Isaías 25 - Tayta Diospa Wilakuynin

Tayta Diosta alabar cantashqan

¹ Tayta Dios, qamlami Diosnï kaykanki. Pipis mana rurashqanta rurashqaykipitami jutikita joqarir imaypis alabashayki. Unaypita pasa promitishqaykita imaypis cumplinkimi.

² Chikimaqnï jäpa runakunapa markanta ranralamannami tikrasishkanki. Amparakuna ali murallash markankunatapis raqälatanami kachaykushkanki. Palaciunkunatapis juchusir ushakäsishqaykita manami imaypis alsayanqanasu.

³ Sayno rurashqaykita rikarmi juk nacioncho munayyuq runakunapis munayyuq kashqaykita wilakuyanqa. Juk marka kalpasapa runakunapis qamta mansapakuyäshunkimi.

⁴ Pobrikunapa favorninmi sharkunki. Pïninpis mana kaqkunata sapankimi. Mangäda mana ushananpaq pakakunanmi kanki. Fiyupa shanay rupaptinpis lantupankimi. Fiyu runakunaqa runa mayinta nakasiyanmi. Löcu tamya tapiata juchusiqnömi kaykäyan.

⁵ Saynöpis saki jirkacho shanay rupaqnömi kaykäyan. Jina kaqtami olquykaqtapis upälasinki. Pukutaywan intita saparkuqnömi upälasinki.

Banquëtita Tayta Dios rurasinanpaq nishqan

⁶ Sión lömachömi lapanta mandaq Tayta Dios maysay nación runakunapaq banquëtita rurasinqa. Say banquëtichömi kanqa ali mikuy y ali vïnupis. Maypis mikukuy munaymi mikuypis y maypis upukuy munaymi vïnupis kanqa.

⁷ Say lömacho lapan markakunata saparaq yana mödanata y lapan nacionkunata saparaq mortäjata ushakäsiptinmi

⁸ wanuypis kanqanasu. Waqaqkunatapis kikin Tayta Diosmi shoqashpan weqinta pisapanqa. Kuyashqan runakuna manami penqaycho kayanqanasu. Sayno kananpaqmi Tayta Dios nin.

⁹ Say wisanmi runakuna niyanqa: <>.

¹⁰ Sión lömacho runakunata Tayta Diosmi imapitapis sapanqa. Moab naciontami isanqa qanra jitakunacho oqshata jarukuqno

¹¹ ali chölu tukushqanpita ushakäsinqa. Qanra jitakunapita sharkuyta mana kamäpakuqnömi Moab nacionpis imanöpa sharkuytapis kamäpakunqasu.

¹² Tayta Diosmi markapa altunnin murällankunatapis chipyaq juchusir ushanqa.