Isaías 9 - Tayta Diospa Wilakuynin

Rey yurinanpaq nishqan

¹ 1 (8.23) Nakaqkunapaq pasa sakashno kaptinpis manami imayyaqpis saynölasu kanqa. Zabulón trïbu y Neftalí trïbu runakunata penqayman Tayta Dios churash kaptinpis shamuq watakunachöqa paykunapaq kushikuy kanqami. Paykuna täyashqan partiqa Galilea partimi kaykan. Saypami päsan lamar kuchunpa aywaq nänipis y Jordán mayupis. Saychömi mana Israel runakunapis taykäyan.

² 2 (1) Sakäpakushno kawarpis asikyayta rikaqnömi salvacionninta rikayanqa. Yanawyaykaqchöno kawayaptinpis salvacionninqa aksinömi kanqa.

³ 3 (2) Kuyashqayki runakunatami yanapashkanki. Kushikuytapis shonqunkunamanmi churashkanki. Cosëcha wisan kushikuqnöraqmi nawpaykicho kushikuyanqa. Riquëzata rakipänakur kushikuyashqannöraqmi kushikuyanqa.

⁴ 4 (3) Contrapartinkunata ushakäsirmi paykunapa munayninpita salvanki. Unay ayllunkunata madianita runakunapa munayninpita jorqushqaykinömi yapaypis salvanki.

⁵ 5 (4) Guërra manana kaptinnami soldädukuna jatikuyashqan bötaskunatapis rupasiyanqa. Guërracho pelyayashqan yawarlana mödanankunatapis kayayanqami.

⁶ 6 (5) Tayta Dios sayno salvamäshun juk wamra yuriptinmi. Paymi yurinqa winarkur mandamaqninsi kananpaq. Paypa jutinmi kanqa Admiraypaq Tantiyasimaqninsi, Contrankunata Vinciq Dios, Imayyaqpis Kawaq Taytansi y Ali Kawayta Qomaqninsi.

⁷ 7 (6) Rey David jamashqan trönuman jamaykurmi imayyaqpis mandamäshun. Munaynincho kashpansimi imaypis ali kawashun. Tayta Dios munashqannöla mandarmi ali kaqlata imaypis ruranqa. Lapanta mandaq Tayta Dios kuyamashpansimi sayno kananpaq kamakäsinqa.

Israel nacionta Tayta Dios castigananpaq nishqan

⁸ 8 (7) Jacobpita miraq Israel runakunata llëvasinanpaqmi Tayta Dios wilakasish. Llëvasinanpaq wilakasishqannölami castiganqa.

⁹ 9 (8) Saytaqa Samaria markacho taqkuna y Efraín runakuna lapanpis tantiyayanqami. Paykunami chölu tukuyashpan niyan:

¹⁰ 10 (9) <>.

¹¹ 11 (10) Sayno nikäyaptinmi rey Rezínta atacayänanpaq contrapartin runakunata Tayta Dios kachamunqa.

¹² 12 (11) Inti jeqamunanpitami Siria runakunatapis kachamunqa. Inti jeqanan kaqläpitanami filisteo runakunatapis kachamunqa. Paykunami Israel runakunata juk amuy mikukurkuqnöla ushakäsiyanqa. Tayta Dios sayno castigarpis jinalami rabyash kanqa. Yapay castigananpaqpis kamarikushlami kaykan.

¹³ 13 (12) Sayno castigaptinpis runakuna manami wanakuyanqasu. Lapanta mandaq Tayta Diosmanpis manami yärakuyanqasu.

¹⁴ 14 (13) Saymi Tayta Dios juk junaqlacho Israel nacionpa umanta y chupanta roqurinqa. Palmatapis muturinqa y utututapis achurinqami.

¹⁵ 15 (14) Israel nacionpa umanqa kaykan mayor runakuna y mandaqkunami. Chupannami kaykan lula profëtakuna.

¹⁶ 16 (15) Israelcho mandaqkuna engañakuq kayaptinmi runakuna oqrakashno kaykäyan.

¹⁷ 17 (16) Lapan runakunapis mana yärakunala, mana alita ruraqla y manakaqkunata parlaqlami kaykäyan. Saymi maqtakunatapis, waksakunatapis y viüdakunatapis mana kuyapaypa Tayta Dios castiganqa. Paykunata sayno castigarpis jinalami rabyash kanqa. Yapay castigananpaqpis kamarikushlami kaykan.

¹⁸ 18 (17) Runakuna mana ali rurayashqanqa shatatapis kashatapis bunyaypa bunyar rupaq ninanömi kaykan. Muntita rupar qontaywan sharkuq ninanömi kaykan.

¹⁹ 19 (18) Saymi lapanta mandaq Tayta Dios rabyash castigashqanqa intëru nacioncho rupaq ninano kanqa. Oqshata nina rupar ushaqnömi runakunatapis ushakäsinqa. Say wisanqa manami pipis runa mayinta kuyapanqasu.

²⁰ 20 (19) Aluqnincho tariyashqanta mikurpis jinalami malaqaykäyanqa. Isuqnincho tariyashqanta mikuyaptinpis manami pachankuna juntanqasu. Surinkunatapis mana kuyapaypami mikuyanqa.

²¹ 21 (20) Manasés runakunawan Efraín runakuna pelyayanqami. Ishkan shuntakaykurnami Judá runakunawanpis guërrata rurayanqa. Sayno pelyayanqa Tayta Dios paykunata castigar kamakäsiptinmi. Sayno castigarpis jinalami rabyash kanqa. Yapay castigananpaqpis kamarikushlami kaykan.