Génesis 7 - Tayta Diospa Wilakuynin

Diluviu kashqan

¹ Nirkurnami Noéta Tayta Dios nirqan: <

² Püru kaq uywakunataqa qanchis chinata qanchis orquta arcaman yaykasinki. Impüru kaqta isanqa chinan orqulata yaykasinki.

³ Saynöpis lapan casta pajaqkunata yaykasinki qanchiskama chinan orquta kay pasacho mana ushakäyänanpaq.

⁴ Kananpita qanchis junaqtami chusku chunka (40) junaq chusku chunka paqas mana salpiypa tamyasimushaq. Say tamyawanmi kay pasacho lapan kawaq kaqta ushakäsishaq>>.

⁵ Saymi Tayta Dios nishqannöla lapanta Noé rurarqan.

⁶ Diluviu kanan wisan Noé kaykarqan soqta pachak (600) watayuqmi.

⁷ Diluviupita salvakuyänanpaqmi arcaman Noé yaykurqan warminwan, surinkunawan y lumsuyninkunawan.

⁸ Saynömi arcaman yaykuyarqan püru kaq y impüru kaq lapan casta uywakuna, pajaqkuna y pachalanpa, lätaypa puriqkunapis.

⁹ Tayta Dios nishqannölami say uywakunata chinan orquta Noé yaykasirqan.

¹⁰ Tayta Dios nishqannölami qanchis junaqta diluviu qalaykurqan.

¹¹ Say karqan mushuq wata qalaykushqanpita juk killa ushaskir chunka qanchis junaqmi. Say wisan Noé kaykarqan soqta pachak (600) watayuqmi. Pasa rurinpitami yaku aska pashtamurqan. Saynölami ciëlucho yakuta saparaykaq punkupis kichakämurqan.

¹² Saymi chusku chunka (40) paqas y chusku chunka junaq mana salpiypa tamyarqan.

¹³ Tamya qalaykushqan junaqmi Noé kimsan surinkunawan arcaman yaykuyarqan. Surinkunapa jutinkunami karqan Sem, Cam y Jafet. Saynölami kimsan lumsuyninkunawan Noépa warminpis yaykurqan.

¹⁴ Paykunawanmi yaykuyarqan lapan casta ashmana kaq y mana ashmana kaq uywakuna, pachalanpa, lätaypa puriqkuna y tukuy casta pajaqkunapis.

¹⁵ Lapan casta uywakunatami ishkaypa ishkaypa arcaman Noé yaykasirqan.

¹⁶ Tayta Dios nishqannölami cada casta uywakunata chinan orquta yaykasirqan. Yaykuskiptinnami arca punkuta Tayta Dios wichqarkurqan.

¹⁷ Saypitanami chusku chunka (40) junaq y chusku chunka (40) paqas mana salpiypa tamyarqan. Sayno tamyarmi pasaman yaku juntashpan arcata aynasir qalaykurqan.

¹⁸ Sayno tamyaptin waranlanta waranlanta yaku mas juntaptinmi arca aynar qalaykurqan.

¹⁹ Altunnin jirkakunatapis sapashqanyaqmi yaku juntarqan.

²⁰ Say jirkakunata saparkurpis qanchis metru mastaraqmi päsarqan.

²¹ Saychömi lapan runakunapis, pajaqkunapis, ashmana kaq y mana ashmana kaq uywakunapis y pachalanpa, lätaypa puriqkunapis shenqaypa wanuyarqan.

²² Kay pasacho kawaqkuna lapanpis shenqaypa wanurmi ushakäyarqan.

²³ Arcaman Noéwan yaykuqkunalami wanuypita qeshpiyarqan. Mana yaykuq kaqmi isanqa runakunapis, uywakunapis, pajaqkunapis y pachalanpa, lätaypa puriqkunapis lapan wanur ushakäyarqan.

²⁴ Say yaku pachak pisqa chunka (150) junaqyaqmi kay pasata sapararqan.