Jueces 20 - Tayta Diospa Wilakuynin

Guërrata rurayänanpaq Israel runakuna shuntakäyashqan

¹ Saymi lapan Israel runakuna Danpita Beersebayaq y Galaad partipitapis Mizpaman aywar Tayta Diospa nawpancho shuntakäyarqan.

² Lapan trïbunkunapitami Israel runakunapa mandaqninkunapis kaykäyarqan. Chusku pachak waranqa (400,000) runakunami espädanwan saycho shuntakäyarqan.

³ Mizpaman Israel runakuna shuntakäyashqanta musyarpis Benjamín trïbu runakunaqa manami aywayarqansu. Mizpachömi Leví trïbu runata Israel runakuna tapuyarqan: <<¿Imanöpataq concubïna warmikita wanusiyash?>> nir.

⁴ Saymi wanuq warmipa runan nirqan: <

⁵ Say sakaymi saycho taq runakuna wanusimayta yarpar posädakuyashqä wayiman juntäyämurqan. Mana yarquptïmi concubïna warmilätana violayashpan wanusiyash.

⁶ Sayno pasaypa penqaypaq jusalikuyashqanta musyayänaykipaqmi ayanta pedäzu pedäzu kusuykur intëru Israel nacionpa apasimushkä.

⁷ Lapansipis Israel runa kaykarqa kanan yarpachakushun imano ruranansipaqpis>>.

⁸ Sayno niptinmi lapan runakuna juk yarpayla kar niyarqan: <

⁹ Kananqa suertitana jitashun Gabaa markata mayqan kaq trïbupis puntata atacananpaq.

¹⁰ Saynöpis cada chunka runapita juk runata akrashun mikuyta shuntar apapämänansipaq. Nirkur Gabaaman aywashun Israel nacioncho penqakuypaq jusalikuyashqanpita say runakunata wanusinapaq>>.

¹¹ Sayno niyashpanmi Israel runakuna lapanpis say yarpayla karqan Gabaa markata atacayänanpaq.

¹² Saymi Israel runakunaqa propiukunata kachayarqan Benjamín trïbu runakuna täyashqan partikunaman niyänanpaq: <<¿Imanirtaq sayjinanpa jusata ruraykuyashkanki?

¹³ Jukla qarqayämuy Gabaa markacho taq jusasapa runakunata wanusiyänäpaq. Saynöparaqmi Israelcho jusalikuqkunata elaqäsiyäshaq>>. Israel runakuna sayno niyaptinpis Benjamín trïbu runakunaqa manami cäsupäyarqansu.

¹⁴ Saypa trukanqa Israel mayinkunawan guërrata rurayänanpaqmi markankunapita aywar Gabaa markaman shuntakäyarqan.

¹⁵ Guërraman aywayänanpaq shuntakaq Benjamín trïbu runakunaqa kayarqan ishkay chunka soqta waranqami (26,000). Say karqan Gabaa markacho taq qanchis pachak (700) pelyayta yachaq runakunata mana yupaylapami.

¹⁶ Saynöpis Benjamín trïbu runakunachöqa karqan qanchis pachak (700) runakunami isuq kaq makinwan warakay yachaq. Say runakunaqa juk aqsalatapis kamaylami warakaykuyaq.

¹⁷ Wakin trïbu Israel runakunanami guërracho pelyay yachaqlantaq chusku pachak waranqa (400,000) shuntakäyarqan.

Benjamín trïbu runakunawan Israel runakuna guërrata rurayashqan

¹⁸ Manaraq guërraman aywarmi Israel runakuna Bet-elman aywayarqan Tayta Diosta tapuyänanpaq. Saychömi tapuyarqan mayqan trïbu runakuna Benjamín trïbu runakunata puntata atacayänanpaqpis. Saymi Tayta Dios nirqan Judá trïbu runakuna puntata atacayänanpaq.

¹⁹ Saymi waraynin tutana Israel runakunaqa aywar Gabaa markapa simpancho campamentunta sharkasiyarqan.

²⁰ Saypitami guërrata rurayänanpaq say simpalanman churanakuyarqan.

²¹ Sayno kaykäyaptinmi Benjamín trïbu runakunaqa markapita yarqur Israel runakunata say junaq wanuykasiyarqan ishkay chunka ishkay waranqata (22,000).

²² Wanusiyaptinpis waraynin junaq Israel runakunaqa valurasinakuyarqan pelyayashqan kaqman kutiykur Benjamín trïbu runakunawan yapay pelyayänanpaqmi.

²³ Manaraq pelyarmi Bet-elman yapay aywaykur Tayta Diospa nawpancho waqayarqan pasa sakashqanyaq. Saychömi Tayta Diosta tapuyashpan niyarqan: <<¿Yapayku Benjamín trïbu Israel mayïkunawan pelyayäshaq?>> Sayno tapukuyaptinmi Tayta Dios nirqan: <>.

²⁴ Sayno niptinmi Benjamín trïbu runakunawan pelyaq aywayarqan.

²⁵ Atacayaptinmi Benjamín trïbu runakunaqa Gabaapita yarqamur chunka puwaq waranqa (18,000) Israel runakunata wanusiyarqan.

²⁶ Saymi Israel runakuna Bet-elman kutir Tayta Diospa nawpancho lapanpis yapay waqayarqan. Pasa sakashqanyaq ayunayashpanmi rupasina sacrificiukunata y jawka kawakuy sacrificiukunata Tayta Diospaq rupasiyarqan.

²⁷ Israel runakuna sayno Bet-elman aywayarqan Tayta Diospa Pactu Babulnin saycho kaptinmi.

²⁸ Saynöpis Aarónpa wilkan y Eleazarpa surin Fineesmi Tayta Diosta sirvir saycho kaykarqan. Saymi Israel runakuna tapukuyarqan: <> nir. Saymi Tayta Dios nirqan: <>.

²⁹ Sayno niptinmi Israel runakunaqa aywar wakinkuna pakakuyarqan Gabaa marka nawpankunapa.

³⁰ Wakinkunami atacayänanpaq puntata churanakuyashqannöla Gabaa simpanman yapay churanakuyarqan. Sayqa karqan pelyayta qalaykuyashqanpita kimsa junaq kaqchömi.

³¹ Yapaymi Benjamín trïbu runakunaqa markapita yarqur Israel runakunata wanusir qalaykuyarqan. Chakrakunapa y Gabaapita Bet-elman aywaq nänikunapa qatipar kimsa chunka (30) Israel runakunata wanusirmi

³² Benjamín trïbu runakuna yarpäyarqan puntata vinciyashqannöla yapaypis vinciyashqanta. Israel runakunaqa karu niraqman qeshpiq tukuyarqan Benjamín trïbu runakuna qatipäyänanta munarmi.

³³ Baal-tamar partiman chaykurnami Israel runakunaqa tikrapämur Benjamín trïbu runakunata atacayämurqan. Saynölami Gabaa marka nawpankunacho pakaraykaqkunapis yarquyashpan markacho quëdaq runakunata atacayarqan.

³⁴ Say atacaq runakunaqa chunka waranqa (10,000) ali chölu runakunami kayarqan. Say junaq pelyar fiyupa saraparänakuyashpan Benjamín trïbu runakunaqa perdiyänanpaq kashqanta manami musyayarqansu.

³⁵ Saynöpami Israel runakunata Tayta Dios yanaparqan Benjamín trïbu runakunata vinciyänanpaq. Say junaqmi wanusiyarqan ishkay chunka pisqa waranqa juk pachak (25,100) Benjamín trïbu runakunata. Lapanpis say runakuna kayarqan espädata ali manijaqmi.

³⁶ Sayno wanusiyaptinmi Benjamín trïbu runakunaqa cuentata qokuyarqan pelyacho perdiyashqanta. Benjamín trïbu runakunata sayno vinciyänanpaqqa Israel runakuna paykunapita qeshpiq tukuyarqanmi. Benjamín trïbu runakuna paykunata qatipaykäyaptinnami Gabaa marka nawpankunaman pakakuq runakuna

³⁷ markaman elaqpita yaykur espädawan lapanta saycho kaqtaqa wanusiyarqan.

³⁸ Manaraq atacarmi Israel runakuna wilanakuyarqan: <> nir.

³⁹ Wilanakuyashqannölami wakin Israel runakuna qeshpiyaptin Benjamín trïbu runakuna qatipäyarqan. Qatipäyashpan kimsa chunkatano (30) Israel runakunata wanusirmi Benjamín trïbu runakuna kushikur niyarqan: <>.

⁴⁰ Sayno nir qatiykäyashqancho tikraykurmi rikayarqan qoshtaypis ninapis bunyaypa bunyar markapita sharkuykaqta.

⁴¹ Israel runakunapis sayta rikärir tikrapäyaptinmi Benjamín trïbu runakunaqa mansakashpan ima ruraytapis kamäpakuyarqansu.

⁴² Saymi sunyaqman aywaq nänipa qeshpiyarqan. Nänipa qeshpiykaqtami Israel runakuna markapita yarqur wanusiyarqan.

⁴³ Saymi Benjamín trïbu runakunata sapa sapaykur Menúhapita pasa Gabaa washaläninyaq Israel runakuna wanusir ushaykuyarqan.

⁴⁴ Saynöpami Benjamín trïbu runakunata wanusiyarqan chunka puwaq waranqa (18,000) pelyayta yachaq runakunata.

⁴⁵ Sunyaq jirkacho kaykaq Rimón qaqaman qeshpiykaq runakunatapis pisqa waranqatami (5,000) wanusiyarqan. Saynölami wakin runakunatapis hasta Gidomyaq qati qatiykur ishkay waranqata (2,000) wanusiyarqan.

⁴⁶ Say junaqmi Benjamín trïbu runakuna wanuyarqan ishkay chunka pisqa waranqa (25,000) pelyayta yachaq runakuna.

⁴⁷ Soqta pachaklanami (600) Benjamín trïbu runakunaqa Rimón qaqaman qeshpiykur chusku killa saycho täyarqan.

⁴⁸ Israel runakunanami Benjamín trïbu runakuna täyashqan markakunaman aywar saycho kaykaq runakunatapis tariyashqan kaqtaqa lapanta wanusir ushayarqan. Saynölami uywankunatapis wanusir markankunatapis kayar ushayarqan.