Josué 21 - Tayta Diospa Wilakuynin

Leví trïbu runakuna chaskiyashqan markakuna maycho kayashqanpis

¹ Saypitanami Leví trïbupa mandaqninkuna Canaáncho kaykaq Silo markaman aywayarqan cüra Eleazarwan, Josuéwan y Israel runakunapa wakin autoridäninkunawan parlayänanpaq.

² Chaykurmi niyarqan: <>.

³ Sayno niyaptinmi Tayta Dios nishqannöla Israel runakuna rakipäyarqan markakunata y jalqakunatapis.

⁴ Puntata suertita jitayarqan cüra Aarónpita miraqkuna markankunata chaskiyänanpaqmi. Aarónpita miraq Coat ayllu wakin runakunami chunka kimsa markakunata chaskiyarqan. Say markakunaqa kayarqan Judá trïbu, Simeón trïbu y Benjamín trïbu chaskiyashqan posisionkunachömi.

⁵ Coat ayllu wakin kaq runakunanami chunka markakunata chaskiyarqan. Say markakunaqa kayarqan Efraín trïbu, Dan trïbu y pulan Manasés trïbu chaskiyashqan posisionkunachömi.

⁶ Saypitanami suertita jitayarqan Gersón ayllu runakuna markankunata chaskiyänanpaq. Paykunami chunka kimsa markakunata chaskiyarqan. Say markakunaqa kayarqan Isacar trïbu, Aser trïbu, Neftalí trïbu y Basáncho kaq pulan Manasés trïbu chaskiyashqan posisionkunachömi.

⁷ Merari ayllu runakunanami chunka ishkay markakunata chaskiyarqan. Say markakunaqa kayarqan Rubén trïbu, Gad trïbu y Zabulón trïbu chaskiyashqan posisionkunachömi.

⁸ Saymi Moisésta Tayta Dios nishqannöla Israel runakunaqa suertita jitaypa Leví trïbu runakunata rakipäyarqan markakunata y cercancho kaykaq jalqakunata uywankunata misikuyänanpaq.

^9-10 Leví trïbu Coat ayllu runakunapaq puntata suerti yarqamuptinmi Judá trïbu runakunapa y Simeón trïbu runakunapa posisionninpita markakunata rakipäyarqan.

¹¹ Saymi paykunata rakipäyarqan Judá trïbu runakuna täyashqan jalqakunacho kaq Quiriat-arbata y nawpancho kaykaq jalqakunata uywankunata misikuyänanpaq. Quiriat-arbapa jukaq jutinqa Hebrónmi kaykan. Quiriat-arbachömi anaceo runakuna täyarqan.

¹² Quiriat-arbapita mas washalächo kaykaq jalqakunatawan caseriunkunatami isanqa Jefonipa surin Calebta posisionnin kananpaq Josué entregarqan.

¹³ Cüra Aarónpita miraq runakuna chaskiyashqan Hebrón markaqa karqan runa mayinta mana yarpaypa wanusiq runakuna amparakuyänanpaqmi. Saynöpis chaskiyarqan Libnata,

¹⁴ Jatirta, Estemoata,

¹⁵ Holónta, Debirta,

¹⁶ Aínta, Jutata y Bet-semesta. Saymi Judá trïbupita y Simeón trïbupita esqun markakunata chaskiyarqan. Cada markapami misikuyänanpaq jalqankuna karqan.

¹⁷ Benjamín trïbupitami chaskiyarqan Gabaónta, Gebata,

¹⁸ Anatotta y Almónta. Saymi Benjamín trïbupita chusku markakunata chaskiyarqan. Cada markapami misikuyänanpaq jalqankuna karqan.

¹⁹ Saynöpami Aarónpita miraq cürakuna chunka kimsa markakunata jalqankunatawan chaskiyarqan.

²⁰ Coat ayllu wakin Leví trïbu runakunanami Efraín trïbu chaskishqan posisioncho markankunata chaskiyarqan.

²¹ Paykunami chaskiyarqan Efraín jalqakunacho kaykaq Siquemta. Siquemqa runa mayinta mana yarpaypa wanusiq runakuna amparakuyänanpaq markami karqan. Saynöpis Gezerta,

²² Kibsaimta y Bet-horóntami chaskiyarqan. Say chusku markakunapami misikuyänanpaq jalqankuna karqan.

²³ Dan trïbupitami chaskiyarqan Eltequita, Gibetónta,

²⁴ Ajalónta y Gat-rimónta. Say chusku markakunapami misikuyänanpaq jalqankuna karqan.

²⁵ Pulan Manasés trïbupitami Taanacta y Gat-rimónta chaskiyarqan. Say ishkay markakunapami misikuyänanpaq jalqankuna karqan.

²⁶ Saynöpami Coat ayllu wakin Leví trïbu runakuna chunka markakunata jalqankunatawan chaskiyarqan.

²⁷ Gersón ayllu Leví trïbu runakuna pulan Manasés trïbupitami Basáncho kaykaq Golánta y Beesterata chaskiyarqan. Golánqa runa mayinta mana yarpaypa wanusiq runakuna amparakuyänanpaq markami karqan. Say ishkay markakunapami misikuyänanpaq jalqankuna karqan.

²⁸ Isacar trïbupitami chaskiyarqan Cisónta, Daberatta,

²⁹ Jarmutta y En-ganimta. Say chusku markakunapami misikuyänanpaq jalqankuna karqan.

³⁰ Aser trïbupitami chaskiyarqan Misaelta, Abdónta,

³¹ Helcatta y Rehobta. Say chusku markakunapami misikuyänanpaq jalqankuna karqan.

³² Neftalí trïbupitami Galileacho kaykaq Cedesta, Hamot-dorta y Cartánta chaskiyarqan. Cedesqa runa mayinta mana yarpaypa wanusiq runakuna amparakuyänanpaq markami karqan. Say kimsa markakunapami misikuyänanpaq jalqankuna karqan.

³³ Saynöpami Gersón ayllu Leví trïbu runakuna chunka kimsa markakunata jalqankunatawan chaskiyarqan.

³⁴ Leví trïbu runakunapa ultimu ayllun Merari ayllumi karqan. Merari ayllu runakuna Zabulón trïbupitami markankunata chaskiyarqan Jocneamta, Cartata,

³⁵ Dimnata y Naalalta. Say chusku markakunapami misikuyänanpaq jalqankuna karqan.

³⁶ Rubén trïbupitami chaskiyarqan Beserta, Jahazata,

³⁷ Cademotta y Mefaatta. Say chusku markakunapami misikuyänanpaq jalqankuna karqan.

³⁸ Gad trïbupitami Galaadcho kaykaq Ramot markata chaskiyarqan. Ramotqa runa mayinta mana yarpaypa wanusiq runakuna amparakuyänanpaq markami karqan. Saynöpis chaskiyarqan Mahanaimta,

³⁹ Hesbónta y Jazerta. Say chusku markakunapami misikuyänanpaq jalqankuna karqan.

⁴⁰ Saynöpami Merari ayllu Leví trïbu runakuna chunka ishkay markakunata chaskiyarqan.

⁴¹ Israel runakunapa posisionnincho Leví trïbu runakuna chaskiyashqan markakuna chusku chunka puwaqmi (48) kayarqan.

⁴² Say markakunapa cercancho kaq jalqankunatapis chaskiyarqanmi.

Tayta Dios promitishqanta cumplishqan

⁴³ Saynömi Israel runakunata posisionninkunata Tayta Dios qoykurqan unay ayllunkunata promitishqannöla. Saymi Israel runakuna yaykur saychöna täyarqan.

⁴⁴ Tayta Dios yanapaptinmi contran runakuna imanöpapis ichipayta kamäpakuyarqansu. Saynöpami Abrahamta, Isaacta y Jacobta Tayta Dios unay promitishqanno Israel runakunaqa jawkalana täkuyarqan.

⁴⁵ Israel runakunata promitishqantaqa lapantami mana qonqaypa Tayta Dios cumplirqan.