Génesis 13 - Tayta Diospa Wilakuynin

Abramwan Lot rakikäyashqan

¹ Egiptupita Abram kutikushpanmi warminta pushakurkur y lapan imaykankunatapis apakurkur Neguevman charqan. Paywanmi sobrinun Lotpis aywarqan.

² Abram seqaypa rïcu runami karqan. Saymi qorinpis qellayninpis uywankunapis aska karqan.

³ Neguevpita cercaman cercaman aywarmi Bet-elman Abram charqan. Saypitanami kutikurqan nawpata tashqan kaqman. Say karqan Bet-elpita Haiman aywanachömi.

⁴ Saychömi altarta unaypis perqashqan kaqcho Tayta Diosta manakur adorarqan.

⁵ Lotpis tiyun Abramnömi rïcu karqan. Paypapis askami uyshankuna, cabrankuna, wäkankuna y toldunkunapis kayarqan.

⁶ Saysika uywankuna kaptinmi juk partilacho ishkan täyänanpaqqa ayparqannasu.

⁷ Saymi Abrampa uywa misiqninkunawan Lotpa uywa misiqninkuna qewa janan pelyayaq. Say wisan cananeo runakuna y ferezeo runakunapis saycho taykäyarqanraqmi.

⁸ Uywa misiqninkuna sayno pelyayaptinmi sobrinun Lotta Abram nirqan: <

⁹ Rikashqaykinöpis kay parti jatunmi kaykan. Mayninchöpis shuyni täkunaykipaq akrakuy. Janapa aywaptikiqa urapami aywashaq. Urapa aywaptikiqa janapami aywashaq>>.

¹⁰ Sayno niptinmi Lotqa Jordán mayu nawpan intëru pampakunata Zoar markalämanpa rikarqan. Say pampakunacho qewapis y yakupis aska kaptinmi Edén huertanöraq y Egiptunöraq karqan. Sayno karqan Sodoma y Gomorra markakunata Tayta Dios manaraq ushakäsiptinmi.

¹¹ Mas ali kashqanta rikarmi Lot akrarqan Jordán mayu nawpan pampakunata. Saymi Abrampita rakikar inti jeqamunanläpa aywakurqan.

¹² Abrammi isanqa jinan Canaánlacho quëdakurqan. Lotmi Jordán mayu aywaq pampakunacho kaykaq markakunaman aywashpan Sodoma marka cercancho tarqan.

¹³ Sodomachöqa Tayta Diosta mana cäsukur jusalikuq runakunalami täyarqan.

¹⁴ Lot aywaskiptinnami Abramta Tayta Dios nirqan: <

¹⁵ Say rikashqayki partitaqa lapantami qoykushayki. Imayyaqpis say kanqa qampaq y qampita miraqkunapaqmi.

¹⁶ Shumaq rikaptïmi qampita miraqkuna saysikaman mirayanqa. Saymi yupaytapis mana atipaypaq aqushanöraq paykuna kayanqa.

¹⁷ Intërunpa rikapakur tumamuy. Lapan rikashqayki kaqtaqa qamtami qoykushayki>>.

¹⁸ Tayta Dios sayno niptinmi lapan imaykankunatapis apakurkur Hebrón marka cercanman Abram aywakurqan. Saychömi karqan aska encina jachakuna. Say jachakuna karqan Mamre runapami. Saycho tarnami altarta Abram perqarqan Tayta Diosta adorar manakunanpaq.