Isaías 11 - Tayta Diospa Wilakuynin

Davidpita miraq runa mandamaqninsi kananpaq nishqan

¹ Troncunpita jacha sheqlimuqnömi mandamaqninsi yurinqa. Payqa Isaípita miraqmi kanqa.

² Tayta Diospa Espïritunmi paycho kanqa. Saymi tantiyaq y yachaq kanqa, yäsikuq y munayyuq kanqa, musyaq y Tayta Diosta mansapakuq kanqa.

³ Tayta Diosta mansapakur pay munashqannölami kawanqa. Payqa manami rikärilarsu pitapis juzganqa. Saynöpis manami ninshi ninshilawansu pitapis jusayuq kashqanta ninqa.

⁴ Pïninpis mana kaqkunapa favorninmi sharkunqa. Pobrikunatapis intëru nacionninsichömi respitasinqa. Parlashlanwanmi runakuna wanuyanqa. Fiyu runakunatapis juk pükaylami ushakärasinqa.

⁵ Seqlanta sinchi watarkurmi Tayta Dios munashqannöla imaypis mandar rasun kaqlata ruranqa.

⁶ Say wisanqa atuqwan uyshapis talushqami puriyanqa. Tigriwan kapishpis talushqami punukuyanqa. Becërruwan leonpis jawkami puriyanqa. Y wamralami misinqapis.

⁷ Wäkapis ukumaryawan juntumi qewata mikunqa. Wawankunapis talukashqami qoturpäyanqa. Leonpis törunömi qewalatana mikunqa.

⁸ Cobra nishqan culebrapa qeshun jananchömi chuchuykaq wamrapis puklanqa. Sayraq wasqish wamra culebrapa qeshunman makinta jatiptinpis manami imananqapissu.

⁹ Tayta Dios mandashqan sagrädu lömacho mananami pipis lutankunata ruranqanasu ni pitapis nakasinqanasu. Lamarcho yaku junta kashqannömi Tayta Diosta reqiqkunapis kay pasacho junta kayanqa.

¹⁰ Say wisanmi Isaípita miraq runata Tayta Dios churanqa lapan nación runakunata mandananpaq. Payta reqiyänanpaqmi lapan marka runakuna aywayta munayanqa. Pay tashqan nacionpaqmi pïmaypis parlayanqa.

Juklä nacionpita Israel runakuna kutiyämunanpaq nishqan

¹¹ Say wisanmi juklä nacionkunacho mashikash kaykaq kuyashqan runakunata Tayta Dios yapay shuntamunqa. Saymi kutisimunqa Asiriapita, Egiptupita, Patruspita, Etiopíapita, Elampita, Sinarpita, Hamatpita y lamar kuchuncho kaq nacionkunapitapis.

¹² Maysay nacionkunapitapis Israel runakuna kutiyämunanpaqmi bandërata jawiyanqa. Wakcho kaycho mashikash kaykaqtami Judá runakunatapis shuntamunqa.

¹³ Nacionninman kutiykamurnaqa Efraín runakuna mananami Judá runakunawan chikinakuyanqanasu. Judá runakunata chikiqkuna lapanmi ushakäyanqa. Judá runakunapis manami Efraín runakunata rabyapäyanqanasu.

¹⁴ Saypa trukanqa Judá runakunapis Efraín runakunapis shuntakarkur aywarmi inti jeqanan kaqlächo kaykaq Filistea nacionta atacayanqa. Inti jeqamunan kaqlächo taqkunatapis vincirmi imaykanta apakuyanqa. Edom nacionpis y Moab nacionpis paykunapa makinchömi kayanqa. Amón nación runakunapis paykuna niyashqantami rurayanqa.

¹⁵ Nacionninman kutiyämunanpaqmi Puka Lamar chawpinpa päsayänanpaqpis Tayta Dios nänita kichaparinqa. Éufrates mayuta simpayänanpaqmi say mayu jananpa makinta joqarkunqa. Makinta joqarkur fiyupa wayräsimurmi say mayuta qanchisman rakirinqa. Saypami runakuna lanqinkunatapis mana jorquylapa päsayanqa.

¹⁶ Asiriacho taq Israel runakunapis jatun nänipami kutiyämunqa. Egiptupita yarqamur jatun nänipa shayämushqannömi kutiyämunqa.