Jonás 2 - Tayta Diospa Wilakuynin

Tayta Diosta Jonás manakushqan

¹ 1 (2) Pescädupa pachanchömi Tayta Diosta Jonás kayno manakurqan:

² 2 (3) <

³ 3 (4) Lamarman winarpamaptikimi ruriyaq talpukashkä. Lamar yaku fiyupa pulchaqyar shamuqpis janäpami päsash.

⁴ 4 (5) Nawpaykipita qarqariykamashqaykitami yarpashkä. Saynöpis yarpashkä sagrädu templuykiman imaypis manana yaykunäpaq kashqantami.

⁵ 5 (6) Yaku pasaypa saparämaptinmi lamar rurincho kashkä. Yaku rurincho qewa winamuqpis umämanmi awrikash.

⁶ 6 (7) Pasaypa ruriyaqmi chashkä. Mananami yarqamunäpaq kashqanta yarpashkänasu. Tayta Dios, wanunäpaqna kaykaptï qammi salvamashkanki.

⁷ 7 (8) Wanuy wanuytana rikachakuykashqächömi qamta manakamushkä, Tayta Dios. Manakamushqätami santu templuykipita wiyamashkanki.

⁸ 8 (9) Ïdulukunata adoraqkunaqa Diospa kuyakuyninta wasqipäyanmi.

⁹ 9 (10) Noqami isanqa lapan shonqüwan agradëcikur sacrificiukunata qampaq rupasishaq. Qamta promitishqätaqa lapantami cumplishaq. Qamlami munayyuq kaykanki pitapis salvanaykipaq>>.

¹⁰ 10 (11) Saymi Tayta Dios mandaptin pescäduqa lamar kuchunman Jonásta aqturamurqan.