Nahum 2 - Tayta Diospa Wilakuynin

¹ 1 (2) Nínive runakuna, contrayki runakunami ushakäsiyäshunaykipaq shamuykäyan. Sayno kaptin törriman wisarkur alcäbula kaykäyay. Nänipa shamuqta rikachakuyay. Espädaykikunata jukla puestukuyay. Soldäduykikunata apurä shuntayay.

² 2 (3) Qamkunami Jacob ayllu runakunata ushakäsir rämaynaq üvatano qarapachashta kachariyashkanki. Sayno ruraykäyaptikipis Tayta Diosmi Israel runakunata yanapanqa unay kawayashqanno yapay ali kawayänanpaq.

³ 3 (4) Tayta Diospa soldädunkunaqa atacayäshunaykipaq kamarikushnami kaykäyan. Escüdunkunapis mödanankunapis pukami kaykan. Carrëtankunapis elqukuynöraqmi asikyar cörriykäyan. Cawallunkunapis guërraman jukla yaykuyta munayashpanmi atipakuykäyan.

⁴ 4 (5) Carrëtankunapis qoshtataylami cällikunapa aywaykäyan. Pläzakunachöpis asikyaypa asikyarmi elqukuynöraq wakpa kaypa cörriykäyan.

⁵ 5 (6) Rey mandaptinmi ali chölu capitankunapis escüdunkunawan sapakurkur markata atacayänanpaq murällaman tanqanakurraq cörriykäyan.

⁶ 6 (7) Marka nawpanpa päsaykaq mayuta qaykuykurmi reypa palaciuntapis juchuykäsiyan.

⁷ 7 (8) Reypa warmintapis prësumi apakuykäyan. Apakuyaptinmi ashmaynin warmikunapis paluma waqashqannöraq waqaraykar qatiraykäyan. Qasqunkunatapis kutarraqmi waqaykäyan.

⁸ 8 (9) Atacayaptinmi Nínive runakuna qeshpir aywakuykäyan. Qocha saparaq kichakaskiptin yaku bunyaypa bunyar aywaqnöraqmi tanqanakurraq aywakuykäyan. Sayno qeshpikurmi kutiyänanpaq mayjina qayayaptinpis manana kutiyannasu.

⁹ 9 (10) ¡Nínive runakuna kachariyashqan qellayninta y qorintapis apakuyay! ¡Paykunapa riquëzankunaqa yupaytapis mana atipaypaqmi kaykan!

¹⁰ 10 (11) ¡Nínive marka sunyaraykanmi! ¡Pasaypa pükashqami kaykan! ¡Wayinkunapis juchusishqami kaykan! ¡Runakuna pasaypa mansakäyaptinmi shonqunkunapis kurun kurunyan y qonqurninkunapis suksukyan! ¡Pasaypa almatakäyaptinmi valorninkunapis kannasu!

¹¹ 11 (12) Nawpataqa Nínive marka leonpa machayninnömi karqan. Saychöqa awkinkunapis y wamrakunapis jawkalami kawayarqan.

¹² 12 (13) Uywakunata wanusiq leonkunanömi Nínive runakuna kayarqan. Saymi contrankunata ushakaykasir markanman imaykatapis apaykur aypunakuyaq. Saynöpami wayinkunamanpis suwakuyashqanta juntayaq.

¹³ 13 (14) Sayno kayashqanpitami lapanta mandaq Tayta Dios Nínive runakunata kayno nin: <>.