Isaías 4 - Tayta Diospa Wilakuynin

¹ Say wisan walkalanami kawaykar quëdaqkuna kayanqa. Saymi qanchis warmikuna juk runalata ruwakur niyanqa: <>.

Shamuq watakunacho kushish kawayänanpaq nishqan

² Say wisanmi Tayta Dios sheqlisimushqan kuyaylapaq y kushikuypaq kanqa. Mikuy ali poquptinmi kawaykar quëdaqkuna kushish y respitash kawayanqa.

³ Saymi Sión lömacho quëdaqkunapaq y Jerusaléncho kachaykuyashqan kaqkunapaq runakuna niyanqa: <>. Say niyashqannömi kayanqa lapanpis Jerusaléncho padrunash kaqkuna.

⁴ Jerusalén runakunata Tayta Dios castigarmi jusalikuq kayashqanpita y wanusikuq kayashqanpitapis maylanqa.

⁵ Nirkurmi yana pukutayta yurisimur Sión lömata y saycho shuntaraykaq runakunata lantupanqa. Say pukutaymi jatun toldu mashtaraykaqno paykunata lantupanqa. Sakaypanami fiyupa asikyaykaq ninata yurisimunqa. Say jananchömi Tayta Diospa chipipiynin rikakämunqa.

⁶ Saynöpami fiyupa shanaypis rupanqasu ni tamyapis oqunqasu ni shukukuypis apanqasu.