Isaías 34 - Tayta Diospa Wilakuynin

Edom nacionta castigananpaq nishqan

¹ Maysay nacioncho taqkuna, wiyayämänaykipaq shayämuy. Maysay markacho taqkunapis, shuntakäyämuy. Kay pasa y kay pasacho kaqkunapis, lapayki wiyayämay.

² Lapan nacionkunapaqpis Tayta Dios rabyashqami kaykan. Nacionkunapa soldädunkunapaqpis rabyashqami kaykan. Paymi lapan nacionkunata chipyaq ushakäsinqa.

³ Wanuqkunapa ayankunapis ismur fiyupa asyarmi jitaräyanqa. Raqrakunapapis yakunöraqmi yawar aywanqa.

⁴ Ciëlucho kaqkunapis sulurmi ushakäyanqa. Röllu luylukaykaqnömi ciëlupis luylukäkunqa. Qoyllarkunapis sakish rapranömi shikwayämunqa. Üva jachapa y hïgus jachapa sakish raprannömi shikwayämunqa.

⁵ Tayta Diospa espädan jana pasapita shamurmi Edom nación runakunata ushakäsinqa. Paykunata castigar ushakäsinanpaqmi Tayta Dios destinash.

⁶ Runakunata ushakäsirmi Tayta Diospa espädan yawarlana y wiralana kanqa. Bosra markacho runakunata wanusirmi Tayta Diospaq sacrificiuta pishtapakuqno kanqa. Tayta Diospa espädan uyshakunapa y chïvukunapa yawarninwan pasaypa pichushqami kanqa. Carnikunapa rurunninpa wiranwan nitishqami kanqa.

⁷ Saychömi törunöraq kalpasapa runakunapis ushakäyanqa. Turïtuno geniu maqtakunapis chipyaqmi wanuyanqa. Maysaychömi yawar mashtaranqa. Alpapis wirawan pichukashqami kanqa.

⁸ Say wisanmi Sión runakunapa chikiqninkunata Tayta Dios ushakäsinqa.

⁹ Ushakäsiptinmi chikiqninkuna täyashqan nacioncho raqrakunapa yaku aywananpa trukanqa breana aywanqa. Alpapis azufrimanmi tikranqa. Chakrakunapis breanöraqmi rupanqa.

¹⁰ Paqasta junaqtapis mana upiypa rupaptinmi qoshtayla sharkuykanqa. Sayno ushakäsiptinmi imayyaqpis sunyaqla kakunqa. Saypaqa pipis mananami purinqanasu.

¹¹ Saychöqa täyanqa pelïcanuwan iwsankilami. Tukuwan akakluylami qeshunkunata saycho rurakuyanqa. Tayta Dios chipyaq asulaptinmi imapis say nacioncho kanqanasu.

¹² Manami reypis ni autoridäkunapis mandayänanpaq kayanqanasu.

¹³ Palaciukunachöpis shirakalanami shatayanqa. Murallash markakunachöpis ishankawan cardón kashakunalanami juntanqa. Chacalkuna täkuyänan y avestruzpa pushapankuna punukunalannami rikakunqa.

¹⁴ Jirka uywakunawan hienakunami saycho täyanqa. Jirka cabrakunalanami saycho waqapänakuyanqa. Chushiqkunalanami pipis mana mansakäsish saycho täkuyanqa.

¹⁵ Tukukunapis saychömi runtunkunata oqlayanqa. Pashtasiyashqan pushapankunatapis saychömi oqlaräyanqa. Wiskurkunapis chinan orqumi saycho shuntakäyanqa.

¹⁶ Sayta musyayänaykipaq Tayta Dios qelqasishqan rölluta liyiyay. Saycho qelqarashqannölami lapanpis chinan orqu kayanqa. Tayta Dios nishqannölami say uywakuna saycho täyanqa. Saycho kayänanpaqmi Espïritun shuntanqa.

¹⁷ Kikinmi saycho täyänanpaq say uywakunata churanqa. Saymi imaypis saycho täkuyanqa.