Isaías 16 - Tayta Diospa Wilakuynin

¹ Moabita runakunami Judá nacionpa mandaqnin rey yanapänanpaq ruwakur uyshakunata apasinqa. Sunyaq jirkacho kaq Sela markapita pasami Sión lömaman apasikuyanqa.

² Moabpita qeshpiq warmikunaqa Arnón mayu väducho shuntakaykurmi shuyaräyanqa. Say warmikunaqa imapis mansakäsiptin qeshunpita aywakuq pishqunömi kayanqa.

³ Jerusalén runakunata ruwakurmi kachankuna niyanqa: <<¡Kuyapäyämashpayki yanapaykayälämay! ¡Conträkunapita sapaykayälämay! ¡Qeshpiyämuptï paykunapa makinman ama entregaykayälämaysu!

⁴ ¡Qamkuna kaqman amparakayämuptï pakaykalämay! ¡Ushakäsimaqnïkunapita pakaykayälämay!>> Moabita runakuna, imay karpis chikishuqnikikuna ushakäyanqami. Ushakäsishuqnikikuna wanuyanqami. Wanusishuqnikikuna aywakuyanqami.

⁵ Davidpita miraqmi isanqa rey kanqa. Payqa kanqa kuyapäkuqmi. Payqa kanqa mana chaskipakuq juezmi. Mana shuyaräsiylapami pitapis ali arreglanqa.

⁶ Musyansimi moabita runakuna selläma runa tukuyashqanta. Paykunaqa wakinpita masmi munayyuq tukuyan. Manami pitapis respitayansu. Pasaypami baduläqui kayan.

⁷ Sayno kayashqanpitami moabita runakuna fiyupa waqayanqa. Kir-haresetcho rurayashqan päsasnin sapay biscöchukunapis ushakaptinmi fiyupa lakikur waqayanqa.

⁸ Hesbóncho y Sibmacho kaq üvakunapis qarwashtäyanqami. Nacionkunapa mandaqninkuna atacarmi ali wayuq üvakunata jarutakur ushayanqa. Jazeryaq y sunyaq jirkayaqmi say üvakuna plantaraykäyan. Saynölami Kachi Lamar simpanchöpis wayun.

⁹ Sibmacho üvakuna ushakaptin Jazercho waqayashqannömi noqapis fiyupa waqashaq. Hesbón y Eleale markakunatapis weqïwanmi parqushaq. Üva cosëcha wisan cosechayänanpa trukanqa atacaqnin soldädukunawan pelyarmi qayaräyanqa.

¹⁰ Saymi ali wayuq chakrakunacho kushikuypis kanqanasu. Üva chakrakunachöpis manami cantayanqanasu. Üva jarukuyänankunachöpis mananami vïnupaq üvata jaruyanqanasu. Manami kushikur qayakuyanqanasu.

¹¹ Saymi Moab nacionpaq y Kir-hareset markapaq lakikü. Arpapa cuerdannöraqmi shonqüpis fiyupa lakikur suksukyan.

¹² Walälapaqmi moabita runakuna altarninkunamanpis utikäyashqanyaq aywayanqa. Manakaqlapaqnami templunmanpis rezakuq aywayanqa.

¹³ Moab nación sayno ushakänanpaqmi unaypita pasana Tayta Dios nirqan.

¹⁴ Kananqa Tayta Diosmi nin: <>.