Josué 16 - Tayta Diospa Wilakuynin

Efraín trïbu y pulan Manasés trïbu runakunapa lindërunkuna mayninpa kashqanpis

¹ Josépita miraq runakuna suertita jitaypa chaskiyashqan posisionpa lindërunkunaqa inti jeqamunan kaqläpa Jordán mayu kuchunpitami qalaykurqan. Jericó pukyukunapita aywararmi sunyaq jirkapa päsar Bet-el jalqakunayaq chärarqan.

² Bet-elpita Luzyaq päsarmi arquita runakuna taykäyashqan Atarotyaq chärarqan.

³ Saypita urarnami inti jeqanan kaqläpa päsararqan Jaflet runakuna taykäyashqan ura kaq Bet-horónyaq. Saypitanami Gezerpa päsar Mediterráneo Lamaryaq chärarqan.

⁴ Saynömi Josépa surin Manaséspita miraq runakunapa y Josépa surin Efraínpita miraq runakunapa posisionnin karqan.

Efraín trïbu runakunapa lindërunkuna mayninpa kashqanpis

⁵ Efraín trïbu runakuna ayllunpa ayllunpa chaskiyashqan posisionpa lindërunqa inti jeqamunan kaqläpita qalaykur Atarot-adarpa y Bet-horónpa päsar

⁶ Mediterráneo Lamaryaqmi chärarqan. Norti kaqläpanami lindërun qalaykurqan Micmetatcho. Saypita inti jeqamunan kaqläpa tumararmi Taanat-silupa päsararqan hasta Janoayaq.

⁷ Janoapita sur kaqläpa urarmi Atarot, Naarat y Jericópa päsar Jordán mayuyaq chärarqan.

⁸ Tapúapitanami inti jeqanan kaqläpa aywar Caná raqra kuchulanpa päsararqan Mediterráneo Lamaryaq. Saynömi Efraín trïbu runakuna ayllunpa ayllunpa chaskiyashqan posisionninpa lindërun karqan.

⁹ Efraín trïbu runakunapa mas wakin markankuna y caseriunkunapis pulan Manasés trïbu runakunapa posisionninchömi karqan.

¹⁰ Gezer markacho taq cananeo runakunata mana qarquyaptinmi kananyaqpis Efraín trïbu runakuna paykunawan juntu taykäyan. Isanqa say cananeo runakunata ashmaytano arusir munayninchömi sararäyan.