Isaías 24 - Tayta Diospa Wilakuynin

Lapan runakunata Tayta Dios castigananpaq kashqan

¹ Kay pasata fiyupa kuyusirmi lapantapis Tayta Dios ushakäsinqa. Runakunata wakpa kaypami qarqunqa.

² Say junaqqa pampa runapis, cürapis, patronpis, olqu ashmaypis, patrönapis, warmi ashmaypis, rantiqpis, rantikuqpis, manaq kaqpis, manakuq kaqpis, rïcupis, pobripis lapanmi nakayanqa.

³ Kay pasata ushakäsirmi sunyaraykaqta kachaykunqa. Sayno kananpaqmi Tayta Dios nin.

⁴ Jacha sakir ushakaqnömi kay pasapis ushakanqa. Jana pasapis kay pasapis fiyupami lakikuyanqa.

⁵ Sayno kananpaqqa kay pasacho runakunami jusayuq kaykäyan. Paykuna Tayta Diospa leyninkunata ni estatütunkunatapis manami cumpliyansu. Imayyaqpis cäsukunansipaq rurayashqan pactutapis manami cumpliyansu.

⁶ Sayno kayaptinmi kay pasata Tayta Dios maldicionar ushakäsinqa. Kay pasacho taqkunapis nakayanqami. Walkaqlanami kawaykar quëdayanqa.

⁷ Üva plantakunatapis qeshyami ushanqa. Vïnupis manami kanqanasu. Nawpata kushish kawaqkunapis lakishnami kawayanqa.

⁸ Panderëtatapis mananami tukayanqanasu. Fiestata manana rurayaptin kushikuypis kanqanasu ni arpapis waqanqanasu.

⁹ Versuyashpan vïnutapis manami upuyanqanasu. Imayka shinkäsikuqta upuyaptinpis iwjinqami.

¹⁰ Tayta Diosta mana cäsukuq runakunapa markan juchushnami kanqa. Wayinkunaman mananami pipis yaykunqanasu.

¹¹ Vïnu muchuy kaptinmi cällikunacho waqayanqa. Lakikuylana maysaychöpis kaptinmi pipis kushikunqanasu.

¹² Raqälatanami markata kachaykuyanqa. Marka punkukunatapis pakirmi ushayanqa.

¹³ Walkalanami runakuna kay pasacho kayanqa. Olïvuta cosechar shoqshiyaptin juk ishkaylana yürancho quëdashqannömi kayanqa. Üva palapi juk ishkaylana quëdashqannömi quëdayanqa.

¹⁴ Kawaykar quëdaq runakunaqa kushikuyanqami. Tayta Dios imanöpis rurashqanta rikarmi inti jeqanan kaqlächo taqkunapis cantayanqa.

¹⁵ Inti jeqamunan kaqlächo taqkunapis Tayta Diostami alabayanqa. Lamar kuchuncho taqkunapis Israel runakunata kuyaq Tayta Diostami alabayanqa.

¹⁶ Kay pasapa juk kuchunpita jukaq kuchunyaqmi alabayanqa. <<¡Alilata ruraq Tayta Diosta alabashun!>> nir cantayashqanmi wiyakanqa. ¡Sayno kaptinpis fiyupa lakishqami kaykä! ¡Shonqüpis nanayparaqmi lakikun! ¡Fiyu runakunaqa traicionërumi kayan! ¡Kuyapäkuyninpis manami kansu!

¹⁷ Kay pasacho taqkuna pasaypami mansariyanqa. Uchkuman y trampaman jeqashnömi kayanqa.

¹⁸ Löcu tamyami fiyupa tamyamunqa. Kay pasata tuknarämuqkunapis pasaypami suksukyäyanqa. Mansariypaq kaptinmi qeshpiq kaqqa uchkuman jeqanqa. Uchkupita yarquq kaqnami toqlaman ishkinqa.

¹⁹ Kay pasa fiyupa mansariypaqmi suksukyanqa. Saymi maysaychöpis rachir ushakanqa.

²⁰ Machash runa sankapaykachaykaqnömi rikakunqa. Sukla ushakashqannölami ushakanqa. Runakuna jusalikuyashqanqa kay pasata fiyupami lasaykan. Saymi lasaq qepiwan sharkuyta mana puëdiq runanöla kay pasapis lasäsikunqa.

²¹ Say junaqmi jana pasacho kaq munayyuqkunatapis Tayta Dios castiganqa. Kay pasacho kaq reykunatapis castiganqa.

²² Lapanta shuntarkurmi pözuman winaqno prësu wichqaräsinqa. Saycho aska wata wichqararkasirmi fiyupa castiganqa.

²³ Lapanta mandaq Tayta Dios Sión lömapita mandamuptinmi killapis penqakunqa. Intipis manami asikyanqanasu. Jerusaléncho chipipiykaqta y munayyuq kashqanta mayor runakunapis rikayanqami.