Génesis 2 - Tayta Diospa Wilakuynin

¹ Saynömi Tayta Dios kamayta usharqan jana pasata y jana pasacho kaqkunata, kay pasata y kay pasacho kaqkunatapis.

² Lapanta kamaskirnami qanchis kaq junaqcho Tayta Dios jamarqan.

³ Sayno jamashqanpitami Tayta Dios say junaqta bendisishpan churarqan sagrädu junaq kananpaq.

Edén huertacho Adánwan Eva täyashqan

⁴ Kaychömi qelqaraykan jana pasatawan kay pasata Tayta Dios kamashqan. Jana pasata y kay pasata kamashna karpis

⁵ Tayta Dios manaraqmi tamyasimurqanraqsu. Saymi ima qewapis ni jachapis jeqamurqanraqsu. Saynöpis chakrata arunanpaq runapis manami karqanraqsu.

⁶ Say wisan pasapita yaku pashtamurmi intëru pasata ushmarqan.

⁷ Saypitanami alpapita runata Tayta Dios kamarkur kawananpaq senqanpa pükarqan. Saynöpami kawaq runa kananpaq kamarqan.

⁸ Paytami Edéncho jatunkaray huertaman churarqan saycho tänanpaq. Say huertataqa kikin Tayta Diosmi inti jeqamunanlächo rurarqan.

⁹ Say huertachömi Tayta Dios winasirqan imaykaläya kuyaylapaq jachakunata. Say jachakunapa wayuyninmi maypis mikukuy munay karqan. Huerta chawpinchömi juk jacha karqan wayuyninta mikur imayyaqpis runa kawananpaq. Saynöpis juk jacha karqan wayuyninta mikur ali kaqta y mana ali kaqtapis runa musyananpaq.

¹⁰ Jinan Edén huertapitami juk mayu pashtamurqan say huertata parqupänanpaq. Huertapita yarqurmi say mayu chuskuman rakikarqan.

¹¹ Punta kaq mayupa jutinmi karqan Pisón. Say mayumi päsan Havila partipa. Say partichömi aska qori kaykan.

¹² Say qoriqa mas ali kaq qorimi kaykan. Saynöpis saycho kaykan seqaypa mushkuq jachapa weqin y kuyaylapaq ónice rumikunapis.

¹³ Jukaq mayupa jutinmi karqan Gihón. Say mayumi tumaykämun Cus partipa.

¹⁴ Jukaq mayupa jutinmi karqan Tigris. Say mayuqa Asiriapita inti jeqamunan kaqläpami päsan. Jukaq mayupa jutinmi karqan Éufrates.

¹⁵ Kamashqan runatami Edén huertaman Tayta Dios churarqan saycho arur shumaq rikananpaq.

¹⁶ Nirkurnami runata nirqan: <

¹⁷ Isanqa ama mikunkisu alita y mana alita musyasikuq jachapa wayuyninta. Sayta mikurqa wanunkipaqmi>>.

¹⁸ Nirkurmi Tayta Dios nirqan: <>.

¹⁹ Saypitanami alpapita kamashqan tukuy niraq uywakunatawan pajaqkunata Adán kaqman Tayta Dios aparqan jutinkunata churapänanpaq. Adán churapashlanmi lapanpapis jutinkuna kaykan.

²⁰ Saynöpami jutinkunata Adán churaparqan ashmana kaq mana ashmana kaq uywakunapata y pajaqkunapatapis. Lapan casta uywakuna kaptinpis runapa majanpaqnöqa manami karqansu.

²¹ Saymi Tayta Dios wanuypa Adánta punukaskasir juk custillanta jorqurirqan. Jorquskirnami kashlan aliyarkasirqan.

²² Say jorqushqan custillanpita warmita kamarkurmi runa kaqman pusharqan.

²³ Warmita rikaykurmi Adán pasaypa kushikushpan nirqan: <<¡Kaymi isanqa tulüpita aysäpita rurash kar kikï niraq kaykan! Olqupita rurash karmi warmi kaykan>>.

²⁴ Saymi mamanpa y taytanpa makinpita runa yarqukun warminwan mana rakikaypa tänanpaq. Ishkaq karpis juklaylanömi kayanqa.

²⁵ Ishkan qarapächula kaykarpis manami mayqanpis penqakuyarqansu.