Jeremías 52 - Tayta Diospa Wilakuynin

Sedequías Judá nacioncho rey kashqan

¹ Sedequías ishkay chunka juk (21) watayuq kaykarmi rey kayta qalaykurqan. Payqa chunka juk watami Jerusalénpita mandarqan. Mamanmi karqan Libna markapita Jeremíaspa surin Hamutal.

² Sedequíaspis taytan Joacimnölami Tayta Diosta mana cäsukur jusalikurqan.

³ Saymi Tayta Dios rabyakushpan Jerusaléncho taq runakunata y Judá nacioncho taq runakunata nawpanpita qarqurqan. Saypitanami rey Sedequías Babilonia nacionpa mandaqnin reypa contran sharkurqan.

Rey Sedequíasta Babilonia runakuna prësu sariyashqan

⁴ Saymi rey Nabucodonosor lapan soldädunkunawan Jerusalén simpanman chaykur campamentuta rurayarqan. Saypitanami marka murälla waqtanpa alpata muntunasiyarqan saypa wisar atacayänanpaq. Sayno päsarqan Sedequías esqun wata rey kaykaptinmi. Nabucodonosor Jerusalénman chashqan junaq karqan chunka kaq killacho chunka kaq junaqmi.

⁵ Jerusalénta sayno jiruruypa saparäyarqan hasta Sedequías chunka juk wata mandar qalaykushqanyaqmi.

⁶ Runakuna mikuyänanpaq imapis mana kaptinmi chusku kaq killacho esqun junaqchöna

⁷ marka murällata uchkuriyarqan. Babilonia soldädukuna markata saparaykäyaptinmi Jerusaléncho soldädukuna sakaypa qeshpir reypa huertanpa päsar ishkay murälla punkupa yarquyarqan. Saypitanami Arabá pampapa aywaq nänipa aywakuyarqan.

⁸ Sayno qeshpiykäyaptinmi Babilonia soldädukuna rey Sedequíasta taripaykur Jericó pampacho sariyarqan. Saymi Sedequíaspa soldädunkuna kachariykur wakpa kaypa qeshpir aywakuyarqan.

⁹ Rey Sedequíasta sayno prësu sariykurmi Babilonia nacionpa mandaqnin rey Nabucodonosorman apayarqan. Nabucodonosorqa kaykarqan Hamatcho kaykaq Ribla markachömi. Saycho juzgarmi

¹⁰ rey Sedequías rikaraykaptin surinkunata wanusiyarqan. Saynölami Judá nacionpa autoridäninkunatapis wanusiyarqan.

¹¹ Kikin Sedequíastanami ishkan nawinkunata jorquskir cadinawan watarkur Babiloniaman prësu apayarqan. Saychömi wanushqanyaq prësu wichqararqan.

Babilonia runakuna templuta juchusiyashqan y runakunata prësu apakuyashqan

¹² Nabucodonosor chunka esqun watana Babiloniapa mandaqnin rey kaykaptinmi pisqa killacho y chunka kaq junaqcho Nabuzaradán Jerusalénman charqan. Nabuzaradánqa karqan Nabucodonosorpa wardiankunapa capitanninmi.

¹³ Jerusalénchömi Tayta Diospa templunta, reypa palaciunta, lapan wayikunata y autoridäkunapa despächunkunatapis rupasir ushayarqan.

¹⁴ Nirkurnami Jerusalén markapa murällanta soldädukuna juchusir ushayarqan.

¹⁵ Saypitanami Jerusaléncho quëdaq runakunata Babiloniaman Nabuzaradán prësu aparqan. Saynöpis aparqan wakin muchuqkunata, Babilonia reypa favornin sharkuq runakunata y nawpata mana apayashqan artesänukunatapis.

¹⁶ Mas muchuqkunatami isanqa jinalancho kachaykurqan chakrakunata aruyänanpaq y üvakunata uryayänanpaq.

¹⁷ Saynöpis pakiykarmi ushayarqan templucho broncipita rurash jatunkaray columnakunata, carrëtakunata y lamar niyashqan jatunkaray lavatoriutapis. Nirkurnami say pakiyashqan broncita Babiloniaman apakuyarqan.

¹⁸ Saynölami apakuyarqan uchpa shuntakuyänankunata, pälakunata, lipta jorqukuyänankunata, tazonkunata, wishlakunata y wakin manëjukunatapis. Say manëjukunami broncipita rurash karqan sacrificiukunata rupasir manijayänanpaq.

¹⁹ Saynölami capitán Nabuzaradán apakurqan inciensu qoshnisikuyänankunata, shansha apakuyänankunata, tazonkunata, uchpa shuntakuyänankunata, candelabrukunata, wishlakunata y väsukunata y lapantapis qoripita y qellaypita kaqkunata.

²⁰ Apakuyashqan broncita manami pësaytapis atipäyarqansu. Say bronci karqan ishkay columnakunapita, lamar niyashqan jatunkaray lavatoriupita, lavatoriu jamaränanpaq rurasishqan chunka ishkay törukunapita y carrëtakunapita. Saykunata rey Salomónmi Tayta Diospa templunpaq rurasish karqan.

²¹ Templu punkucho columnakunaqa puwaq metruno largumi kayarqan. Rakunnami pisqa metru pulanno karqan. Raktaynin karqan qanchis centïmetrumi. Say columnakunapa shonqunqa uchkumi karqan.

²² Columna puntancho ishkay metrunömi broncipita rurash tumaypa adornun karqan. Say adornuqa intëru kuchunpa awash shikra niraqmi kaykarqan. Shikrapita warkuränanpaqmi broncipita rurash granäda niraqkunapis kayarqan. Jukaq columnapis say niraqlami karqan.

²³ Cada columnachömi karqan esqun chunka soqta (96) granäda niraqkuna. Puntancho kaq adornuchömi pachak (100) granäda niraqkuna kayarqan.

²⁴ Mandaq cüra Seraíastanami wardiakunapa capitannin Nabuzaradán prësu sarirqan. Paytawanmi prësu sarirqan mandäsiqnin cüra Sofoníasta y templu punkuta täpakuq kimsa runakunatapis.

²⁵ Saynölami prësu sarirqan soldädukunapa capitanninta, reyta yäsiq qanchis runakunata, lëva shuntaq capitanta y soqta chunka (60) mayor runakunatapis.

²⁶ Babilonia nacionpa mandaqnin rey Nabucodonosor Ribla markacho kaptinmi wardiakunapa capitannin Nabuzaradán lapan say prësu sarishqan runakunata Riblaman aparqan.

²⁷ Saychömi Nabucodonosor nirqan say runakunata wanusiyänanpaq. Saynöpami Judá runakunata wakinta wanusiyarqan y wakintana juk nacionman apakuyarqan.

²⁸ Kaychömi qelqaraykan Judápita ayka runakunata Nabucodonosor prësu apasishqanpis. Qanchis watana rey kaykar Nabucodonosor prësu apasirqan kimsa waranqa ishkay chunka kimsa (3,023) Judá runakunatami.

²⁹ Chunka puwaq watana rey kaykarmi Jerusalénpita Nabucodonosor prësu apasirqan puwaq pachak kimsa chunka ishkay (832) runakunata.

³⁰ Ishkay chunka kimsa (23) watana Nabucodonosor rey kaykaptinmi wardiakunapa capitannin Nabuzaradán prësu apasirqan qanchis pachak chusku chunka pisqa (745) Judá runakunata. Lapan apasishqan runakuna kayarqan chusku waranqa soqta pachak (4,600) runakunami.

Babiloniacho carcilpita Joaquínta jorqushqan

³¹ Babiloniapa mandaqnin rey Evil-merodac mandayta qalaykushqan watami Judá nacionpa mandaqnin rey Joaquínta kuyapar carcilpita jorqasirqan. Sayno jorqasirqan Babiloniaman prësu apayashqan kimsa chunka qanchis (37) watatana ushaykäyaptin y chunka ishkay kaq killacho ishkay chunka pisqa (25) junaqchömi.

³² Shakya shakya parlaparmi Joaquíntaqa Babiloniacho prësu kaykaq reykunapitapis mas ali rikarqan.

³³ Saynöpami rey Joaquínqa carcilcho kashqan mödananta trukakuskir Babilonia nacionpa mandaqnin reywan imaypis juntu mikurqan.

³⁴ Gastunkunapaqpis wanushqanyaqmi waran waran qellayta reypita chaskirqan.