Isaías 17 - Tayta Diospa Wilakuynin

Damasco marka imano kananpaqpis nishqan

¹ Kaychömi qelqaraykan Damasco marka imano kananpaqpis Tayta Dios revelashqan. Damasco marka chipyaq ushakarmi raqälana rikakunqa.

² Aroer particho kaykaq markakunacho manami täyanqanasu. Qewalana junta kaptinmi pipis mana wajaptin uywakunala täkuyanqa.

³ Efraín runakuna täyashqancho corralash markakunapis manami kayanqanasu. Damasco markachöpis rey manami kanqanasu. Siria nacioncho quëdaq runakunapis Israel nacioncho walkaqla kayashqannömi kayanqa. Lapanta mandaq Tayta Diosmi sayno nin.

Israel nación castigash kananpaq wilakushqan

⁴ Say wisanmi Israel nacionpis munayniynaq rikakunqa. Uyu runanölami say nación kanqa.

⁵ Refaim pampacho trïguta achuriptin raströjulana quëdashqannömi rikakunqa.

⁶ Olïvu jachata tapshir wayuyninta shuntayaptin juk ishkaylana quëdashqannömi quëdanqa. Mas rämasapa kaqkunacho kimsa chuskula quëdashqannömi quëdanqa. Israel runakunata kuyaq Tayta Diosmi sayno nin.

⁷ Say wisanmi kamaqnin Tayta Diosta ruwakuyanqa. Israel runakunapa santu Diosninmanmi yärakuyanqa.

⁸ Juk dioskunata manakuyänanpaq manami perqayashqan altarkunaman aywayanqanasu. Manami kikinkuna rurayashqan Asera diösamanpis yärakuyanqanasu ni altarkunacho diosninkunaman inciensuwan qoshnisiyanqanasu.

⁹ Say wisanqa Israelcho kaykaq corralash markakunachöpis manami täyanqanasu. Heveo runakunata y amorreo runakunata Israel runakuna ushakäsiyashqanno ushakäsiyaptinmi pasaypa raqälana rikakuyanqa.

¹⁰ Sayno kayanki imaykapitapis salvashuqniki Tayta Diosta qonqaykuyashqaykipitami. Imapitapis sapäshuqniki Tayta Diostami kachariykuyashkanki. Saymi juklä nacionpita apaykasimur sawsa mikuykunata muruyaptikipis

¹¹ y muruyashqayki junaqla jeqarkamur waraylan waytaptinpis ima cosëchapis kanqasu. Say junaqqa pasaypa nakar waqayaptiki shonquykikunapis fiyupami nananqa.

¹² Lamar bunyaqnöraqmi contransi nacionkuna olqüyashqan wiyakaykämun. Olqur qaparäyashqanpis jakash mayu bunyaypa bunyar aywaqnöraqmi wiyakaykämun.

¹³ Sayno shayämuptinpis Tayta Dios olqutupaykuptinqa karupami qeshpir aywakuyanqa. Jirkacho oqshata wayra apakushqanno y polvuta wayra apakushqannömi aywakuyanqa.

¹⁴ Say runakuna pasa sakarkuptinqa fiyupa mansariypaqmi kaykäyan. Pasa wararkuptinnaqa manami kayannasu. Saynömi elaqäyanqa imansitapis apakuqkuna y markansitapis ushakäsiqkuna.