Isaías 61 - Tayta Diospa Wilakuynin

Israel runakuna salvash kayänanpaq wilakushqan

¹ Tayta Dios akramash karmi Espïritunta noqaman kachamush. Paymi kachamash pobrikunata ali wilakuyninta wilanäpaq, lakish kawaqkunata shakyäsinäpaq, juklä nacionman prësu aywaqkuna librina kayashqanta wilanäpaq y carcilcho wichqaraykaqkunatapis yarqayämunanpaq kashqanta wilanäpaq.

² Saynöpis Tayta Dios kachamash pay salvananpaq kaq tiempu chämushqanta wilakunäpaq, contransikunata jusalikuyashqanman tupu castigananpaq kashqanta wilakunäpaq y waqaqkunatapis shoqanäpaqmi.

³ Sióncho lakish kaqkunata shumaq tantiyasirmi shakyäsishaq. Saymi umankunaman uchpata winakuyänanpa trukan corönatana jatikuyanqa, lütuta jatikuyänanpa trukan aceitiwanna lushikuyanqa y lakish kayänanpa trukan kushishna cantayanqa. Sayno kaptinmi Tayta Dios plantashqan kuyaylapaq encina jachano kayashqanta niyanqa. Saynöpami Tayta Diosta pïmaypis alabayanqa.

⁴ Unay juchusiyashqan raqäkunatapis alsasiyanqami. Markakuna pasaypa ushakash kaptinpis yapaymi sharkasiyanqa.

⁵ Kuyashqä runakuna, uywaykikunatapis jäpa runakunami misipäyäshunkipaq. Chakraykikunata y üva plantaykikunatapis paykunami arupäyäshunkipaq.

⁶ Saynöpis Tayta Diospa cürankuna kayashqaykitami niyäshunkipaq. Tayta Diosninsita sirviq kayashqaykitami parlayanqa. Juklä nación runakunapa riquëzankunawanmi quëdayankipaq. Seqaypa chanin cuestaq adornunkunata jatikurmi kushikuyankipaq.

⁷ Nawpata fiyupa penqayman y manakaqman churarkuyäshushpaykipis respitayäshushpayki favornikinami parlayanqa. Aska riquëzata chaskirmi nacionnikicho imayyaqpis kushish kawayanki.

⁸ Tayta Diosmi nin: <

⁹ Qamkunapita miraqkuna maysay nacionchöpis y markakunachöpis reqishqami kayanqa. Qamkunata yanapashqäta pïmaypis tantiyakuyanqami>>.

¹⁰ Tayta Diosnï yanapämaptinmi kushikuypita shonqüpis asikyarkun. Paymi salvación mödanata jatipämash. Kuyaylapaq mödanänömi ali ruraykunapis kaykan. Casarananpaq shumaq trukakush maqtanömi kaykä. Casaraq jipash kuyaylapaq mödanan jatish kaykaqnömi kaykä.

¹¹ Maysay nacionchöpis alilatana rurar payta alabayänanpaqmi Tayta Dios kamakäsinqa. Qewata jeqasimushqanno y huertacho plantata sheqlisimushqannömi salvacionta chäsimunqa.