Jueces 3 - Tayta Diospa Wilakuynin

Canaánpita mana qarquyashqan runakuna

¹ Kaychömi qelqaraykan mayqan mayqan marka runakunata Canaáncho Tayta Dios mana ushakäsishqan. Say runakunata ushakäsirqansu qepa yuriq Israel runakunata jusalikuyman inkitayaptin probananpaqmi.

² Saynöpis say runakunata Tayta Dios ushakäsirqansu qepa yuriq Israel runakuna pelyayta yachakuyänanta munarmi.

³ Say runakunami kayarqan filisteo runakunapa pisqa mandaqninkuna, cananeo runakuna, sidonio runakuna y Líbano jalqakunacho taq heveo runakunapis. Say heveo runakunaqa täyarqan Baal-hermón jalqapita hasta Hamatyaqmi.

⁴ Say runakunata Tayta Dios ushakäsirqansu Israel runakunata jusalikuyman inkitayänanpaqmi. Saynöpami musyayta munarqan unay ayllunkunata Moisés yachasishqan leykunata cäsukuyänanpaq o mana cäsukuyänanpaq kayashqantapis.

⁵ Saynöpami Israel runakuna talukash täyarqan cananeo, heteo, amorreo, ferezeo, heveo y jebuseo runakunawan.

⁶ Say runakunapa surinkunawanmi warmi surinkunata y olqu surinkunata täsiyarqan. Paykunawan sayno tarmi diosninkunata adorayarqan.

Israel runakunata Otoniel salvashqan

⁷ Tayta Diosta mana cäsukur Baal dioskunata y Asera diösapaq jawiyashqan raku qerukunata adorayashpanmi Israel runakuna Tayta Diosta fiyupa rabyanäsiyarqan.

⁸ Saymi Mesopotamia nacionpa mandaqnin rey Cusan-risataimpa munaynincho kayänanpaq Israel runakunata Tayta Dios kachapaykurqan. Saynöpami Israel runakunaqa puwaq wata payta sirviyarqan.

⁹ Saymi Tayta Diosta manakuyaptin paykunata salvananpaq Calebpa sobrinun Otonielta Tayta Dios ali yanaparqan. Otonielpa papänin Cenazqa Calebpa shulka wawqinmi karqan.

¹⁰ Tayta Diospa Espïritun Otonielta yanapaptinmi Israel runakuna churayarqan jueznin kananpaq. Saymi runakunata pushakurkur pelyaq aywaptin Tayta Dios yanaparqan Cusan-risataimta vinciyänanpaq.

¹¹ Saypitaqa Otoniel wanushqanyaqmi chusku chunka (40) wata Israel runakuna jawkala kawayarqan.

Israel runakunata Aod salvashqan

¹² Israel runakuna Tayta Diosta mana cäsukur yapay rabyanäsiyaptinmi Moab nacionpa mandaqnin rey Eglónta Tayta Dios yanaparqan munayyuq kananpaq.

¹³ Saymi amonita y amalecita runakunawan Israel runakunata vinciykur Palmëra Markata qechuyarqan.

¹⁴ Say junaqpitami rey Eglónpa munaynincho Israel runakuna chunka puwaq wata kayarqan.

¹⁵ Saymi Tayta Diosta manakuyaptin Gerapa surin Aodta Tayta Dios yanaparqan Israel runakunata salvananpaq. Aodqa isuq makinwan imatapis ruraqmi karqan. Saynöpis Benjamín trïbu runami karqan. Paywanmi Israel runakunaqa impuestu shuntayashqanta rey Eglónman apasiyarqan.

¹⁶ Impuestuta manaraq aparmi Aodqa pulan metru largutano ishkan lädunpa afilash espädata rurarqan. Nirkurmi mödanan rurinpa aluq kaq seqlanman jatirkurqan.

¹⁷ Saypitanami impuestu shuntayashqanta apar rey Eglónman chäsirqan. Eglónqa fiyupa wera runami karqan.

¹⁸ Apashqanta qoykurmi Aodqa walkiqninkunawan kutikuyarqan.

¹⁹ Kutikuykashqanchömi Gilgalcho kaykaq rumipita rurash ïdulukunaman chaykur rey Eglónman Aod kutirqan. Chaykurmi nirqan: <>. Nishqanta wiyananpaqmi rey Eglónqa mandäsiqninkunata nirqan waqtaman upälala yarquyänanpaq.

²⁰ Yarquriyaptinmi jamaräkunan cuartuncho Aodwan rey Eglón ishkalanna quëdaskiyarqan. Saymi rey Eglónpa nawpanman witiykur Aod nirqan: <>. Niptinmi jamarashqan trönunpita Eglón sharkurkurqan.

²¹ Saynami aluq kaq seqlanpita isuq kaq makinwan espädanta jorqurir Aodqa Eglónta pachanpa elaqpita tuksiriykurqan.

²² Eglón pasaypa wera kaptinmi espädaqa makin sarikunantin yaykukuykurqan. Saymi jipiyta mana kamäpakur kachaskiptin ashashninpis wisikaskamurqan.

²³ Saynöta kachaskirmi Aodqa punkuta ruripita llävirkur ventänapa yarquskir aywakurqan.

²⁴ Aod aywaskiptinnami rey Eglónpa mandäsiqninkuna kutir punku wichqaraykaqta tariyarqan. Sayta rikarmi yarpäyarqan ruricho ishpakuykashqanta.

²⁵ Qoyati shuyaräyaptinpis rey Eglón mana yarqamuptinmi lläviwan kicharir yaykuyashpan tariyarqan pampacho wanush jitaraykaqta.

²⁶ Rey Eglónpa mandäsiqninkuna shuyaräyashqanyaqmi Aodqa Gilgalcho kaykaq ïdulukuna nawpanpa päsarir Seiratläman qeshpir pakakurqan.

²⁷ Saypita aywar Efraín jalqakunaman chaykurmi cornëtata tukarqan Israel runakuna sayman shuntakäyänanpaq. Shuntakaskiyaptinnami lapanpa puntanta Jordán mayuman Aod urarqan.

²⁸ Manaraq urarmi nirqan: <>. Saymi Jordán mayu väduman aywaykur pitapis päsananta kachapäyarqansu.

²⁹ Moabita runakuna pelyayänanpaq shayämuptinmi wanusiyarqan chunka waranqano (10,000) ali pelyaq soldädukunata. Saycho manami juklaylapis kawaykar quëdarqansu.

³⁰ Saynömi Israel runakuna moabita runakunata vinciyarqan. Saypita pasami puwaq chunka (80) wata Israel runakuna jawkalana kawakuyarqan.

Israel runakunata Samgar salvashqan

³¹ Aod wanuskiptinnami Anatpa surin Samgarna Israel runakunata contrankunapita salvarqan. Paymi yuntata qatikuna picalawan soqta pachak (600) filisteo runakunata wanusirqan.