Gálatas 4 - Tayta Diospa Wilakuynin

¹ Pipis wamralaraq karqa herencianta manami chaskinraqsu. Chaskinanpaq kaykarpis ashmaynölami kaykan.

² Saymi ashmaqninpa munaylanchöraq kaykan papänin nishqan junaqyaq.

³ Saynölami noqansipis wamra japuy kashpansi Moisés qelqashqan leykunapa munaynincho karqansi.

⁴ Promitishqan tiempu chämuptinnami Tayta Dios Surinta kachamurqan. Paymi noqansino yurir say leykunapa munaynincho karqan.

⁵ Sayno karqan leykunapa munaynincho kashqansipita salvamänansipaqmi. Saynöpami paypa wamrankunana kanansipaq legitikamashkansi.

⁶ Wamran kashqami Surin Jesucristo promitishqan Espíritu Santuta shonqunsiman Tayta Dios kachamurqan. Espíritu Santumi Tayta Diosta imaypis: <<¡Abba, Papä!>> nikan.

⁷ Saymi ashmaynönasu kaykansi, sinöqa Tayta Diospa wamrankunanami kaykansi. Wamranna kashpansimi promitimashqansi herenciata [Jesucristo kayninpa] chaskishun.

Wawqi panikunapaq Pablo lakikushqan

⁸ Qamkunaqa Tayta Diosta manaraq reqirmi mana rasunpaypa kaq dioskunata sirviyarqayki.

⁹ Kananmi isanqa Tayta Diosta reqiyanki y paypis reqiyäshunki. Sayno kaykaptinqa ¿imanirtaq Moisés qelqashqan leykunata cumpliyta munar ashmay kayman yapay kutiykäyanki?

¹⁰ Saymi qamkunaqa Israel runakuna respitayashqan junaqkunata, killakunata, watakunata y fiestankunata respitaykäyanki.

¹¹ Sayno kayaptikimi pasaypa lakikü. ¿Walälapaqsuraq Jesucristupa wilakuyninta qamkunata yachasiyashkä?

¹² Noqapis mana Israel runakunanölami Moisés qelqashqan leykunapa munayninchönasu kaykä. Wawqi panikuna, qamkunata ruwakü noqa kashqäno qamkunapis kayänaykipaqmi. Qamkuna alimi chaskiyämarqayki.

¹³ Musyayashqaykinöpis qeshyaynïpami qamkuna kaqcho Jesucristupa wilakuyninta wilakurqä.

¹⁴ Sayno qeshyaptïpis qarqayämänaykipa trukan angiltanöraqmi y kikin Jesucristutanöraqmi ali rikayämarqayki.

¹⁵ Kananqa ¿imanakaskiyashkankitaq? Nawpataqa nawikikuna trukasina kaptinqa jorqurirpis nawïman churaparkayämankimanmi karqan.

¹⁶ Kananqa ¿Jesucristupa wilakuyninta yachasishqäpitaku conträ sharkuyashkanki?

¹⁷ Lutan yachasikuqkuna manami Dios munashqanno ali kawayänaykita munarsu yachaykäsiyäshunki, saypa trukanqa noqakunata manakaqman churayämashpan paykuna yachasiyashqanta chaskikuyänaykita munalarmi.

¹⁸ Rasunpaypa ali kawayänaykita munar yachasiyäshuptikiqa alimi kanman. Isanqa qamkunawan kaykaptïpis o mana kaykaptïpis saynöla yachasiyäshunkiman.

¹⁹ Kuyay wamräkuna, Jesucristuno kawayänaykita munarmi wachay nanay sariptin warmi lakikushqanno noqapis qamkunapaq fiyupa lakikü.

²⁰ ¡Shumaq tantiyasinäpaq qamkuna kaqcho maynapis kaykämanna! Karucho karmi ima ruraytapis kamäpaküsu.

Agarman y Saraman tinkusishqan

²¹ Moisés qelqashqan leykunapa munaynincho kayta munarqa ¿pay qelqashqankuna imata nishqantapis tantiyayankiku?

²² Saychömi nikan Abraham ishkay suriyuq kashqanta. Jukaq surin karqan ashmaynincho y jukaq surinnami karqan warmincho.

²³ Ashmaynincho kaq surinqa manami Tayta Dios promitishqan kaq surinsu karqan. Warmincho kaq surinmi isanqa Tayta Dios promitishqan karqan.

²⁴ Say warmikunata ishkay pactuman tinkusiypami tantiyasishayki. Abrahampa ashmaynin Agarmi Sinaí jirkano kaykan. Sinaí jirkachömi Israel runakunawan Tayta Dios pactuta rurar leyninkunata entregarqan. Saymi pipis say leykunapa munaynincho kar ashmayno kaykan.

²⁵ Arabiacho kaykaq Sinaí jirkanömi Agar kaykan. Saynölami Jerusalénpis y wawankunapis kaykäyan. Sayno kaykäyan Moisés qelqashqan leykunapa munaynincho kayashpanmi.

²⁶ Abrahampa warmin Saranami Tayta Dios rurashqan mushuq pactuno kaykan. Say pactuta Tayta Dios cumplir salvamaptinsimi noqansipa markansi jana pasacho kaq Jerusalén kanqa.

²⁷ Jana pasacho kaq Jerusalén aska wawayuq kananpaq kashqanpitaqa Tayta Diospa palabranchöpis kaynömi qelqaraykan: <>.

²⁸ Wawqi panikuna, sayno kaptinmi noqansiqa Sarapa wawan Isaacno kar Tayta Dios promitishqanta cumplishqanpita paypa wamrankuna kaykansi.

²⁹ Espíritu Santupa munayninwan yuriq Isaacta Agarpa wawan chikishqannömi kananpis Moisés qelqashqan leykunata cumplisiqkuna chikiykämansi.

³⁰ ¿Manaku yarpäyanki Tayta Diospa palabran imata nishqantapis? Saychömi qelqaraykan Sara kayno nishqan: <<¡Say ashmaytaqa wawantinta jukla qarquy! Say warmipa wawanqa wawä Isaacwan manami herencianta rakipänakuyanmansu>>.

³¹ Wawqi panikuna, noqansiqa manami ashmay kaq warmipa wawannösu kaykansi, saypa trukanqa Sarapa wawannömi.