Isaías 23 - Tayta Diospa Wilakuynin

Tiro y Sidón markakunata ima päsananpaq kaqtapis nishqan

¹ Kaychömi qelqaraykan Tiro markata ima päsananpaq kaqtapis Tayta Dios revelashqan. ¡Jatusaq büqui manijaq runakuna, lakikuyashpayki fiyupa waqayay! ¡Tiro markata ushakäsirmi büquiwan chäyänayki puertukunatapis ushakäsiyanqa! Sayno ushakasiyänanpaqmi Quitim islapita pasa wilakayämunqa.

² ¡Lamar kuchuncho taq Sidón runakuna, pasaypa lakikuyay! Qamkunami negocianti kar büquikunawan maysaymanpis aywayanki.

³ Jatunkaray lamarpa päsarmi mikuytapis rantiyämunki. Say mikuyqa Nilo mayu pampakunacho wayuq mikuymi kaykan. Qamkunawanmi maysay nación runakuna negociuta rurayan.

⁴ Lamar kuchuncho kaykaq Sidón runakuna, ¡fiyupa penqakuyay! Tiro marka ushakash kaptinmi kikin lamarpis lakikur nikan: <>.

⁵ Tiro marka ushakashqanta musyaykur Egipto runakunapis fiyupami lakikuyanqa.

⁶ ¡Lamar kuchuncho taqkuna, Tarsisman aywaykur fiyupa waqayay!

⁷ Tiro markaqa unay markami karqan. Saychöqa imaypis fiestalami kakuq. Tiro runakuna maysaychömi mushuq markakunatapis sharkasiyaq.

⁸ Say markakunachömi mandaq reykunatapis churayaq. Tiro markapita puriq negociantikunaqa maysaychöpis reynöraqmi respitash kayaq. Tiro markata ushakäsiyänanpaq pï kamakäsishqantapis tantiyakushun.

⁹ Lapanta mandaq Tayta Diosmi kamakäsish runa tukuqkunata penqakasishpan y munayyuq runakunatapis manakaqman churashpan.

¹⁰ Tarsis runakuna, lamar kuchuncho büquikuna ichiräyänanpaq puertukuna manami kannasu. Kananqa büquiwan mikuyta apayämunaykipa trukan kikikikunana Nilo mayucho taq runakunano mikuyta murupakuyay.

¹¹ Tayta Diosmi lamar jananpa makinta joqarir maysay nacionkunata suksukyäsish. Canaáncho amparakuna corralash markakunata ushakäsiyänanpaqmi nish.

¹² Sidón marka runakunatami nish: <>.

¹³ ¡Tantiyakuyay Babilonia markata imano ushakäsiyashqantapis! Yaykur atacayänanpaqmi Asiria runakuna törrikunatapis sharkasiyash. Markaman yaykurmi palaciunkunatapis raqälatana kachaykuyash. Kananqa jirka uywakunalanami saycho täyan.

¹⁴ ¡Büqui manijaq Tarsis runakuna, lakikur waqayay! ¡Büqui chänan puertukunapis manami kannasu!

¹⁵ Ushakashqanpita qanchis chunka (70) watayaqmi Tiro markata pipis yarpanqasu. Say watakuna kanqa qanchis chunka wata rey kawashqannömi. Qanchis chunka wata cumplirkuptinqa prostitütapaq runakuna cantayashqannömi Tiro markapaqpis cantayanqa. Cantarmi niyanqa:

¹⁶ <>.

¹⁷ Qanchis chunka wata cumplirkuptinqa Tiro markata yapaymi Tayta Dios yanapanqa. Saymi say markacho taq runakuna yapay rantikur qalaykuyanqa. Yapaymi maysay nación runakunawan negociuta rurayanqa.

¹⁸ Isanqa manami kikinkunapaqnasu gänayashqanta shuntayanqa, sinöqa Tayta Diospaqnami. Tiro runakuna gänayashqanwanmi Tayta Diosta sirviqkuna pacha junta mikuyanqa y ali mödanata jatikuyanqa.