Jeremías 10 - Tayta Diospa Wilakuynin

Ïdulukuna manakaqla kayashqan

¹ Israel runakuna, Tayta Dios niyäshushqaykita wiyakuyay.

² Tayta Diosmi nin: <

³ Say runakunaqa imapaqpis mana väliq ïdulukunamanmi yärakuyan. Say ïdulukunata rurayänanpaqqa muntipitami qeruta muturayämun. Laqlayta yachaq runawanmi shumaq laqlarasiyan.

⁴ Qoriwan y qellaywan adornarkurmi mana qotukänanpaq shumaq clävayan.

⁵ Say ïdulukunaqa kaykäyan chakracho nunayluno mana parlaqmi. Puriyta mana puëdiptin umrushqami apayan. Say ïdulukunataqa ama mansayaysu. Manami alitapis ni mana alitapis rurayansu>>.

⁶ Tayta Dios, qamnöqa manami pipis kansu. Qamqa lapanpaq munayyuqmi kaykanki.

⁷ Maysay nacionkunapa mandaqnin reymi kaykanki. Sayno kaykaptikiqa ¿piraq mana mansapakushunkimansu? May nacioncho yachaq runapitapis mas yachaqmi kaykanki. Pïmay reypitapis mas munayyuqmi kaykanki. Sayno kaykaptikiqa ¿piraq mansapakushunkimansu?

⁸ Ïduluta ruraqkunaqa lapanpis yarpayniynaq mana tantiyakuqmi kaykäyan. Qerupita rurash ïduluqa ¿imataraq runakunata yachasinqa?

⁹ Say ïdulukunataqa laqlayta yachaqkunalami rurayan. Laqlarkurmi Tarsispita apayämushqan qellaywan y Ufazpita apayämushqan qoriwan enchapayan. Nirkurmi azul y granäti tëlata jirarkur jatipäyan.

¹⁰ Rasunpa kaq Diosqa Tayta Dioslami kaykan. Paymi imayyaqpis kawaq Dios kar imaypis rey kaykan. Pay rabyanaptinqa kay pasapis suksukyanmi. Pay castigaptinqa manami may nacionpis awantansu.

¹¹ Tayta Diosmi kayno nimarqan: <<Ïdulukunata adoraqkunata niy: >>.

¹² Tayta Diosmi munayninwan kay pasata kamash. Yachaq kayninwanmi kay munduta takyasish. Yarpayyuq kayninwanmi jana pasatapis kamakäsish.

¹³ Pay mandaptinmi ciëlucho kaykaq yakupis qaparämun, pukutaypis pasapa kuchunpita sharkamun, tamyashqan höra elquypis asikyämun y wayrapis churaräkunanpita yarqaramun.

¹⁴ Runakunaqa lapanpis upano imatapis mana tantiyaqmi kaykäyan. Ïdulukunata rurayashqanpitami penqakuyanqa. Say ïdulukunaqa manami imatapis rurayansu. Runakuna yärakuyaptinpis manami yanapäyansu.

¹⁵ Manakaqlapaqmi kaykäyan. Tayta Dios castiganan junaqmi say ïdulukuna ushakäyanqa.

¹⁶ Jacob yärakushqan Tayta Diosqa manami ïdulukunanösu. Paymi lapan imaykatapis kamash. Herencian kanansipaqmi Israel runakunata akramashkansi. Jutinpis lapanta mandaq Yahwehmi kaykan.

Judá nacionta asulashqan

¹⁷ Judá runakuna, imaykaykikunatapis kamarikuyay. Contraykikuna jiruruparaykäyäshunkinami prësu apayäshunaykipaq.

¹⁸ Tayta Diosmi nin: <>.

¹⁹ Marka mayïkunapaq lakikuptïmi shonqu nanay fiyupa sariman. Kay nanaytaqa manami awantänasu. Sayno kaptinpis alfin imanäshaqtaq.

²⁰ Tänä toldüpis chipyaq qasukarmi ushakash. Sararaq waskankunapis rachirmi ushakash. Surïkunatapis lapantami prësu apakuyash. Manami juklaylapis quëdashsu. Pïnïpis manami kannasu yapay toldüta ichisinanpaq ni cortïnankunata churananpaqpis.

²¹ Sayno desgracia päsash rey y autoridäkuna yarpayniynaq upa kar Tayta Diosta mana ashiyashqanpitami. Saymi lapan runakunapis maysaypa mashtakäyash.

²² Judá runakuna, ¡lapayki wiyayay! ¡Nortiläpitami mana ali wilapa chämush! Markansikunata elaqäsiyänanpaqshi aska soldädukuna punta punta aywaykäyämun. Paykuna ushakäsimaptinsi chacalkunalanami markansikunachöpis täyanqa.

Tayta Diosta Jeremías manakushqan

²³ Tayta Dios, qamlami musyanki waray warantin imano kayänäpaq kashqantapis. Sayqa manami kikïkunapitasu kaykan, sinöqa qampitami.

²⁴ Corrigirpis mana rabyakuylapa corrigiyämay. Rabyash corrigiyämarqa elaqaskasiyämankichir.

²⁵ Rabyash elaqäsiyämänaykipa trukan juk nación runakunata elaqaykasilay. Kuyashqayki Israel runakuna kaykäyaptïmi say runakunaqa ushakäsiyämash. Intëru kay nacionnikitami chipyaq ushakäsiyash. Say runakunaqa manami jutikitapis joqariyansu ni reqiyäshunkisu.