Génesis 10 - Tayta Diospa Wilakuynin

Noépa surinkunapita miraqkuna

¹ Kay partichömi qelqaraykan Noépa surinkunapita y paykunapita miraqkunapitapis. Noépa surinkunami kayarqan Sem, Cam y Jafet. Diluviupitaraqmi paykunapa surinkuna yuriyarqan.

² Jafetpa surinkunami kayarqan Gomer, Magog, Madai, Javán, Tubal, Mesec y Tiras.

³ Gomerpa surinkunami kayarqan Askenaz, Rifat y Togarma.

⁴ Javánpa surinkunami kayarqan Elisa, Tarsis, Quitim y Dodanim.

⁵ Lamar kuchunpa aywarmi say runakuna nacionkuna kayänanpaq askaman mirayarqan. Cada nacionkunachömi kikinkunapa idiömanta parlayaq.

⁶ Campa surinkunami kayarqan Cus, Mizraim, Fut y Canaán.

⁷ Cuspa surinkunami kayarqan Seba, Havila, Sabta, Raama y Sabteca. Raamapa surinkunami kayarqan Seba y Dedán.

⁸ Nimrodpis Cuspa surinmi karqan. Paymi kay pasacho mas puntata munaynincho runakunata sarararqan.

⁹ Nimrodmi Tayta Dios yanapaptin jirka uywakunata sariyta yacharqan. Saymi pipis jirka uywakunata ali sariq kaptin niyaq: <>.

¹⁰ Nimrod mandashqan jatusaq markakuna kayarqan Babel, Erec, Acad y Calne. Say markakunaqa Sinarchömi kayarqan.

¹¹ Saypitami Asur partiman aywar sharkasirqan Nínive, Rehobot y Cala markakunata.

¹² Saynöpis sharkasirqan jatun Resén markata. Say marka karqan Nínivipita Calaman päsaq nänichömi.

¹³ Mizraimpita miraqkunami kaykäyan ludeo runakuna, anameo runakuna, lehabita runakuna, naftuhita runakuna,

¹⁴ patruseo runakuna, casluhíta runakuna y caftorita runakunapis. Caftorita runakunapitami filisteo runakuna mirayarqan.

¹⁵ Canaánpa qechpa surinmi karqan Sidón. Paypa shulkanmi karqan Het.

¹⁶ Canaánpita miraqkunami kaykäyan jebuseo runakuna, amorreo runakuna, gergeseo runakuna,

¹⁷ heveo runakuna, araceo runakuna, sineo runakuna,

¹⁸ arvadeo runakuna, zemareo runakuna y hamateo runakunapis. Say runakunaqa cananeo runakunami kayarqan. Paykunami askaman mirayashpan maysayman mashtakäyarqan.

¹⁹ Saymi cananeo runakunapa lindërunkuna charqan Sidón markapita Gaza cercancho kaykaq Gerar markayaq. Saynöpis lindërun päsarqan Sodoma, Gomorra, Adma y Zeboim markakunapa hasta Lasayaqmi.

²⁰ Paykunami kayarqan Campa surinkunapita miraqkuna. Say runakunami nacionkuna kayänanpaq askaman mirayarqan. Cada nacionninchömi kikinkunapa idiömanta parlayaq.

²¹ Jafetpa mayor wawqin Sempapis surinkuna kayarqanmi. Semqa Heberpa y Heberpita miraqkunapa unay ayllunmi karqan.

²² Sempa surinkunami kayarqan Elam, Asur, Arfaxad, Lud y Aram.

²³ Arampa surinkunami kayarqan Uz, Hul, Geter y Mas.

²⁴ Arfaxadpa surinmi karqan Sala. Salapa surinmi karqan Heber.

²⁵ Heberpa surinkuna kayarqan ishkaymi. Qechpa surinpa jutinmi karqan Peleg. Sayno jutin karqan pay kawanan wisan runakuna chikinakur wakpa kaypa aywakuyashqanpitami. Shulka surinpa jutinnami karqan Joctán.

²⁶ Joctánpa surinkunami kayarqan Almodad, Selef, Hazar-mavet, Jera,

²⁷ Adoram, Uzal, Dicla,

²⁸ Obal, Abimael, Seba,

²⁹ Ofir, Havila y Jobab. Paykunami kayarqan Joctánpa surinkuna.

³⁰ Paykunami täyarqan Mesapita Sefaryaq. Sefarqa inti jeqamunanläpa jalqakuna kashqanchömi kaykan.

³¹ Paykunami kayarqan Sempa surinkunapita miraqkuna. Say runakunami nacionkuna kayänanpaq askaman mirayarqan. Cada nacionninchömi kikinkunapa idiömanta parlayaq.

³² Saynömi karqan Noépa surinpita miraqkuna. Diluviupitaraqmi paykuna maysaypapis aywar nacionninkunata rurayarqan.