Jueces 2 - Tayta Diospa Wilakuynin

Tayta Diospa angilnin Boquim particho Israel runakunata yuripashqan

¹ Tayta Diospa angilninmi Gilgalpita Boquimman aywaykur Israel runakunata nirqan: <

² Isanqa kay nacioncho taq runakunawan ama ima pactutapis rurayankisu. Saypa trukanqa altarninkunatapis chipyaq juchusiyanki>. Sayno nikaptïpis manami cäsukayämashkankisu. ¿Imanirtaq kullu rinri kayanki?

³ Saymi kanan nï: Taykäyashqayki markakunacho kaykaq runakunata manami qarqushaqsu. Paykunami chakikicho kasha jatiraykaqno kayanqa. Adorayashqan diosninkunalapaqmi shonquykikunapis yarparanqa>>.

⁴ Tayta Diospa angilnin sayno parlayta ushaskiptinmi lapan Israel runakuna selläma waqayarqan.

⁵ Saymi say partita jutisiyarqan Boquim jutin kananpaq. Saychömi Tayta Diospaq sacrificiukunata rupasiyarqan.

Josué wanukushqan

⁶ Aywakuyänanpaq Josué niptinmi Israel runakuna posisionninkunata chaskiyashqanman kutikuyarqan.

⁷ Israel runakunata yanapar milagrukunata Tayta Dios rurashqantami Josuépis y Egiptupita wakin yarqamuqkunapis rikayarqan. Saymi paykuna kawayashqanyaq Israel runakuna Tayta Dios munashqanno kawayarqan.

⁸ Saypitanami Tayta Diospa sirviqnin Josué pachak chunka (110) watayuq kaykar wanukurqan.

⁹ Wanuykuptinnami Timnat-seracho kikinpa chakranman pampayarqan. Say karqan Gaas jirka norti kaqläpa y Efraín jalqakunachömi.

¹⁰ Josuépa winay mayinkunapis wanukuyaptinnami qepa yuriq runakuna musyayarqannasu Tayta Dios nishqankunata ni Israel runakunata imano yanapashqantapis.

Israel runakuna juk dioskunatana adorayashqan

¹¹ Saypitanami Tayta Diosta mana cäsukur Israel runakunaqa Baal dioskunata adorayarqan.

¹² Egiptupita jorqamush kaykaptinpis unay ayllunkuna yärakuyashqan Tayta Diosta mananami adorayarqannasu, sinöqa nawpan nacionkunacho taq runakuna adorayashqan dioskunatana adorarmi Tayta Diosta fiyupa rabyanäsiyarqan.

¹³ Sayno rabyakurqan payta adorayänanpa trukan Baal diosta y Astarot diösata adorayaptinmi.

¹⁴ Sayno kayashqanpitami Tayta Dios fiyupa rabyakushpan Israel runakunata yanaparqannasu. Saymi nawpan nacionkunacho taq contran runakuna yaykuykur imankunatapis apakuyaptin defiendikuyta kamäpakuyarqansu.

¹⁵ Contran runakunawan pelyaq aywayaptinpis Tayta Dios albirtishqannölami Israel runakunapa contran rikakurqan. Saymi ima ruraytapis mana kamäpakuyashpan fiyupa lakikuyarqan.

¹⁶ Saypitanami juezkunata Tayta Dios churarqan contran runakunata vinciyänanpaq.

¹⁷ Sayno kaptinpis say juezkunata Israel runakuna mana cäsukuypami juk dioskunatana adorayarqan. Unay ayllunkuna Tayta Diospa mandamientunkunata cäsukush kayaptinpis paykunaqa manami cäsukuyarqansu.

¹⁸ Sayno kaptinpis contrankuna nakasiyaptin fiyupa lakikuyashqanta rikarmi Tayta Dios kuyapar juk juezta churaparqan. Say juez kawashqanyaqqa Israel runakunata Tayta Dios yanapaqmi contrankunapa munayninpita yarquyänanpaq.

¹⁹ Juez wanuykuptinnami awilunkunapitapis peorna jusalikuyman churakäyarqan. Saymi juk dioskunata adorar mana ali costumbrikunata kachariyta munayarqansu.

²⁰ Israel runakuna sayno kayaptinmi Tayta Dios fiyupa rabyakur nirqan: <

²¹ Saymi paykunata yanapäshaqnasu Josué mana ushakäsishqan contran runakunata ushakäsiyänanpaq.

²² Say contran runakunami jusalikuyänanpaq Israel runakunata inkitayanqa. Saynöpami musyashaq Israel runakuna unay ayllunkunano cäsukayämashqanta o mana cäsukayämashqantapis>>.

²³ Sayno nirmi Josué mana ushakäsishqan markakunacho taq runakunata ushakäsiyänanpaq Israel runakunata Tayta Dios yanaparqannasu.