Isaías 18 - Tayta Diospa Wilakuynin

Etiopía nación imano kananpaqpis nishqan

¹ ¡Ay imanöraq kanqa Etiopía nacioncho kaykaq mayukunapita mas washaqancho taq runakuna! Say nacionchöqa chishyayparaqmi chukluskuna kaykäyan.

² Etiopía runakunaqa ututupita rurash büquikunawanmi Nilo mayupa kachata kachaykäyan. ¡Kacha aywaykaqkuna, nacionnikiman kutiyay! ¡Jatunkaray y shapraynaq runa mayikikuna täyashqanman cörrila kutiyay! Nacionnikicho taq runakunataqa maysay nación runakunapis mansayanmi. Seqaypa kalpasapa y geniu runakunami kayanki. Nacionnikikunapis aska mayukunapa chawpilanchömi kaykan.

³ Puntakunacho señalta churamuqno y cornëtata tukamuqnömi Diospa wilakuyninta wilakuykä. Intëru munducho taqkuna, say wilakushqäta wiyayay.

⁴ Tayta Diosmi nimarqan: <>.

⁵ Sayno rikaraykashqanchömi elaqpita Etiopía runakunata Tayta Dios castiganqa. Manaraqpis üva cosëcha kaptin, üvapa waytan mayna shushuraykaptin y wayuynin poquraykaptinmi runakunata kachamunqa Etiopía runakunata ushakäsiyänanpaq. Paykunaqa üvapa rämankunata rämapar jitariqnömi Etiopía runakunata wanusiyanqa.

⁶ Nirkurmi wiskurkuna y jirka uywakuna mikuyänanpaq ayakunata kachaykuyanqa. Usya wisanmi wiskurkuna mikuyanqa. Tamya wisannami jirka uywakunana tulunkunatapis waqruyanqa.

⁷ Kawaykar quëdaqkunanami lapanta mandaq Tayta Diospaq qarayninta apayämunqa. Say runakunaqa jatunkaray y shapraynaq runakunami. Paykunataqa maysay nacioncho taq runakunapis mansayanmi. Seqaypa kalpasapa y geniu runakunami kayan. Nacionninpis aska mayukunapa chawpilanchömi kaykan. Sión lömamanmi qarayninta apayämunqa. Saychömi lapanta mandaq Tayta Diospis kaykan.