Josué 19 - Tayta Diospa Wilakuynin

Simeón trïbu runakunapa lindërunkuna mayninpa kashqanpis

¹ Posisionta aypunanpaq suertita yapay jitaptinmi Simeón trïbupa ayllunkunapaq yarqamurqan. Saymi Simeón trïbu runakuna posisionninta chaskiyarqan Judá trïbu runakunapa posisionninpa chawpincho.

² Saymi paykunapa markankuna karqan Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot y Saruhén. Say markakuna chunka kimsami caseriunkunawan karqan.

⁷ Wakin chaskiyashqan markakunami karqan Aín, Rimón, Eter y Asán. Say markakuna chuskumi caseriunkunawan karqan.

⁸ Sur kaqläpa wakin kaq markakunapis Simeón trïbu runakunapaqmi karqan hasta Baalat-beeryaq. Baalat-beerpa jukaq jutinqa Neguev Ramatmi kaykan. Saynömi karqan Simeón trïbu runakuna ayllunpa ayllunpa posisionta chaskiyashqan markakunapis caseriunkunapis.

⁹ Simeón trïbu runakunapa posisionninqa Judá trïbu runakunapa posisionninpa chawpinchömi karqan. Sayno karqan Judá trïbu runakunapa posisionnin aläpa jatun kaptinmi.

Zabulón trïbu runakunapa lindërunkuna mayninpa kashqanpis

¹⁰ Posisionta aypunanpaq suertita yapay jitaptinmi Zabulón trïbupa ayllunkunapaq yarqamurqan. Paykunapa posisionninqa chärarqan Saridyaqmi.

¹¹ Saridpita inti jeqanan kaqläpa aywarmi lindërunqa Maralapa päsararqan hasta Dabesetyaq. Saypitami Jocneam simpancho kaykaq raqraman chärarqan.

¹² Saridpita inti jeqamunan kaqläpanami lindërunqa Quislot-taborpa päsar Daberatyaq chärarqan. Saypitanami wisararqan Jafíaman.

¹³ Saypitami päsararqan Gat-heferpa, Ita-cazínpa y Rimónpa. Rimónpitanami tumararqan Neapa.

¹⁴ Norti kaqläpanami lindërun tumar Hanatónpa päsararqan. Saypitami chärarqan Jefte-el pampaman.

¹⁵ Say posisioncho kaq markakuna karqan Catat, Naalal, Simrón, Idala, Belén y wakin markakunapis. Paykunapa markankuna chunka ishkaymi karqan. Say markakunapa caseriunkunapis karqanmi.

¹⁶ Saynömi karqan Zabulón trïbu runakuna ayllunpa ayllunpa posisionninta chaskiyashqan markakuna caseriuntin.

Isacar trïbu runakunapa lindërunkuna mayninpa kashqanpis

¹⁷ Posisionta aypunanpaq suertita yapay jitaptinmi Isacar trïbupa ayllunkunapaq yarqamurqan.

¹⁸ Paykunapa markankuna karqan Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada y Bet-pases.

²² Lindërun päsaraykarqan Taborpa, Sahazimapa y Bet-semespa hasta Jordán mayuman chashqanyaq. Paykunapa markankuna chunka soqtami karqan. Say markakunapa caseriunkunapis karqanmi.

²³ Saynömi karqan Isacar trïbu runakuna ayllunpa ayllunpa posisionta chaskiyashqan markakunapis caseriunkunapis.

Aser trïbu runakunapa lindërunkuna mayninpa kashqanpis

²⁴ Posisionta aypunanpaq suertita yapay jitaptinmi Aser trïbupa ayllunkunapaq yarqamurqan.

²⁵ Paykunapa markankunaqa karqan Helcat, Halí, Betén, Acsaf,

²⁶ Alamelec, Amad y Misealmi. Inti jeqanan kaqläpami lindërun päsararqan Carmelo jirkapa y Sihor-libnatpa.

²⁷ Saypita inti jeqamunan kaqläpa tumararmi Bet-dagónpa päsar Jefte-el pampayaq chärarqan. Jefte-el pampachöqa Zabulón trïbu runakunapa lindërunwanmi tinkurarqan. Saypita norti kaqläpa tumararmi päsararqan Bet-emecpa y Neielpa hasta Cabulman chashqanyaq.

²⁸ Saypita päsararqan Abdónpa, Rehobpa, Hamónpa y Canápa hasta jatunkaray Sidón markaman chashqanyaq.

²⁹ Saypita tumararmi lindërun Ramápa päsararqan hasta corralash Tiro markayaq. Saypitaqa Hosapa päsar Mediterráneo Lamarmanmi chärarqan. Aser trïbu runakunapa markankuna karqan Mahaleb, Aczib,

³⁰ Uma, Afec Rehob. Paykunapa markankunaqa ishkay chunka ishkaymi (22) karqan. Say markakunapa caseriunkunapis karqanmi.

³¹ Saynömi karqan Aser trïbu runakuna ayllunpa ayllunpa posisionninta chaskiyashqan markakunapis caseriunkunapis.

Neftalí trïbu runakunapa lindërunkuna mayninpa kashqanpis

³² Posisionta aypunanpaq suertita yapay jitaptinmi Neftalí trïbupa ayllunkunapaq yarqamurqan.

³³ Paykuna chaskiyashqan posisionpa lindërunmi qalaykurqan Helefpita. Saypita päsararqan Alón-saananimpa, Adami-necebpa, Jabneelpa y Lacumpa hasta Jordán mayuyaq.

³⁴ Inti jeqanan kaqläpami lindërun Aznot-taborpa päsar chärarqan Hucocyaq. Sur kaqlächömi tinkurarqan Zabulón trïbu runakunapa lindërunwan. Inti jeqananläpanami lindërun tinkurarqan Aser trïbu runakunapa lindërunwan. Inti jeqamunan kaqläpanami lindërun chärarqan Jordán mayuyaq.

³⁵ Paykunapa corralash markankuna karqan Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat y Bet-semes. Paykunapa markankunaqa chunka esqunmi karqan. Say markakunapa caseriunkunapis karqanmi.

³⁹ Saynömi karqan Neftalí trïbu runakuna ayllunpa ayllunpa posisionninta chaskiyashqan markakuna caseriuntin.

Dan trïbu runakunapa lindërunkuna mayninpa kashqanpis

⁴⁰ Posisionta aypunanpaq suertita yapay jitaptinmi Dan trïbupa ayllunkunapaq yarqamurqan.

⁴¹ Paykunapa markankuna karqan Zora, Estaol, Ir-semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bene-berac, Gat-rimón,

⁴⁶ Mejarcón y Racón. Saynöpis paykunapaqmi karqan Jope marka cercancho kaykaq partikuna.

⁴⁷ Sayno kaptinpis posisionninta Dan trïbu runakuna manami qechuyta kamäpakuyarqansu. Saymi Lesemman wisäyarqan saychöna täyänanpaq. Lesem runakunawan pelyar wanusirmi saychöna täkuyarqan. Say markapa jutintami trukasiyarqan Dan jutin kananpaq. Saymi unay ayllunpa Dan jutilan markapa jutinpis karqan.

⁴⁸ Saynömi karqan Dan trïbu runakuna ayllunpa ayllunpa posisionninta chaskiyashqan markakunapis caseriunkunapis.

Josuépis posisionninta chaskishqan

⁴⁹ Posisionninkuna aypuyta ushaskiptinmi Nunpa surin Josuétapis posisionninta Israel runakuna rikasiyarqan wakin kaq trïbukuna chaskiyashqan posision chawpincho.

⁵⁰ Tayta Dios nishqannömi Josué manakuptin markata aypuyarqan. Saymi chaskirqan Efraín jalqakunacho kaq Timnat-sera markata. Josuéqa say markata alsar wayikunatapis yapay sharkaykasirmi saycho tarqan.

⁵¹ Israel runakunata posisionta aypuyänanpaqmi suertita jitayarqan cüra Eleazar, Josué y Israel runakunapa mandaqninkuna. Tinkuna Toldu punkuchömi Tayta Diospa nawpancho sayno suertita jitayarqan. Tinkuna Tolduqa Siluchömi karqan. Saynöpami posisionninkunata lapan trïbukunata aypuyta ushayarqan.