Gálatas 5 - Tayta Diospa Wilakuynin

Lutan yachasikuqkunata mana chaskipäyänanpaq nishqan

¹ Jesucristo libramashqami Moisés qelqashqan leykunapa munaynincho kashqansipita librina kaykansi. Sayno kaykaptinqa say leykunata cumpliyänaykipaq obligayäshuptiki ama cäsupäyaysu.

² Noqa nï: Señalakuyaptikiraq Tayta Dios salvayäshushqaykita yarpäyaptikiqa Jesucristuman yärakuyashqaykipis manakaqlapaqmi kaykan.

³ Yapaypis nï: Pipis señalakuq kaqqa Moisés qelqashqan leykunata lapantaraqmi cumplinman.

⁴ Say leykunata cäsukuypa pipis salvakuyta munarqa Jesucristupita y Tayta Diospa kuyakuyninpitapis witikuyashqami.

⁵ Noqansimi isanqa Espíritu tantiyasimaptinsi musyansi Jesucristuman yärakur salvakunansipaq kashqanta.

⁶ Jesucristuta chaskikush kashqanqa manami señalakush kashqansisu ni mana señalakush kashqansisu välin, sinöqa payman yärakur kuyanakur kawashqansimi.

⁷ Jesucristuman yärakur alimi kaykäyarqayki. ¿Pitaq shimita jatipäyäshushkanki rasunpa kaq wilakuyta mana cäsukuyänaykipaq?

⁸ Paykuna yachasiyashqanqa manami qayamaqninsi Tayta Diospitasu kaykan.

⁹ Say lutan yachasikuyqa walka levadüra mäsata jakasishqannömi kaykan.

¹⁰ Tayta Diostami manakuykä lutan yachasikuqkunata manana chaskipäyänaykipaq. Say runakunataqa pï kaptinpis Tayta Diosmi juzganqa.

¹¹ Wawqi panikuna, señalakuyänanpaq yachasiptïqa manami qatikachaykäyämanmansu ni Jesucristo noqansi rayku cruzcho wanushqanta wilakushqäpita chikiykäyämanmansu.

¹² <> nir yachasiyäshuqnikikunaqa penqayninta kutapita chipyaq kusuriykuyäsun.

Espíritu Santupa makincho kawanansipaq yachasishqan

¹³ Wawqi panikuna, Tayta Dios qayayäshushkanki librina kayänaykipaqmi. Librina karpis ama jusalikuyaysu, saypa trukanqa jukniki juknikipis kuyanakur yanapänakuyay.

¹⁴ Diospa leyninchömi nikan: <>. Say nishqanta cumplirqa lapan leyninkunatami cumpliykäyanki.

¹⁵ Sayno kaykaptinqa cuidädu chikinakuyankiman. Chikinakurqa jaqayäsinakur qarqunakuyankimi.

¹⁶ Saymi nï: Espíritu Santu tantiyasiyäshushqaykinöla kawayay. Sayno kawarqa manami shonquykikuna munashqanno jusalikuyankisu.

¹⁷ Lutan yarpaykunaqa Espíritu Santupa contranmi kaykan y Espíritu Santunami lutan ruraykunapa contran. Saymi ishkan apänakuyaptin alita rurayta munarpis kamäpakuyankisu.

¹⁸ Espíritu Santu tantiyasiyäshushqaykita cäsukurqa manami leykunapa munayninchönasu kaykäyanki.

¹⁹ Lutan yarpashqankunata ruraqkunaqa [majanta jarukuyan,] fornicación jusata jusalikuyan, melanaypaq kaqkunata rurayan, shanaripakur jusalikuyan,

²⁰ ïdulukunata adorayan, runa mayinta brujyasiyan, runa mayinta chikiyan, rimanakuyan, cëlanakuyan, imalapitapis rabyakuyan, nanaparänakuyan, qarqunakuyan, jaqayäsinakuyan,

²¹ envidiösu kayan, [runa mayinta wanusiyan,] upyalaman churakäyan, shinkakurkur lutankunata rurayan y mastami saynöla jusalikuyan. Nawpata nishqänölami kananpis albirtï: Sayno kawaqkunaqa Tayta Dios mandaykashqanman manami chäyanqasu.

²² Santu Espïritupa munaynincho kawarmi isanqa kuyanakunsi, kushikunsi, jawka kawansi, pacienciakunsi, ali shonqu kansi, yanapäkuq kansi, awnishqansita cumplinsi,

²³ humildi kansi y alilata ruranansipaq tantiyakunsi. Sayno kawarqa manami ima leytapis manakaqman churaykansisu.

²⁴ Jesucristupana karmi unay kawayninsita cruzcho wanusishkansina. Saymi jusalikuykuna yarpayninsiman shamuptinpis cäsupansinasu.

²⁵ Espíritu Santupa munaynincho kaykarqa pay tantiyasimashqansino kawashun.

²⁶ Sayno kawaykarqa pitapis rabyanäsir ama runa tukushunsu ni envidiösu kashunsu.