Isaías 15 - Tayta Diospa Wilakuynin

Moab nación imano kananpaqpis nishqan

¹ Kaychömi qelqaraykan Moab nación imano kananpaq Tayta Dios revelashqan. Moab nacioncho kaykaq Ar markataqa juk sakaylachömi elaqärasiyanqa. Moab nacioncho kaykaq Kir markatapis juk sakaylachömi ushakärasiyanqa.

² Sayno kaptinmi Dibón markacho taq runakuna fiyupa lakikuyanqa. Templunman y altarninkunaman aywaykurmi fiyupa lakikur waqayanqa. Nebo y Medeba markakunatapis elaqaskasiyanqami. Chipyaq elaqaskasiyaptinmi moabita runakuna fiyupa lakikur waqayanqa. Sayno lakikurmi aqsantapis shaprantapis rutukuyanqa.

³ Qachqa mödanan jatishqami cällikunapapis puriyanqa. Wayin janankunachöpis y pläzankunachöpis lapanmi lakikur waqayanqa.

⁴ Hesbóncho y Elealicho taqkuna ausiliuta manakurmi qayaräyanqa. Qayaräyashqanqa Jahaza markayaqmi wiyakanqa. Atacayaptinmi moabita soldädukunapis mansarïyanqa. Mas geniu soldädukunapis fiyupami mansarïyanqa.

⁵ Moabita runakuna sayno nakayänanpaq kaptin shonqü fiyupami lakinan. Paykuna Zoaryaq y Eglat-selesiyáyaqmi qeshpir aywakuyanqa. Luhitman wisänan cuestapami waqaraykar wisäyanqa. Horonaimman aywaq nänipa aywayashpanmi fiyupa waqayanqa.

⁶ Nimrimcho kaq yaku pözukunapis y qewakunapis sakinqami. Lapan sheqlimuq jachakunapis wanutanqami. Manami ima jachakunapis verdiranqanasu.

⁷ Saymi runakuna imayka shuntayashqantapis Sauci Raqra washaqanman apayanqa.

⁸ Timpuypa timpur waqayashqanqa intëru Moab nacionpami wiyakanqa. Eglaimyaq y Beer-elimyaqmi wiyakanqa.

⁹ Askaq wanuyaptinmi Dimóncho kaq yakukunapis yawarwan talukanqa. Leonkunatapis Dimóncho taqkunamanmi Tayta Dios kachamunqa. Say leonkunami Moabpita qeshpiqkunata mikur ushayanqa.