Isaías 2 - Tayta Diospa Wilakuynin

Jerusalénman Diosta adoraq aywayänanpaq nishqan

¹ Kaychömi qelqaraykan Amóspa surin Isaíasta Tayta Dios revelashqan. Say revelacionchömi rikasirqan shamuq watakunacho Judá nación y Jerusalén marka imano kananpaq kashqantapis.

² Shamuq watakunachömi Tayta Diospa wayin kaykashqan lömaqa wakin lömakunapita mas respitash kanqa. Saymanmi maysay nacionpitapis runakuna Tayta Diosta adoraq aywayanqa.

³ Saynölami Sión lömapita Tayta Diospa yachasikuyninta maysaymanpis apayanqa. Jerusalénpita pasami palabranta wilakuyanqa. Maysay nacionpita runakuna Jerusalénman aywarmi niyanqa: <>.

⁴ Aska nación runakuna chikinakuyaptinpis Tayta Diosmi arreglanqa. Say nacionkuna jatun kayaptinpis paymi juzganqa. Juk markawan juk marka guërrata manami rurayanqanasu. Guërracho pelyayänanpaqpis manami kamarikuyanqanasu. Maysaychöpis runakuna espädankunapitami planchonkunatana rurasiyanqa. Lanzankunapitanami ösita rurasiyanqa.

⁵ Jacobpita miraq runakuna, shayämuy. Tayta Dios nimashqansita cäsukur kawashun.

Mana wiyakuqkunata castigananpaq nishqan

⁶ Tayta Dios, kuyashqayki runakunami inti jeqamunanlächo taq runakunano rikakuq kayta yachakuyash. Saynöpis filisteo runakunanömi brüju kayta yachakuyash. Jäpa runakunawan yachanakurmi paykunano lutanta rurar kawaykäyan. Sayno kayaptinmi Jacobpita miraq kuyashqayki runakunata kachariykushkanki.

⁷ Judá nacioncho runakunapa qorinkuna, qellayninkuna y imayka riquëzankunapis askami kaykan. Cawallunkunapis y guërra carrëtankunapis yupayta mana atipaypaqmi kaykäyan.

⁸ Saynöpis maysaychömi ïdulunkunata rurayash. Kikinkuna rurayashqan ïdulutami qonqurpaykur adoraykäyan.

⁹ Sayno rurayashpanmi penqakush uysuraykäyan. Taytay, paykunata ama perdonaysu.

¹⁰ ¡Qaqa uchkunkunaman y pasa rurinmanpis pakakuyay! ¡Mansariypaq, chipipiykaq y munayyuq Tayta Diospita pakakuyay!

¹¹ Runa tukuqkunatapis penqaymanmi churanqa. Orgullösukunatapis ruwakasinqami. Say junaqqa Tayta Dioslatami pïmaypis alabayanqa.

¹² Lapanta mandaq Tayta Dios castiganan junaqmi orgullösukunata, mana cäsukuqkunata y runa tukuqkunatapis soqpakasinqa.

¹³ Líbanucho jatunkaray cedru qerukunatapis y Basáncho encina qerukunatapis Tayta Dios ushakäsinqami.

¹⁴ Altu jirkakunatapis jatun puytushkunatapis ushakäsinqami.

¹⁵ Amparakuyänanpaq rurasiyashqan jatun törrikunatapis ushakäsinqami. Marka saparaq murällakunatapis ushakäsinqami.

¹⁶ Tarsispita shamuq kuyaylapaq büquikunatapis ushakäsinqami.

¹⁷ Saynöpami runa tukuqkunatapis penqayman churanqa. Orgullösukunatapis ruwakasinqami. Say junaqqa Tayta Dioslatami pïmaypis alabayanqa.

¹⁸ Say wisanqa runakuna adorayashqan lapan ïdulukunatami elaqäsinqa.

¹⁹ Mansariypaq, chipipiykaq y munayyuq Tayta Diosmi runakunata castigananpaq kay pasaman shamunqa. Sayta rikarmi pasaypa mansakäyashpan machaykunaman y pasa uchkukunamanpis pakakuyanqa.

²⁰ Say junaq qoripita qellaypita rurayashqan ïdulunkunata manana adorarmi ukushkuna y siksikuna täkuyänan uchkukunaman jitaykuyanqa.

²¹ Nirkurmi pasaypa mansarir qaqakuna shilikäyashqanmanpis y machaykunamanpis pakakuyanqa. Sayno pakakuyanqa chipipiykar munayyuq Tayta Dios castigananpaq shamuqta rikarmi.

²² Runakunamanqa amana yärakuyaynasu. Runakunaqa jämayno ushakaqlami kaykäyan.