Génesis 36 - Tayta Diospa Wilakuynin

Esaúpita miraqkuna

¹ Kaychömi qelqaraykan Esaúpa surinkunapita y paykunapita miraqkunapitapis. Esaúpa jukaq jutinmi karqan Edom.

² Esaú tarqan cananea warmikunawanmi. Jukaq warminpa jutinmi karqan Ada. Pay karqan heteo runa Elónpa surinmi. Jukaq warminpa jutinnami karqan Aholibama. Pay karqan heveo runa Zibeónpa wilkan y Anápa surinmi.

³ Saynöpis Esaú tarqan prïman Basematwan. Basemat karqan Ismaelpa surin y Nebaiotpa paninmi.

⁴ Adapa wawanmi karqan Elifaz. Basematpa wawannami karqan Reuel.

⁵ Aholibamapa wawankunanami kayarqan Jeús, Jaalam y Coré. Canaáncho Esaú taykaptinmi paykuna yuriyarqan.

⁶ Wawqin Jacobwan taykashqanpita witikurmi Esaú aywakurqan lapan warminkunata, surinkunata y ashmayninkunatapis pushakurkur. Canaáncho taykar tarishqan kaqtaqa lapanta apakurkurmi aywakurqan.

⁷ Jacobpis Esaúpis rïculantaq kayaptinmi täyashqan parti ayparqannasu saylacho juntu täyänanpaq. Uywankunapis saysika kayaptinmi misikuyänanpaq qewapis ayparqannasu.

⁸ Saynöpami Esaú ayllu runakuna lapan aywakuyarqan Seir jalqakunaman. Esaúpa jukaq jutinmi karqan Edom.

⁹ Seir jalqakunacho taykarmi Esaú ayllukuna askaqman mirayarqan. Paykunatami edomita runakuna kayashqanta niyaq. Kay runakunami kayarqan Esaúpita miraqkuna:

¹⁰ Esaúpa warmin Adacho yurirqan Elifaz. Warmin Basematchönami yurirqan Reuel.

¹¹ Elifazpa surinkunami kayarqan Temán, Omar, Zefo, Gatam y Cenaz.

¹² Elifazpa concubïna warmin Timnachöpis Amalec jutiyuq surin karqanmi. Paykunami kayarqan Esaúpawan warmin Adapa wilkankuna.

¹³ Reuelpa surinkunami kayarqan Nahat, Zera, Sama y Miza. Paykunami kayarqan Esaúpawan warmin Basematpa wilkankuna.

¹⁴ Esaúpa warmin Aholibamachömi surinkuna kayarqan Jeús, Jaalam y Coré. Aholibama karqan Anápa surin Zibeónpa wilkanmi.

¹⁵ Esaúpa qechpa surin Elifazpa surinkuna mandaqmi kayarqan. Paykunami kayarqan Temán, Omar, Zefo, Cenaz,

¹⁶ Coré, Gatam y Amalec. Say mandaqkuna lapanpis Elifazpa surinkunami kayarqan. Paykuna mandaq kayarqan Edom nacionchömi. Paykunami kayarqan Esaúpa y warmin Adapa wilkankuna.

¹⁷ Esaúpa surin Reuelpa surinkunapis mandaqmi kayarqan. Paykunami kayarqan Nahat, Zera, Sama y Miza. Paykunami kayarqan Esaúpa y warmin Basematpa wilkankuna.

¹⁸ Esaúpa jukaq warmin Aholibamapa wawankunapis mandaqmi kayarqan. Paykunami kayarqan Jeús, Jaalam y Coré. Aholibamaqa Aná jutiyuq runapa surinmi karqan.

¹⁹ Say mandaqkuna lapanpis kayarqan Esaú ayllumi. Esaúpa jukaq jutinmi karqan Edom.

²⁰ Seir partiman Esaú manaraq chaptinmi horeo runakuna saycho täyarqan. Paykuna mirayarqan Seir jutiyuq runapitami. Seirpa surinkunami kayarqan Lotán, Sobal, Zibeón, Aná,

²¹ Disón, Ezer y Disán. Paykunami kayarqan Edomcho Seir ayllu horeo runakunapa mandaqninkuna.

²² Lotánpa surinkunami kayarqan Horiwan Hemam. Lotánpa paninmi karqan Timna.

²³ Sobalpa surinkunami kayarqan Alván, Manahat, Ebal, Sefo y Onam.

²⁴ Zibeónpa surinkunami kayarqan Ajawan Aná. Taytan Zibeónpa ashnunkunata misiykashqanchömi Aná tarirqan sunyaq jirkacho pukyukunata.

²⁵ Anápa surinkunami kayarqan warmi olqu. Olqu kaqpa jutinmi karqan Disón y warmi kaqpanami Aholibama.

²⁶ Disónpa surinkunami kayarqan Hemdán, Esbán, Itrán y Querán.

²⁷ Ezerpa surinkunami kayarqan Bilhán, Zaaván y Acán.

²⁸ Disánpa surinkunami kayarqan Uz y Arán.

²⁹ Horeo runakunapa mandaqninkunami kayarqan Lotán, Sobal, Zibeón, Aná,

³⁰ Disón, Ezer y Disán. Say runakuna juknin jukninpis horeo runakunapa mandaqninmi kayarqan. Cada ayllupa jutinqa mandaqninpa jutin kashqannömi karqan. Say ayllukunami Seir particho täyarqan.

³¹ Israel nacioncho rey manaraq kaptinmi Edom nacionchöqa reykuna kayarqan. Kaychömi say reykunapa jutinkuna qelqaraykan:

³² Juk reymi karqan Beorpa surin Bela. Belapa markanmi karqan Dinaba.

³³ Bela wanuykuptinnami Zerapa surin Jobab rey karqan. Pay karqan Bosra markapitami.

³⁴ Jobab wanuykuptinnami trukan rey karqan Husam. Pay karqan temanita runakuna täyashqanpitami.

³⁵ Husam wanuykuptinnami trukan rey karqan Bedadpa surin Hadad. Paymi Moab particho wanusirqan madianita runakunata. Hadadpa markanmi karqan Avit.

³⁶ Hadad wanuykuptinnami trukan rey karqan Samla. Pay karqan Masreca markapitami.

³⁷ Samla wanuykuptinnami rey karqan Saúl. Pay karqan Éufrates mayu nawpancho kaykaq Rehobot markapitami.

³⁸ Saúl wanuykuptinnami rey karqan Acborpa surin Baal-Hanán.

³⁹ Baal-Hanán wanuykuptinnami rey karqan Hadar. Pay karqan Pau markapitami. Hadarpa warminpa jutinmi karqan Mehetabel. Mehetabel karqan Matredpa surin y Mezaabpa wilkanmi.

⁴⁰ Esaúpita miraqkunapa mandaqninkuna kayarqan Timna, Alva, Jetet,

⁴¹ Aholibama, Ela, Pinón,

⁴² Cenaz, Temán, Mibzar,

⁴³ Magdiel y Iram. Say runakunapa jutinkunalami mandayashqan markakunapapis jutinkuna karqan. Saynölami paykunapita miraqkunata reqiyaq mandaqninpa jutilanpa. Lapan say runakuna edomita runakunami kaykäyan.