Habacuc 3 - Tayta Diospa Wilakuynin

Tayta Diosta Habacuc yapay manakushqan

¹ Profëta Habacuc Tayta Diosta cantapaylapa manakurmi nirqan:

² Tayta Dios, Israel mayïkunata unay shumaq yanapashqaykitami wilapäyämash. Lapan rurashqaykikunata musyarmi seqaypa kushikü. Unay yanapashqaykinöla kananpis yanapaykayälämay, Taytay. Saynöpami rurashqaykikunata rikayäshaq. Jusalikuyashqäpita rabyash karpis kuyapaykayälämay.

³ Temán markapitami Tayta Dios shamun. Parán lömapitami santu Dios shamun. Selah Intëru ciëluchömi munayyuq kashqan rikakaykan. Intëru pasachömi payta alabaykäyan.

⁴ Chipipiynin nawipis sakaqpaqraqmi asikyaykämun. Makinpitapis elqukuynöraqmi asikyay rikakaykämun. Munayyuq kashqan maysaychömi musyakaykan.

⁵ Contrankunata castigananpaq shamuptin puntantami mansariypaq pesti qeshya shamun. Qepantanami fiebri qeshya shamun.

⁶ Tayta Dios ichiykuptin pasapis fiyupami suksun. Rikaraptin maysay markakunapis pasaypami mansakäyan. Jirkakuna unaypita pasa karpis juchunmi. Saynölami lömakunapitapis juchu aywan. Tayta Diosmi isanqa mana ushakaq kaykan.

⁷ Cusáncho taq runakunata pasaypa desgraciacho kaykaqtami rikashkä. Madiáncho taq runakunata pasaypa mansarir suksukyaykäyaqtami rikashkä.

⁸ Tayta Dios, ¿mayukunawanku o lamarwanku rabyash kaykanki? ¿Sayku cawalluyki loqash y guërra carrëtaykiwan lapanta vincirkur puriykanki?

⁹ Flëchawan flëchanaykipaqpis kamarikushlanami kaykanki. Flëchaykitapis jitaq jitaqlanami kaykanki. Selah Mayukunawanmi kay pasatapis raqrasashkanki.

¹⁰ Rikayäshushpaykimi jirkakunapis mansariyashpan suksukyäyan. Waqya tamyapis pasaypami tamyamun. Lamarpis bunyaypa bunyarmi qaparan. Yakupis fiyupami pulchaqyan.

¹¹ Flëchaykita y lanzaykita jitaptiki pasaypa chipipiykarmi aywan. Aywaykaqta rikarmi intipis killapis ichikuykuyan.

¹² Contraykikunata castiganaykipaqmi fiyupa rabyash kay pasacho maysaypapis purinki. Castigarmi nacionkunatapis lanqur ushanki.

¹³ Kuyashqayki runakunata salvanaykipaqmi yarqamushkanki. Akrashqayki reyta yanapänaykipaqmi shamushkanki. Saymi contrayki sharkuq reykunata ushakäsishkanki. Paykuna mandayashqan nacionkunatapis asulashkankimi. Selah

¹⁴ Say nacionkunapita shamuq soldädukunami waqya tamyano shayämurqan wakpa kaypa qarqayämänanpaq. Yaqa runa jäkuqcho asaltar kushikushqannömi paykunapis atacayämashpan kushikuyarqan. Jina kaqtami kikinpa flëchankunawan flëchar ushakäsishkanki.

¹⁵ Bunyaypa bunyaykaq lamar jananpami cawalluyki loqash purinki.

¹⁶ Shamushqaykita wiyashpä pasaypami mansarishkä. Wirpäpis pasaypami katatash. Tulükunapis pasaypami qotukash. Valornïpis pasaypami ushakäkush. Sayno kaptinpis conträkunata ushakäsinaykipaq kashqanta musyarmi qamman yärakaykämü.

¹⁷ Hïguskuna mana tuktuptinpis, üvakuna ni olïvukuna mana wayuptinpis, chakracho ima cosëcha mana kaptinpis y uyshakuna y wäkakuna ushakaptinpis

¹⁸ Tayta Diosman yärakurmi kushikushaq. Salvamänanpaq kashqanta musyarmi payta imaypis alabashaq.

¹⁹ Tayta Diosmi valorta qoman imano karpis payman yärakunäpaq. Pay yanapämaptinmi luychunöraq shumaq cörrï. Jirkakunapa purirpis mana luskakaypami purï. (Kay salmuqa cantaqkunapa mandaqninpaqmi. Cuerdayuq instrumentuta tukar cantayanki.)