboim markacho, Nebalat markacho,

³⁵ Lod markacho, Ono markacho y Artesänukuna Täyashqan Pampa niyashqanchöpis.

³⁶ Wakin levitakunaqa Judá trïbu runakuna täyashqanpita aywakuyarqan Benjamín trïbu runakuna täyashqancho täyänanpaqmi.