Job 3 - Tayta Diospa Wilakuynin

Yurishqanpita Job pësakushqan

¹ Saypitanami yurishqanpita pësakushpan

² Job nirqan:

³ <<¡Imapaqraq yurirqäpis! niyashqan sakay ama kanmansu karqan.

⁴ Manaraq yuriptï say junaq ushakäkunman karqan. Tayta Diospis say junaqta ama kamakäsinmansu karqan. Yurishqä höraqa pasapis ama waranmansu karqan.

⁵ Say junaq mana chämunanpaq fiyupa sakay sapakurkunman karqan. Yanawyaykaq pukutaypis sapakurkunman karqan.

⁶ Yurishqä sakayqa pasa mana waraypa kakunman karqan. Say junaq ama kanmansu karqan.

⁷ Say sakayqa pipis ama yurinmansu karqan. Iti yuriptinpis ama kushikuyanmansu karqan.

⁸ Leviatán waräkuyta mandaq brüjukunapis say junaqta maldicionayanman karqan.

⁹ Say tutaqa qoyllarkunapis waläla pasa waränanta shuyaräyanman karqan. Say junaqpaqqa pasapis ama waranmansu karqan. Inti jeqamur ama asikyanmansu karqan.

¹⁰ Kayno mana nakanäpaq say junaq mamäpa mädrinnin wichqakäkunman karqan.

¹¹ <<¿Imanirraq mamäpa pachancho wanukurqäsu? ¿Imanirraq yuriskilar ushakäkurqäsu?

¹² Yuriptï mamäpis melqayninman ama marqamanmansu karqan ni chuchumanmansu karqan.

¹³ Say höra wanukurqa imatapis mana mayaypami jitaräküman karqan.

¹⁴ Saymi jitaräküman karqan wanukuq reykunawan, mayor runakunawan y monumentuta sharkasiq runakunawan.

¹⁵ Saynölami jitaräküman karqan aska qorita y aska qellayta palaciuncho sararaq wanukuq runakunawanpis.

¹⁶ Shulutano pampaykamanman karqan. Mamanpa pachalancho wanush wamratano pampaykamanman karqan.

¹⁷ Wanukurqa yaqa runakunapis mana ali ruraykunata kachariyannami, mayjina aruqkunapis jitaräkuyannami,

¹⁸ autoridäkuna obligar arusiyashqan runakunapis mananami aruyannasu y capatazkuna olqutupäyashqantapis mananami wiyayannasu.

¹⁹ Wanukurqa pobripis y rïcupis ushakäyanmi. Saychöqa ashmaykunapis manami patronpa munayninchönasu kayan.

²⁰ <

²¹ Nakaqkunaqa wanuyta munarpis manami wanuyansu. Pampakuy qellayta ashiqno wanuyta ashirpis manami tariyansu.

²² Say runakunaqa kushikuyanqa sepultüraman charraqmi.

²³ ¿Imapaqnataq Tayta Dios kawasin lakishla kawayänanpaq kaptinqa? Kushish kawayta munaptinpis Tayta Dios manami kamakäsinsu.

²⁴ <

²⁵ Kanan nakashqäno manami imaypis nakayta yarparqäsu. Lapan mansarishqäkunami kanan päsaykäman.

²⁶ Manami jamaytapis ni punuytapis tarïsu. Ali kawanäpa trukanqa lakikularmi kawaykä>>.