Isaías 10 - Tayta Diospa Wilakuynin

¹ ¡Ay, imanöraq kayanki, mana alita rurar sapakuyänalaykipaq leyta ruraqkuna! Say leynikikunawanmi runakunata fiyupa nakaykäsiyanki.

² Pobrikunatapis manami cäsuyankisu. Paykuna demandakuyaptinpis manami arreglayankisu. Viüdakunapa imaykantapis qechuykäyankimi. Waksakunatapis suwapaykäyankimi.

³ Tayta Dios castigayäshushqayki junaq ¡imanöraq kayanki! Ushakäsiyäshunaykipaq karu nacionpita chäyämuptin washäyäshunaykipaq ¡pimanraq qelikäyanki! Riquëzaykikunatapis ¡maymanraq pakayanki!

⁴ Ima ruraytapis mana kamäpakuykaqtami wakinnikita prësu sariyäshunki y wakinnikitami wanusiyäshunki. Tayta Dios sayno castigayäshushpaykipis jinalami rabyash kaykanqa. Yapay castigayäshunaykipaqpis kamarikushlami kaykan.

Asiria nacionta castigananpaq kashqanta Tayta Dios wilashqan

⁵ ¡Ay imanöraq kanqa Asiria nacionpa mandaqnin rey! Say rey imayka wirukuna tukrüno kaptinmi pitapis rabyanäsimaq kaqtaqa paywan llëvasï.

⁶ Mana wiyakayämashpan rabyanäsimaq nación runakunamanmi payta kachä. Paykunata vincirmi cällicho mitutano jarukachaskir imaykankunatapis apakun.

⁷ Sayta rurananpaq kachaptïpis say reyqa manami cäsukamansu. Saytaqa sueñuylanchöpis manami yarpansu. Saypa trukanqa maysay nacionkunata elaqäsiylatami yarpaykan.

⁸ Saymi nin: <

⁹ Calno markatapis Carquemis markatanölami ushakäsishkä. Hamat markatapis Arfad markatanölami ushakäsishkä. Samaria markatapis Damasco markatanölami ushakäsishkä.

¹⁰ Vincishqä nación runakuna adorayashqan ïdulukuna munayyuq kaptinpis vincishkämi. Jerusaléncho y Samariacho adorayashqan ïdulukuna munayyuq kayashqanpitapis mas munayyuqmi say ïdulukuna kayarqan. Sayno kaptinpis lapantami vincishkä.

¹¹ Ïdulunkunaman yärakuykaptinpis Samariata vincishqänöla ¿manasuraq Jerusaléntapis ïduluntinta vincishaq?>>

¹² Sayno parlar runa tukushqanpita y munayyuq tukushpan olqushqanpitami Asiria nacionpa mandaqnin reyta Tayta Dios castiganqa. Sión lömacho y Jerusaléncho taykaq runakunata castigayta usharkurmi paytapis castiganqa.

¹³ Say reyqa runa tukurmi nish: <

¹⁴ Qeshucho runtuta tariykur apakuqnömi juklä nación runakunapa riquëzankunatapis apakamushkä. Sayno ruraptï manami pipis michämashsu ni rimakushsu>>.

¹⁵ Jächapis manami manijaqninpita mas munayyuqsu. Trosadörapis manami sutaqninpita mas munayyuqsu. Tukrupis manami tukrukuqninta munashqanpa apansu.

¹⁶ Saymi lapanta mandaq Tayta Dios Asiria soldädunkunata qeshyawan castiganqa. Aliman churananpa trukanmi nina waylaqnöraq fiebri qeshyawan castiganqa.

¹⁷ Santu Tayta Diosqa Israel runakunapa salvaqnin karmi aksino kaykan. Kananqa nina bunyaypa bunyar rupaykaqnömi kanqa. Saymi kashatawan shatata nina rupar ushaqno Asiria nacionpa soldädunkunata juk junaqlacho elaqärasinqa.

¹⁸ Asiriacho kuyaylapaq muntikunata chipyaqmi ushakäsinqa. Runakuna muruyashqanta y plantayashqantapis lapantami ushakäsinqa.

¹⁹ Saymi munticho jachakuna walkalana quëdayaptin ayka kayashqanta wamralapis yupanqa.

Kawaykar quëdaq Israel runakuna Diosman yärakuyänanpaq nishqan

²⁰ Say wisanmi walkaqla Israel runakuna kawaykar quëdayanqa. Paykuna mananami ushakäsiqnin Asiria runakunaman yärakuyanqanasu. Saypa trukanqa Israel runakunapa santu Diosninlamannami yärakuyanqa.

²¹ Walkaqlami Tayta Diosman yapay yärakuyanqa. Jacobpita miraq runakunapitaqa walkaqlami munayyuq Tayta Diosman kutikuyanqa.

²² Lamar kuchuncho aqushanöraq kanan kaykarpis Israel runakunaqa walkaqlami kawaykar quëdayanqa. Walkaqla quëdananpaqmi nacionninkunata Tayta Dios ushakäsinqa.

²³ Yarpashqannömi lapanta mandaq Tayta Dios lapanta ushakäsinqa.

²⁴ Saymi lapanta mandaq Tayta Dios nin: <

²⁵ Kananpita manapis aykälatanami qamkunapaq rabyash kaykashqä päsanqana. Saypitaqa Asiria runakunatami ushakäsishaq.

²⁶ Paykunata pasaypa astaptïmi madianita runakunata Oreb qaqacho Gedeón vincishqanno kanqa. Saynöpis kanqa väräta lamar jananpa Moisés toqriptin Egipto runakunata talpukäsishqänömi.

²⁷ Say wisanmi lasaq qepita apariparkuqno nakasiyäshuptikipis salvayäshayki. Yüguta matankaparkuqno sararäyäshuptikipis makinpita jorqur bendicionnïta churamuptï alimi kawayanki>>.

Israel nacionta Asiria runakuna atacayashqan

²⁸ ¡Asiria soldädukunaqa Ajat partimannami chäyash! ¡Saypita Migrón partipa aywar Micmas partimanpis chäyashnami!

²⁹ ¡Raqrata päsaramurmi Geba partichöna posädakuyash! Sayta rikarmi Ramá runakuna fiyupa mansariykäyan. Saúlpa markan Gabaacho taqkunapis qeshpirmi aywakuyash.

³⁰ ¡Galimcho taqkuna, lapan kalpaykiwan qayaräyay! ¡Laischo taqkunapis, sayta wiyayay! ¡Ay imanöraq kaykäyan Anatot markacho taqkuna!

³¹ Madmena runakuna mashiypa mashirmi qeshpiyash. Gebimcho taqkunapis pakakuyashqami.

³² Kanan hörami Asiria runakuna Nob particho jamapaykäyan. Saychömi kamarikuykäyan Jerusaléncho kaykaq Sión lömata atacaq yaykuyänanpaq.

³³ Sayno kaptinpis lapanta mandaq Tayta Diosmi Asiria runakunata ushakäsinqa. Jatun qeruta muturiqnömi paykunata saqtarinqa. Runa tukuyaptinpis jatusaq jachata mutur pasaman tunisishqannömi ushakäsinqa.

³⁴ Jirakash shatatapis jächawan saquriqnömi ushakäsinqa. Líbanucho jatusaq qerukunata qapapaqtaraq tunisiqnömi paykunatapis ushakäsinqa.